Iburaninkeeɓe 2 - Bible Fulfulde Bénin New Testament

To en jeebee kisidam

¹ Gam majjum, e haani kakkilanen puy ko nanuɗen, gam to en boɗɗodee laawol.

² Haala ka Alla hokki diga e malaykaaɓe goonɗii. Woofuɓe e saliiɓe ɗowtanaago ka fu, heɓan kiita kaa ɗo haanani ɓe.

³ To non noy daɗirten, to en jeebake kisidam mawɗam hande ɗam ɗo? Joomiraawo nun arti batango kisidam ɗam, den nanuɓe tabbitinanii en ɗam.

⁴ Alla semmiɗinii seedaaku maɓɓe e waɗugo maaneeji, e kaayɗiniiɗum, e kaayeefiiji feere feere. Alla hollitii ɗum bo e seennango ɓe *Ruuhu Ceniiɗo hande no o yiɗiri.

Yeesu laatake neɗɗo gam hisina himɓe

⁵ Alla hokkay malaykaaɓe ɓe laamano duuniyaaru garoowu nu batanten.

⁶ Goɗɗo batii nokkun der Dewtere, wi'i: «Ume neɗɗo laatii faa ciwtoraa ɗum? naa ɓii-aadama ko paaleɗaa ɗum?

⁷ A leesinii mo wakkati seɗɗa ley malaykaaɓe, a meelii mo tedduŋal e manŋu.

⁸ A yowii huune fu ley koyɗe makko .» No Alla yowani mo huune fu, eɗum holla no goɗɗum horaaki ko o yowanay mo junŋo. Jooni en ji'ataa taw no o yowanii mo kujje fu junŋo.

⁹ Amma een ji'a Yeesu leesinanooɗo wakkati seɗɗa ley malaykaaɓe, jooni o meelinaama tedduŋal e manŋu. Gam ume? Gam o toorake, o maayi. Hande non, sabbu moƴƴere Alla, o maayiranii himɓe fu.

¹⁰ Ɗum fottanii Alla taguɗo huune fu, e mo gam mum huune fu woni, yaara himɓe ɗuuɓɓe ɓe keɓa tedduŋal. Ɗum fottanii mo bo, o yottina Yeesu maɓɓitinɗo laawol kisidam, o laato kebbuɗo diga e tooraaji.

¹¹ Gam laaɓinoowo, e laaɓinteeɓe fu ƴiwii diga e baaba gooto. Kan waɗi o sentay noddugo ɓe banniraaɓe.

¹² O wi'ii: «Mi batan banniraaɓe am inne maa, mi maantete caka jama'aare maa .»

¹³ O wi'ii kade: «Mi yowan hoolaare am fu dow Alla.» Kade bo, o wi'i: «Mi nani, min e ɓiɓɓe ɓe Alla hokkimmi .»

¹⁴ Hande no ɓiɓɓe woodiri ɓannu e ƴiiƴam, hande non Yeesu bo ettiri ɓannu, laatii hande maɓɓe. O waɗii ɗum gam diga e maayde makko, o halka baawɗe laamaniiɗo maayde, waato *Seyɗan.

¹⁵ Diga e majjum o rinɗini laatiiɓe maccuɓe der gonki mum fu, gam ɓe kuliino maayde.

¹⁶ Gam een anni, malaykaaɓe bane Yeesu wari wallugo, amma laatiiɓe lenyol Iburahiima nun.

¹⁷ Gam majjum, e haani o nanda e banniraaɓe makko der huune fu. Hande non o laatorii hooreejo *Limaamiiɓe mo enɗam, koolaaɗo der golle Alla, gam o moyta hakkeeji jama'aare.

¹⁸ Kanko e hoore makko o tooraama, o jarbaa. Gam majjum, o waawan wallugo jarbaaɓe.