Iburaninkeeɓe 4 - Bible Fulfulde Bénin New Testament

¹ Alla haɓɓanii en alkawal naatugo der siwtaare mum. To non, sey kulen, gam to goɗɗo mooɗon miilu sakitake, dullii naatugo der mayre.

² Gam enen bo, en baajaama *linjiila hande kaakiraaɓe men. Amma, ka ɓe nani nafay ɓe, gam no ɓe nani, ɓe goonɗinay.

³ Amma enen goonɗinɓe, en naatan der siwtaare ne Alla batani, hande no o wi'i: «Mi hunake e mone bi'umi: “Ɓe naatataa der siwtaare am pay !”» Nani bo Alla heennyi waɗugo golle mum diga o tagi duuniyaaru.

⁴ Bataama kade nokkun der Dewtere, dow nyalaane jeeɗiɗawre, wi'aa: «Alla siwtake waɗugo golle mum fu der nyalaane jeeɗiɗawre .»

⁵ O wi'i kade der nokkuure wonne: «Ɓe naatataa der siwtaare am pay .»

⁶ Artuɓe nani *linjiila naatay der siwtaare nen, gam ɓe ɗowtaaki. Amma woɓɓe waawan ko naati kade.

⁷ Gam majjum, Alla resii nyalaane wonne kade, o noddi ne «hanne» o batanii ne ɓaawo duuɓi ɗuuɗɗi, diga e hunnuko Dawda, o wi'i: «Hanne, to on nanii daane Alla, to on joorinee ɓerɗe mooɗon .»

⁸ To Yosuwa hokkiino ɓe siwtaare, Alla batantaano kade siwtaare wonne ɓaawo nii.

⁹ To non, *nyalaane siwtaare e horanii kade himɓe Alla.

¹⁰ Gam naatuɗo der siwtaare Alla, siwtoto e golle mum kanun bo, hande no Alla siwtorii e ɗe mum.

¹¹ Gam majjum, en tinnee naaten der siwtaare Alla. To goɗɗo tokku misaalu dullere ɗowtaare himɓe Isira'iila, yana.

¹² Haala Alla e woodi yonki, eka woodi semme. Kaa ɓuri kaafahi kiye fu, belnaaki becce ɗiɗi welugo. Kaa naata faa der, ka seenna yonki e ruuhu, jokkule e busam. Eka hiitoo maatirɗum, e miilooji ɓerne.

¹³ Walaa fu ko tagaa, ko suuɗanii Alla, huune fu laaɓi e gite makko. Kanko jottinoyten ko gaɗuɗen fu.

Yeesu e ɓuri hooreeɓe Limaamiiɓe

¹⁴ Een goodi hooreejo *Limaamiiɓe mawɗo jottiiɗo to Alla dow kammu, kanko woni Yeesu, *Ɓiɗɗo Alla. Gam majjum, sey jogoɗen e ɓerɗe goote goonɗinki meeɗen ki ceedotoɗen.

¹⁵ Een goodii hooreejo Limaamiiɓe baawoowo enɗaago en der tampe meeɗen. Gam kanko e hoore makko o jaribaama der huune fu hande no meeɗen, amma o waɗay hakke.

¹⁶ Gam majjum, en ɓattee kittaal *Laamaare Alla ŋal moƴƴere e hoolaare, gam keɓen enɗam, e moƴƴere, de gooduɗen bukaata ballal fu.