Golle Lilaaɓe 6 - Bible Fulfulde Bénin New Testament

Worɓe jeeɗiɗo suɓaama gam walla lilaaɓe.

¹ Der balɗe ɗen, tawi goonɗinɓe e ɓeydoo ɗuuɗugo, batooɓe yunaninkeere gaccii Iburaninkeeɓe, gam gowniiɓe maɓɓe yeebete nun to nyaamdu e seennee nyalaane fu.

² Lilaaɓe sappo e ɗiɗo ɓen noddi jama'aare goonɗinɓe, wi'i: «Haanay men acca waajaago haala Alla, men kiinnoo jagganaago nyaamdu.

³ Gam majjum banniraaɓe, cuɓee hakkune mooɗon worɓe jeeɗiɗo ɓe kooliɗon, hebbuɓe *Ruuhu Ceniiɗo e faamu, gam men jowana ɓe golle ɗen.

⁴ Amma menen, accon men men kiinnoo du'aago e jagganaago haala Alla.»

⁵ Haala kan welii jama'aare fu. Den, ɓe cuɓi Etiyen, gorko kebbuɗo goonɗinki e *Ruuhu Ceniiɗo, kanko e Filippu e Porokorus e Nikanor, e Timon, e Parmenas e Nikolawus jeyaaɗo Antiyokiya, naatuɗo diina *Yahuduuɓe.

⁶ Ɓe jaari ɓe yeeso lilaaɓe, ɓe jowi juuɗe dow maɓɓe, ɓe du'anii ɓe.

⁷ Haala Alla e sankitoo yaago yaago, goonɗinɓe e ɓeydoo sanne der *Urusaliima. Kade bo *Limaamiiɓe ɗuuɓɓe laatake goonɗinɓe.

Nanŋoore Etiyen

⁸ Etiyen, kebbuɗo moƴƴere e baawɗe Alla, e waɗannoo haaynaareeji e kaayeefiiji mawɗi hakkune himɓe.

⁹ Amma woɓɓe der waajorde wi'eteene waajorde rinɗinaaɓe, e ƴiwɓe Sirene e Aleksandiriya e Silisiya e Asiya, ummii e yeddontira e Etiyen,

¹⁰ amma ɓe baaway jaalaago mo gam o batan nun e faamu e baawɗe *Ruuhu.

¹¹ Den ɓe baddi e himɓe gam ɓe bi'a ɓe nanii oo yenna Muusa e Alla.

¹² Nunnun ɓe umminiri hakkillo himɓe e *dottiiɓe e *moodiɓɓe tawreeta. Den ɓe jottii e juhanma, ɓe nanŋi Etiyen, ɓe jaari mo to *dawrooɓe,

¹³ ɓe gaddi seedeeɓe fewfewɓe, ɓe bi'a: «Gorko oo accay yennugo nokkuure seniine nee ɗo e tawreeta Muusa.

¹⁴ Men nanii oo wi'a Yeesu Nasaratuujo pusan nokkuure nen, waylita tawaaŋal ŋal Muusa hokki en.»

¹⁵ *Dawrooɓe jooɗiiɓe ton fu fattinani Etiyen gite, yi'i yeeso makko e wa'i hande yeeso malaykaajo.