Korintu ɗiɗaɓol 10 - Bible Fulfulde Bénin New Testament

Pol toontake feluɓe ɗum

¹ Min Pol, mii eela on e ɗiggere, e geetaaku *Almasiihu. E wi'ee mii ɗiggi to mi na'on caka mon, amma mii suusi to mii woɗɗodii on.

² Cawree, to on doolee am hollugo on cuusal to mi waroy to mooɗon. Emi miili hollitingo cuusal am dow wi'ooɓe e ɓannu nun men jahirta.

³ E gooŋa, himɓe men laatii, amma men kaɓataa hande no himɓe haɓirta.

⁴ Gam kaɓirɗum amen laataaki ɗum ɓannu, kaɓirɗum Alla semmentejum nun, doƴƴoojum bombooji. Emen doƴƴa miilooji himɓe leliiɗi,

⁵ e mawnitaare fu, haɗoore himɓe annugo Alla. Emen baylita miilooji himɓe fu, men bittinaa ɗi, ɗi ɗowtanoo Almasiihu.

⁶ To ɗowtaare mooɗon hebbii, men ciriyake fooɗugo noppi neɗɗo fu, mo ɗowtaaki.

⁷ Daaree huune hande no ɗum laatorii. To goɗɗo e hoolii laati nun mo *Almasiihu, o faama kaa ɗo: To oo laatii mo Almasiihu, menen bo, emen laatii ɓe Almasiihu.

⁸ Ɗum sentintaako am baa to mi jurorake puy baawɗe ɗe Joomiraawo hokki men. O hokkii men ɗe, gam mawningo goonɗinki mon, hinaa gam halkugo ki.

⁹ Mi yiɗaa miilon mi hulnan on nun e ɗereeji am.

¹⁰ Gam woɓɓe e wi'a «Ɗereeji am e teddi, e woodi semme. Amma to mi na'on caka mooɗon, mii laatii tampuɗo, batu am e yawnii.»

¹¹ Batoowo hande non, e haani ɗum laaɓana ɗum no ko men binnata der ɗereeji amen to emen boɗɗi, kanjum men gaɗata bo, to emen gondi e mooɗon.

¹² Men cuusataa fotingo, naa bo foonnugo ko'e amen e woɓɓe batanooɓe ko'e mum geeta. Kamɓe, ɓee poonna ko'e maɓɓe e poonnirɗum maɓɓe. Ɓee nandina ko'e maɓɓe e ko'e maɓɓe! Ɓe galaa hakkillo.

¹³ Menen, men jiɗaa juroraago ko'e amen faa yawta jaka. Amma emen juroro kaddi golle ɗe Alla yowani men faa men jottorii to mooɗon.

¹⁴ To men jottaakino to mooɗon, den men ƴartikeno kaddi. Amma men ƴartaaki kaddi, gam e haanuno men jaha to mooɗon, menen bo arti waddango on *linjiila *Almasiihu.

¹⁵ Men jurortaako golle woɓɓe faa yawta. Amma emen koolii, to goonɗinki mooɗon e ɓeydoo, golle amen bo ɓeydoto yaajugo caka mooɗon tawee men ƴartaaki jaka to Alla resani men.

¹⁶ Ɓaawo mum, men baawan ko waajii linjiila der nokkuuje gonɗe yeeso mon. Men jurortaako golle ɗe woɓɓe waɗi der nokkuure mum.

¹⁷ E winnii: «Jurotooɗo fu, juroro Joomiraawo.»

¹⁸ Gam hinaa manoowo hoore mum woni jaɓaaɗo, amma mo Joomiraawo mani.