Golle Lilaaɓe 8 - Bible Fulfulde Bénin New Testament

¹ Sol bo nootake barki Etiyen. Nyaanne mum toora mawka tawi eklesiya *Urusaliima. Ɓe fu ɓe cankitii der leyɗe Yahudiya e Samariya, lilaaɓe tan horii.

Sol e toora Eklesiya

² Himɓe hulɓe Alla uwi Etiyen, ɓe bulli maayde makko sanne.

³ Amma Sol e tinnii e halka eklesiya. Oo naata cuuɗi, oo nanŋa worɓe e rewɓe, oo wurtina ɓe oo maɓɓaa der kasu.

Filippu e waajoo der leydi Samariya.

⁴ Cankitinooɓe ɓen e woosoo e waajoo *linjiila.

⁵ Filippu yahi siire Samariya gom, e waajoo haala *Almasiihu.

⁶ Jama'aare fu e hettinii e hakkillo ko Filippu waajotoo, ɓe ji'ii kaayeefiiji ɗi o waɗi.

⁷ Ginnaaji e wurtoo e ɗuuɓɓe e kalɓaali mawɗi, moofooɓe ɗuuɓɓe e laƴooɓe yoofake.

⁸ Ɗum laatii belɗum ɓerne der siire nen.

⁹ Gorko bi'eteeɗo Simon e tawanoo der siire nen. Oo waɗa dobo dobo kaaynotooɗum Samariyaaɓe sanne, oo daari hoore makko tedduɗo.

¹⁰ Ɓe fu ɓee kettinanii mo, diga famarɓe faa mawɓe, ɓe bi'i: «Gorko oo ɗo woni baawɗe Alla bi'eteeɗe ‟Mawɗe”.»

¹¹ Ɓee kettinanoo mo, gam diga ko ɓooyi oo haaynoo ɓe e dobo dobo makko.

¹² Amma no Filippu waajii ɓe *linjiila *Laamaare Alla e haala Yeesu *Almasiihu, ɓe goonɗini, worɓe e rewɓe fu waɗanaa *batisi.

¹³ Simon e hoore muuɗum goonɗini kanun bo. O waɗanaa batisi, o tokkini Filippu, ɗum haaynii mo sanne no o yi'i kaayeefiiji e haaynaareeji mawɗi e waɗee.

¹⁴ Lilaaɓe wonɓe *Urusaliima nani Samariyaaɓe goonɗinii haala Alla. Ɓe lildani ɓe Piyer e Yuhaana.

¹⁵ No ɓe jottii ton, ɓe du'anii ɓe, heɓa ɓe keɓa *Ruuhu Ceniiɗo,

¹⁶ gam Ruuhu Ceniiɗo jippaakino taw e goɗɗo maɓɓe, e inne Yeesu Joomiraawo nun ɓe gaɗiranaa *batisi.

¹⁷ Den Piyer e Yuhaana yowi juuɗe mum dow maɓɓe go ɓe keɓi Ruuhu Ceniiɗo.

¹⁸ No Simon yi'i ɓe keɓii *Ruuhu Ceniiɗo no lilaaɓe yowi juuɗe mum dow maɓɓe, o waddani ɓe ceede,

¹⁹ o wi'i: «Kokkee am min bo baawɗe ɗen gam mo jowammi juuɗe fu heɓa Ruuhu Ceniiɗo.»

²⁰ Amma Piyer toontii mo, wi'i: «Alla halkee, an e ceede maa, gam a miilii dokkal Alla ceede nun soodirtee!

²¹ A walaa geɗu, naa bo kawtal der haala kan, gam ɓerne maa foonnitanaaki Alla.

²² Gam majjum tuubu e kalluɗum maa, du'a Joomiraawo yaafee ko miijotoɗaa der ɓerne maa, to waɗoto.

²³ Gam mi yi'ii kaaɗuɗum e hebbu maa, kalluɗum e haɓɓu maa.»

²⁴ Simon toontii, wi'i: «Du'anee am Joomiraawo, gam to goɗɗum e ko bi'uɗon heɓanmi.»

²⁵ Ɓaawo no Piyer e Yuhaana seedi, ko ɓe baajii haala Joomiraawo, ɓe bittiri *Urusaliima. E laawol ɓe baajii ci'e Samariyaaɓe ɗuuɗɗe linjiila.

Filippu fottii e semmenteejo Etiyopiya gom

²⁶ Malaykaajo Joomiraawo wi'i Filippu: «Umma, yahu hoore fuɗo, laawol ƴiwuŋol *Urusaliima e foonni Gaaja, laawol ŋol, laddewol nun.»

²⁷ O ummii o yahi. Den o tawi gorko Etiyopiyankeejo semmenteejo, ɓujaaɗo, kanko nun suuɗata ceede Kandake, laamiiɗo Etiyopiya debbo. O yahiino Urusaliima sujidanoygo Alla.

²⁸ No o hootata, oo jooɗii e laana pucci makko, oo janŋa der dewtere annabi *Esaaya.

²⁹ *Ruuhu wi'i Filippu: «Yahu, ɓatta laana ŋan.»

³⁰ Filippu doggi, hewtii mo, nani oo janŋa dewtere annabi Esaaya, wi'i: «Aa faama e gooŋa ko janŋataa na?»

³¹ Gorko on toontii, wi'i: «Noy baawiranmi faamugo to goɗɗo faantinay am?» O eeli Filippu eenca, jooɗoo ley makko.

³² Daa aayaaje ɗe o janŋanno e dewtere nen: «Oo yaaree hande baala kiisoyteeŋa. hande jawgiyel deƴƴuŋel yeeso kesanɗo ɗum, Nunnun o jeeɗorii

³³ O yawnaama, o hiitanaaka e gooŋaaku. Moy waawata ko bati haala himɓe wakkati makko? Gam yonki makko ikkinaama e duuniyaaru.»

³⁴ Semmenteejo on wi'i Filippu: «Mii eelee, bataa am, moy Annabiijo on batanta, hoore makko nun naa goɗɗo?»

³⁵ Filippu fuɗɗi haala diga aayaaje ɗen, waajii mo *linjiila Yeesu.

³⁶ Ɓe tokki laawol maɓɓe faa ɓe jottii diyam. Semmenteejo on wi'i: «Diyam nani! Ko haɗatanmi waɗeego *batisi?» [

³⁷ Filippu wi'i: «To a goonɗinii e ɓerne maa fu, walaa ko haɗetee waɗeego batisi.» O toontii, o wi'i: «Mii goonɗini Yeesu *Almasiihu woni *Ɓii Alla.»]

³⁸ O waɗi laana ŋan darii. Ɓe fu ɓe jippii, ɓe naati e diyam. Filippu waɗi mo *batisi.

³⁹ No ɓe burtii e diyam, Ruuhu Joomiraawo safi Filippu. Semmenteejo on yi'ay mo kade, tokki laawol muuɗum e belɗum ɓerne.

⁴⁰ Filippu tawi na'on Ajotus. Diga ɗon faa Kaysariya, siire ne o yahi fu, oo waajoo *linjiila.