Golle Lilaaɓe 7 - Bible Fulfulde Bénin New Testament

Etiyen e waajoo dottiiɓe Yahuduuɓe

¹ Den hooreejo *Limaamiiɓe ƴami: «Ka ɓe bati, nunnun ka laatii na?»

² Etiyen toontii, wi'i: «Banniraaɓe e baabiraaɓe, accee hakku, kettinee! Alla tedduɗo holliti hoore mum Iburahiima no o wonnoo leydi Mesopotamiya, go o yaha o jooɗoo Haran,

³ Alla wi'i mo: ‟Eggu leydi maa accaa saareeji maa, jahaa leydi ni kollan maa mi .”

⁴ Den Iburahiima wurti leydi Kaldiya, yahi jooɗoy Haran. Ɓaawo maayde baabiiko, Alla eggini mo diga ɗon, waddi mo e leydi ni tawaɗon e muuɗum jooni.

⁵ Alla hokkay mo jeyde e leydi nin baa yaaɓande koyŋal, amma o haɓɓii alkawal no ni laatoto halal makko, kanko e lenyol makko, baa no o woodaano ɓiɗɗo .

⁶ Nani ɗo ka Alla wi'i: ‟Taanirakon maa feran hoota leydi jananni, ɓe laatoo maccuɓe, ɓe tooree duuɓi keme naay.”

⁷ Amma lenyol ŋol ɗo laatini ɓe maccuɓe, mi hiitoto ɗum. Ɓaawo majjum ɓe burtoto, ɓe cujidanammi e ley nokkuure nee ɗo .

⁸ Den Alla haɓɓidi e Iburahiima alkawal juulnol. Juulnol laatii maane alkawal ŋal. Hande nun, Iburahiima rimi Isiyaaku, juulni mo nyaanne jeetatawre, Isiyaaku juulni Yaakuubu, Yaakuubu bo juulni ɓiɓɓe muuɗum sappo e ɗiɗo, laatiiɓe lenyi sappo e ɗiɗi.

⁹ Ɗon kaakiraaɓe men ɓen waɗani Yusufu miiraawo mum nawniraagu, ɓe cippi mo Misira. Amma Alla e wondi e makko,

¹⁰ wurtini mo e tooraaji makko fu, hokki mo moƴƴere e hakkillo yeeso Fiirawna, laamiiɗo Misira. Fiirawna on waɗi mo dawranoowo Misira e saare makko fu.

¹¹ Den rafo waɗi der Misira e Kanaana fu. Ɓillaare mawni faa kaakiraaɓe meeɗen dulli nyaamdu.

¹² No Yaakuubu nani nyaamdu na'on Misira, o lili ton kaakiraaɓe men aran.

¹³ No ɓe jahi ɗiɗawre Yusufu acci rindaaɓe mum anniti ɗum. Diga ɗon nun Fiirawna anniti lenyol Yusufu.

¹⁴ Den Yusufu lili, baaba mum Yaakuubu waddee kanko e saareeji makko fu. Limgal maɓɓe fu waɗan himɓe lasoy tato e sappo e joyo.

¹⁵ Yaakuubu yahi Misira, o maayi ton kanko e kaakiraaɓe meeɗen.

¹⁶ Ɓe kooraa Sikem, ɓe uwaa der saabeere ne Iburahiima soodunoo to ɓiɓɓe Kamor der leydi Sikem.

¹⁷ No alkawal ŋal Alla haɓɓannoo Iburahiima ɓadii hebbugo, himɓe meeɗen ɗuuɗi, heewi Misira.

¹⁸ Wakkati mum laamiiɗo goɗɗo mo annaano Yusufu laamii leydi Misira.

¹⁹ Laamiiɗo on ƴoyri lenyol meeɗen, toori kaakiraaɓe meeɗen, o dooli ɓe ɓe acca sukahon maɓɓe maaya.

²⁰ Der wakkati on nun Muusa rimaa, laatii suka booɗuɗo, pottanɗo Alla. O umminaa lebbi tati e wuro baabiiko.

²¹ No o woppaa, ɓii Fiirawna debbo hocci mo, ummini mo hande ɓiyum.

²² Nunnun Muusa janŋiri annal Misirankeeɓe fu, o laatii gooduɗo baawɗe der haalaaji e gaɗuuji makko.

²³ No Muusa waɗi duuɓi lasoy ɗiɗi, miilo warani mo o yaha o daara banniraaɓe makko, ɓiɓɓe Isira'iila no woniri.

²⁴ O yi'i Misirankeejo e toora gooto maɓɓe, o jaɓani neɗɗo makko, o fiyi Misirankeejo, o wari.

²⁵ Oo miilunoo banniraaɓe makko faaman no Alla yiɗi hisingo ɓe diga e makko, amma ɓe paamay.

²⁶ Fini mum o fotti ɗiɗo maɓɓe e haɓa. O yiɗi seennugo ɓe, o wi'i: ‟Igooɓe am, onon, oon banniraaɓe! Ko waɗi oon kaɓa?”

²⁷ Amma tooroowo banniraawo muuɗum yeeƴi Muusa, wi'i: ‟Moy waɗu maa ardiiɗo naa bo kiitantooɗo men?

²⁸ Naa a yiɗu nun warugo am hande no barirɗaa Misirankeejo keenya ?”

²⁹ No Muusa nani haala kan, feri, yahi leydi Madiyam. O rimi ton ɓiɓɓe worɓe ɗiɗo.

³⁰ Duuɓi lasoy ɗiɗi ɓaawo mum, malaykaajo Joomiraawo holliti hoore mum Muusa takkol waanne Sinayi der haro, der nyoomoore jaɓoore yiite der baafirdi.

³¹ No Muusa yi'i ɗum, haaynaare nanŋi ɗum. Oo ɓattoo o daara, den daane Joomiraawo wi'i:

³² ‟Min woni Alla kaakiraaɓe maa, Alla Iburahiima e Isiyaaku e Yaakuubu.” Muusa darii e diwna, huli daarugo.

³³ Joomiraawo wi'i mo: ‟Ɓortu paɗe maa, gam to dariɗaa ɗo laati nun nokkuure seniine.

³⁴ Gam mi daarii, mi yi'ii toora himɓe am wonɓe Misira, mi nanii bojji maɓɓe, mi jippake rinɗingo ɓe. Jooni, war, mi lilee Misira .”

³⁵ Muusa mo ɓe calinoo ɓe bi'i: ‟Moy waɗu maa ardiiɗo naa kiitotooɗo men?” Kanko Alla lili, waɗi ɗum ardiiɗo e paabotooɗo, diga e malaykaajo birnitaniiɗo mo der nyoomoore.

³⁶ Kanko wurtini ɓe, o waɗi haaynaareeji e kaayeefiiji der leydi Misira e der maayo Maliya, e der haro duuɓi lasoy ɗiɗi.

³⁷ Muusa on bati ɓiɓɓe Isira'iila wi'i: ‟Alla umminanan on Annabiijo caka banniraaɓe mooɗon hande am .”

³⁸ Wakkati ɓe kawti der haro, kanko laatii dariiɗo hakkune kaakiraaɓe meeɗen e malaykaajo baddunooɗo mo dow waanne Sinayi. Kanko jaɓi haalaaji gurnam, gam o hokka en ɗi.

³⁹ Amma kaakiraaɓe meeɗen yiɗay nanango mo. Ɓe calii mo, hakkillooji maɓɓe witti Misira,

⁴⁰ ɓe bi'i Haruuna: ‟Waɗan men tooruuje ardotooɗe men, Muusa burtinɗo men leydi Misira on, men annaa ko waɗi mo .”

⁴¹ Nyaanne mum, ɓe gaɗi tooruure nandune e ga'el, ɓe caafi ne, ɓe belbelti sabbu golle juuɗe maɓɓe.

⁴² Alla totti ɓe ɓaawo, acci ɓe ɓe caafa naaŋe e lewru, e koode, hande no winnaa e dewtere annabiiɓe: ‟Himɓe Isira'iila! Duuɓi lasoy ɗiɗi ɗi gaɗuɗon der haro, min gaɗanɗon sadakaaji kirsaaɗi na?

⁴³ On doonake bukaaru tooruure Moloko , e hoodere tooruure mooɗon Refan , tooruuje ɗe gaɗuɗon gam caafon ɗe Kan waɗi mi egginan on mi yaara on gaɗa Babiila .”

⁴⁴ Kaakiraaɓe meeɗen e woodunoo bukaaru seedaaku der haro. Muusa waɗii nu hande no Alla batiri mo, o waɗa nu hande no o yi'iri nu .

⁴⁵ Bukaaru nun kaakiraaɓe meeɗen roni, eggidi e mayru wakkati Yosuwa ardii ɓe, naanni ɓe leydi ni ɓe teeti to lenyi ɗi Alla riiwi. Ton nu woni faa jaamanu Dawda.

⁴⁶ Dawda heɓii moƴƴere Alla, ƴami heɓa laawol mahana Alla mo Yaakuubu suudu.

⁴⁷ Amma Suleymaanu nun mahani mo ŋol.

⁴⁸ E nun fu, Alla mo dow jooɗataako der cuuɗi ɗi himɓe mahi, hande no Annabiijo bati wi'i: «Joomiraawo wi'i:

⁴⁹ ‟Kammu laatii gurol laamorde am, leydi bo jaaɓirɗum koyɗe am. Suudu ŋole mahanton am? E nokkuure ney ciwtotoomi?

⁵⁰ Junŋo am bane tagi kujje ɗee fu na?”»

⁵¹ Onon turtooɓe, ɓe ɓerɗe joorɗe e taaɗuɓe noppi, wakkati fu oon caloo nanango *Ruuhu Ceniiɗo. On laati nun hande kaakiraaɓe mooɗon.

⁵² Annabiijo moy woni mo kaakiraaɓe mooɗon tooray? Ɓe barii artunooɓe batugo haala garki Gooŋaajo, kanko jammiɗon baruɗon ɗum jooni.

⁵³ Onon nun heɓi tawreeta Muusa ka malaykaaɓe waddi, go on tokkay ka.

Maayde Etiyen

⁵⁴ No ɓe nani haalaaji ɗin, ɓe kebbi mone Etiyen faa ɓee kirƴontira nyiiƴe.

⁵⁵ Amma Etiyen hebbi *Ruuhu Ceniiɗo, tiggitii dow yi'i tedduŋal Alla, yi'i Yeesu bo e darii nyaamo Alla.

⁵⁶ O wi'i: «Daa! mii yi'a kammu e maɓɓitii, *Ɓii neɗɗo e darii nyaamo Alla.»

⁵⁷ Ɓe fu ɓe kalɓi e semme, ɓe cukki noppi maɓɓe, ɓe mogganii mo,

⁵⁸ ɓe burtini mo siire, go ɓe janti faɗɗugo mo kaaƴe. Seedeeɓe ɓoorti gineeji mum, reenini ɗi gojankeejo gom bi'eteeɗo Sol.

⁵⁹ No Etiyen faɗɗetee kaaƴe, oo du'oo oo wi'a: «Joomiraawo am Yeesu, jaɓu yonki am!»

⁶⁰ Den o jiccii, o halɓi e semme, o wi'i: «Joomiraawo, taa yowan ɓe hakke ɗee ɗo!» No o bati ka, o maayi.