Golle Lilaaɓe 5 - Bible Fulfulde Bénin New Testament

Ananiyas e Safiira

¹ Amma gorko bi'eteeɗo Ananiyas, e debbo mum Safiira, sootti leydi mum,

² suuɗi ceede ɗen goɗɗe mum e annaŋal debbo makko, go o yaari koriiɗe, o hokki lilaaɓe.

³ Piyer wi'i mo: «Ananiyas, ko waɗi accuɗaa *Seyɗan naati e ɓerne maa faa pewanɗaa *Ruuhu Ceniiɗo, cuuɗuɗaa ceede leydi nin goɗɗe mum?

⁴ Ko cippaa ni, an bane jeynoo ni? No cippuɗaa ni, an bane woodi baawɗe dow ceede ɗen na? Ko tawu maa ko gaɗuɗaa ɗum? Himɓe bane pewanɗaa, Alla nun pewanɗaa.»

⁵ No Ananiyas nani haala kan, yani maayi. Ɗum laatanake nanuɓe ka fu kulol manŋol.

⁶ Gojankeeɓe ummii, suddi mo yaari mo yaasi, uwoy.

⁷ Hakkune janɗe tati, debbo makko naati, tawi o nanay ko waɗi.

⁸ Piyer wi'i mo: «Batam, jaka ni coottuɗon leydi mooɗon na?» O wi'i: «Ee, nunnun.»

⁹ Den Piyer wi'i mo: «Noy an e gorko maa nannantirɗon poonnon Ruuhu Joomiraawo? Munyu, uwoyɓe gorko maa e wara, ɓe jaaree, an bo!»

¹⁰ Ɗon maa ɗon, kanko bo, o yani yeeso Piyer, o maayi. Gojankeeɓe naati, tawi o maayii, ɓe kocci mo, ɓe uwoy takkol goriiko.

¹¹ Kulol manŋol nanŋi eklesiya e nanuɓe ka fu.

Haaynareeji ɗuuɗɗi

¹² Lilaaɓe e waɗa kaayeefiiji e haaynaareeji ɗuuɗɗi hakkune himɓe. Ɓe fu ɓe kawritii ley danki Suleymaanu, ɓe gaɗi hunnuko wooto.

¹³ Baa feereejo suusay hawtugo e maɓɓe. Amma e nun fu, jama'aare e teddina ɓe sanne.

¹⁴ Goonɗinɓe Joomiraawo, worɓe e rewɓe e ɓeydo der maɓɓe yaago yaago,

¹⁵ faa ɓee gadda nyawɓe, ɓee burtina ɓe e laabi, ɓee pukkinee dow leece e daage, heɓa to Piyer warii, baa belbeldi muuɗum meema woɓɓe mum.

¹⁶ Himɓe ɗuuɓɓe ƴiwi e ci'on piiltitiikon *Urusaliima, waddi nyawɓe e ɓe ginnaaji bonɗi toorata, ɓe fu ɓe nyawtaa.

No lilaaɓe tooriraa

¹⁷ Den hooreejo *Limaamiiɓe e wondaaɓe mum, woniiɓe der waalde *Sadukiiɓe, hebbi nawniraagu.

¹⁸ Ɓe nanŋi lilaaɓe, ɓe maɓɓi ɓe der kasu yeeso himɓe fu.

¹⁹ Amma jemmaare mum, malaykaajo Joomiraawo maɓɓiti dammuɗe kasu, wurtini ɓe, wi'i:

²⁰ «Jahee oon gonii der suudu Alla, oon baajoo himɓe haalaaji gurnam kesam fu.»

²¹ No ɓe nani ka, ɓe naati suba subaka der suudu Alla ɓee janŋina. Hooreejo *Limaamiiɓe wari e wonduɓe e mum, ɓe noddi dawranooɓe *Yahuduuɓe, *dottiiɓe Isira'iila fu, ɓe bi'i lilaaɓe waddee diga kasu.

²² No reenooɓe yottii taway ɓe der kasu, ɓe bitti, ɓe jahi to *dawrooɓe ɓe bi'i:

²³ «Men tawii kasu e maɓɓii e feɗii no wooɗi, reenooɓe e darii e dammuɗe, amma no men maɓɓiti, men taway goɗɗo der ɗon.»

²⁴ No mawɗo reenooɓe suudu Alla e *Limaamiiɓe nani ka, ɓe jiɓii sanne go ɓee ƴama no haala kan laatoytoo.

²⁵ Den goɗɗo wari, bati ɓe, wi'i: «Worɓe ɓe maɓɓunoɗon e kasu ɓen, na'on der suudu Alla, e janŋina himɓe!»

²⁶ Den, mawɗo reenooɓe yaadi e reenuɓe, waddoy lilaaɓe. Amma e semme bane, gam ɓee kula to jama'aare faɗɗa ɓe kaaƴe.

²⁷ No ɓe gaddoy ɓe, ɓe darni ɓe yeeso *dawrooɓe. Hooreejo *Limaamiiɓe ƴami ɓe,

²⁸ wi'i: «Men calakeno fen fen janŋinon haala gorko on. Amma onon on cankitii janŋinol mooɗon der *Urusaliima. Kade bo, oon jiɗi yowango men gacce neɗɗo on.»

²⁹ Piyer e lilaaɓe toontii, wi'i: «Gomma neɗɗo nanana Alla e nanana himɓe.

³⁰ Alla kaakiraaɓe meeɗen fintinii Yeesu mo tigguɗon e palaaŋal, baruɗon.

³¹ Kanko nyaamo Alla etti, waɗi mo hooreejo e kisinoowo, gam o waɗa himɓe Isira'iila tuuba, ɓe keɓa yaafuye hakkeeji.

³² Menen woni seedeeɓe habaruuji ɗin, menen e *Ruuhu Ceniiɗo mo Alla hokki nananɓe ɗum.»

³³ No ɓe nani ka, mone waɗi ɓe sanne, faa ɓe jiɗi warugo lilaaɓe ɓen.

³⁴ *Farisaajo, bi'eteeɗo Gamaliyel, janŋinoowo tawreeta Muusa, tedduɗo e yeeso himɓe fu, ummii darii hakkune *dawrooɓe wi'i lilaaɓe wurtiinee seɗɗa.

³⁵ Den o wi'i ɓe: «Onon himɓe Isira'iila, kakkilee e ko jiɗuɗon waɗugo himɓe ɓen.

³⁶ Ɓooyay ko Tewdas ummii, mawnini hoore mum, ko waɗata himɓe keme nayo e tokkunoo mo. O waraama, tokkuɓe mo fu sankitii, goɗɗo horaaki.

³⁷ Ɓaawo makko, Yahuuda Galilinkeejo wari wakkati limgal himɓe, o waɗii himɓe ɗuuɓɓe tokki mo. O halkii kanko bo, tokkuɓe mo fu sankitii.

³⁸ Jooni, mii bata on: To on kiinnanee himɓe ɓen, accee ɓe jawta. Gam to gaɗu e golle maɓɓe ƴiwu nun e himɓe, ɗe kalkan.

³⁹ Amma to e gooŋa to Alla ɗum ƴiwi, on baawataa ko halki ɗum. Kakkilee, to on kaɓe e Alla!» *Dawrooɓe jaɓi haala makko,

⁴⁰ ɓe nodditii lilaaɓe, ɓe piyi ɓe, ɓe kaɗi ɓe batugo haala Yeesu, go ɓe joofiti ɓe.

⁴¹ Lilaaɓe wurtii caka dawrooɓe e ɓerne welne, gam Alla daarii ɓe, ɓe potii tooreego gam inne Yeesu.

⁴² Nyalaane fu ɓe accay waajaago e janŋingo *linjiila der suudu Alla e der cuuɗi no Yeesu laatii *Almasiihu.