Golle Lilaaɓe 4 - Bible Fulfulde Bénin New Testament

Piyer e Yuhaana yeeso dottiiɓe Yahuduuɓe

¹ Wakkati Piyer e Yuhaana baddata e himɓe, *Limaamiiɓe e mawɗo reenooɓe suudu Alla e *Sadukiiɓe yotti to maɓɓe.

² Ɓerɗe maɓɓe biisi gam Piyer e Yuhaana e janŋina himɓe, e bata ɓe no Yeesu fintii, maayɓe bo fintan e Yeesu.

³ Ɓe nanŋi ɓe, ɓe maɓɓi e kasu faa weeta, gam tawii kiikiiɗe waɗii.

⁴ Ɗuuɓɓe der nanuɓe waaju ɓen laatii goonɗinɓe, limgal maɓɓe waɗi hande himɓe ujune joyo.

⁵ Fini mum, hooreeɓe maɓɓe e *dottiiɓe e *moodiɓɓe tawreeta, hawritoy *Urusaliima,

⁶ kamɓe woni Annas, hooreejo *Limaamiiɓe, e Kayafas e Yuhaana e Aleksandire e lenyol hooreeɓe Limaamiiɓe fu.

⁷ Ɓe darni Piyer e Yuhaana yeeso maɓɓe, ɓe ƴami ɗum: «E baawɗe ɗey naa e inne moy gaɗirɗon ɗum?»

⁸ Den Piyer, hebbi *Ruuhu Ceniiɗo, wi'i ɓe: «Onon hooreeɓe e dottiiɓe,

⁹ to oon ƴama men hanne geetum ko moofo on waɗanaa, e no o yooforii,

¹⁰ oon kaani annineego ɗum on fu, onon e Isira'iilaaɓe fu. E inne Yeesu *Almasiihu, mo Nasaratu, mo onon tigguɗon dow palaaŋal, go Alla fintini mo e maayde, e barke makko nun neɗɗo dariiɗo yeeso mooɗon on nyawtiraa.

¹¹ Kanko woni hayre ne onon mahooɓe boppuɗon, kayre heennyi laatii jogiine maadi .

¹² Kisidam walaa e goɗɗo feere. Gam inne gom walaa e duniyaaru, kokkaane gam himɓe hisiniree.»

¹³ No *dawrooɓe ɓen yi'i cuusal Piyer e Yuhaana, ɗum haaynii ɓe, gam ɓe annitii himɓe tedduɓe bane, ɓe janŋay bo. Ɓe annitii bo eɓe goondunoo e Yeesu.

¹⁴ Amma no ɓe ji'i gorko nyawtaaɗo on e darodii e maɓɓe, walaa fu ko ɓe baawi wi'ugo.

¹⁵ Ɓe bi'i Piyer e Yuhaana wurto e hawriine nen, no ɓe burtii, go ɓe dawri,

¹⁶ ɓe bi'i: «Noy gaɗeten worɓe ɓen? Laaɓanii himɓe *Urusaliima fu ɓe gaɗii kaayniiɗum, en baawataa bo ko yeddi ɗum.

¹⁷ Amma en bagginee ɓe, kaɗen ɓe to ɓe batu kade goɗɗo haala neɗɗo on, gam to ka yahu eka sankitoo der himɓe.»

¹⁸ Den ɓe nodditii ɓe, ɓe baggini ɓe, ɓe kaɗi ɓe to ɓe baajoo, to ɓe janŋin bo haala Yeesu.

¹⁹ Amma Piyer e Yuhaana toontii ɓe, wi'i: «Daaree onon e ko'e mon to e foonnitii yeeso Alla, laawol mon tokkee ŋol makko accee!

²⁰ Menen kan, men baawataa ko acci batango ko men ji'i e ko men nani.»

²¹ Ɓe baggini ɓe kade. Ɓaawo majjum, ɓe joofiti ɓe, tawi ɓe keɓay laawol no ɓe kiitortoo ɓe, gam jama'aare e teddina Alla gam ko waɗii.

²² Gam nyawtiraaɗo kaayeefi on, duuɓi muuɗum e ɓuri lasoy ɗiɗi.

Goonɗinɓe e du'oo heɓa cuusal

²³ No ɓe joofaa, Piyer e Yuhaana witti to himɓe muuɗum, fillanii ɓe ko hooreeɓe *Limaamiiɓe e *dottiiɓe wi'i ɓe fu.

²⁴ No ɓe nani ka, ɓe fu ɓe gaɗi hunnuko wooto, ɓe eeli Alla e daane towne, ɓe bi'i: «Joomiraawo, taguɗo kammu e leydi e maayo e ko woni e muuɗum fu,

²⁵ an bati e *Ruuhu Ceniiɗo, diga e Dawda maama amen, laatiiɗo golloowo maa, bi'uɗaa: ‟Gam ume lenyi ummini haalaaji? Gam ume himɓe miili miilooji baanjaaji?

²⁶ Laamiiɓe leydi ummake, ardiiɓe hawriti gam haɓa e Joomiraawo e *Almasiihu muuɗum .”

²⁷ E gooŋa, der siire nee ɗo, *Eroodu e Ponsu Pilaatu nannantirii e lenyi goɗɗi e himɓe Isira'iila gam haɓa e Yeesu, golloowo maa Ceniiɗo mo gaɗuɗaa *Almasiihu,

²⁸ gam ɓe gaɗa ko desunoɗaa e baawɗe maa e sago maa diga law.

²⁹ Jooni Joomiraawo, daaru bagginol maɓɓe kalluŋol ŋol ɓe gaɗi men, den kokkaa gollooɓe maa waajoraago haala maa e cuusal manŋal,

³⁰ foortu junŋo maa, nyawtu nyawɓe, waɗu kaayeefiiji e haaynaareeji e inne Yeesu, golloowo maa ceniiɗo.»

³¹ No ɓe du'odii, nokkuure to ɓe kawritinnoo, dimmii. Ɓe fu ɓe kebbinaa *Ruuhu Ceniiɗo, go ɓee baajoroo haala Alla e cuusal.

Goonɗinɓe hawtii jawdi mum

³² Jama'aare goonɗinɓe foti, waɗi hunnuko wooto e hakkillo wooto. Ɓe kawti ko ɓe goodi fu, goɗɗo e maɓɓe wi'ataa jawdi muuɗum kan nun jey.

³³ E baawɗe mawɗe lilaaɓe ɓen seedortonoo pintol Yeesu Joomiraawo, go moƴƴere mawne e woni e maɓɓe ɓe fu.

³⁴ Goɗɗo e maɓɓe talakiɗaa, gam wooduɓe jayriiji e wurooji fu, sippan ɗi nun, wadda ceede mum,

³⁵ hokka ɗe lilaaɓe. Den moy fu hokkee jaka haaju mum.

³⁶ Lewinkeejo bi'eteeɗo Yusufu, mo lilaaɓe innitiri Barnabas (ɗum wi'ay maa kokkoowo semme), ƴiwuɗo Kipurus,

³⁷ e woodunoo gesa, sippi ŋa, waddi ceede mum, hokki ɗe lilaaɓe.