Korintu ɗiɗaɓol 1 - Bible Fulfulde Bénin New Testament

Sannoore

¹ Ɗerewol ŋol ɗo ƴiwii e am, min Pol, e banniraawo meeɗen Timote. Mii lilaaɗo Yeesu *Almasiihu e sago Alla. Emen canna eklesiya Alla gonuka Korintu, e himɓe Alla wonɓe leydi Akaya fu.

² Alla Baaba meeɗen e Yeesu Almasiihu Joomiraawo, waɗana on moƴƴere, hokka on jam!

Pol yettii Alla

³ Barke laatanoo Alla *Baaba Yeesu *Almasiihu Joomiraawo meeɗen. Oo laatii Baaba enɗotooɗo, Alla deƴƴitinoowo ɓerɗe der huune fu.

⁴ Kanko deƴƴitinta ɓerɗe meeɗen der ɓillaaje fu, gam enen bo, baawen ko deƴƴitini ɓerɗe wonɓe der ɓillaaje feere feere, diga deƴƴitinki ki o deƴƴitini en.

⁵ No tooraaji ɗi keɓeten gam Almasiihu ɗuuɗiri, non non bo deƴƴitinki men ɗuuɗiri diga e makko.

⁶ To men tooraama, ɗum laati nun gam ɓerɗe mooɗon deƴƴita e gam kisidam mon. To men deƴƴitinaama, ɗum laati nun gam deƴƴitinki mon, gam baawon munyango iri tooraaji ɗi men tooretee.

⁷ Emen goodi hoolaare dow mooɗon puy. Emen anni no goodirɗon geɗu e tooraaji amen, non non bo goodirɗon geɗu der deƴƴitinki ki men goodi.

⁸ Banniraaɓe, emen jiɗi anningo on tooraaji ɗi men keɓi der leydi Asiya. Tooraaji ɗin sattii faa yiɗi ɓura semme amen. Men miilayno du wonaago e yonki.

⁹ Laaɓanii men, der ɓerɗe amen, men kiitaamaa men baree. Ɗum laatake gam to men kooloo ko'e amen, amma men kooloo Alla pintinoowo maayɓe.

¹⁰ Kanko hisini men e kaliire maayde iri nee ɗon, o hisinan men kade bo. Emen koolii mo, o hisinan men kade.

¹¹ Onon bo, oon ballita men e du'aaje mon. Ɗuuɓɓe e du'anoo men. Alla bo jaɓan du'aaje ɓe gaɗanta men, den ɗuuɓɓe yetttan mo sabbu amen.

Pol firtii jahaaŋal mum

¹² Ko laatii juro amen nani: miilooji ɓerɗe amen e seedanoo men, men gonorake der duuniyaaru e laaɓal ɓerɗe, e gooŋa, ɓurna mum hakkune mon. Men gaɗiray ɗum e faamu himɓe, amma e moƴƴere Alla.

¹³ Ko men binnanta on, goɗɗum suuɗaaki der ɗon, to hinaa ko janŋoton e ko paamoton. Mii miili bo, on paaman ɗum faa heennyitirde.

¹⁴ On puɗɗii faamugo no menen nun laatii juro mon, onon bo laatii juro amen nyaanne Joomiraawo meeɗen Yeesu wittoy.

¹⁵ Mi hoolake on puɗɗii faamugo ɗum. Gam majjum jiɗunoomi warugo to mooɗon aran, gam keɓon moƴƴere de ɗiɗi.

¹⁶ Ko jiɗunoomi woni, mi yaala to mooɗon to emi yaha leydi Maseduwaan, den mi wartira to mooɗon, ballon am mi yaha leydi Yahudiya.

¹⁷ No bi'umi mi waran to mooɗon, mi miilay batirmi ka na? Naa bo ko miilumi mi waɗa, e miilo duuniyaaru gaɗiranmi ɗum na, faa laatoo mii wi'a «ee» e «aawo» sannu?

¹⁸ Alla e laatii koolaaɗo, oo anni mi fewataa. Haala ka men bati on laataaki «ee» e «aawo» sannu.

¹⁹ Yeesu *Almasiihu *Ɓii Alla, mo men baajii on batu mum, min e Silaasi e Timote, o laataaki ''ee'' e ''aawo'', amma ''ee'' tan woni der makko.

²⁰ Yeesu nun laatii «ee» alkawalji ɗi Alla haɓɓi fu. To non, diga e makko bi'eten aami, gam Alla teddinee.

²¹ Alla nun woni cemmiɗinoowo kawtal men e Almasiihu, menen e mooɗon. Kanko suɓi en.

²² Kanko maanii en e maanorɗum makko, o wattii *Ruuhu makko der ɓerɗe meeɗen, gam tabbitingo o hokkan en moƴƴereeji ɗi o resani en.

²³ Alla e laatii seedeejo am, gam to mi sattana on woni mi wittay Korintu.

²⁴ Men jiɗaa laamanaago goonɗinki mooɗon. Gollodaago on gam seyo mon men jiɗi, gam goonɗinki mon e semmiɗi.