Golle Lilaaɓe 3 - Bible Fulfulde Bénin New Testament

Nyawtol moofo

¹ Piyer e Yuhaana e yaha suudu Alla wakkati juura gam waɗugo du'aare.

² Tawi gorko gom, dindaaɗo e moofaaku, e roonaa. Nyalaane fu himɓe makko e jooɗina mo to Dammugal suudu Alla bi'eteeŋal «Dammugal booɗuŋal» gam o eela naatooɓe ton sadaka.

³ No o yi'i Piyer e Yuhaana e naata, o eeli ɓe sadaka.

⁴ Ɓe tiggi mo gite, go Piyer wi'i: «Daaru men!»

⁵ O daari ɓe, oo miili heɓugo goɗɗum e maɓɓe.

⁶ Piyer wi'i: «Mi walaa ceede, naa bo kanŋeeri, amma mi hokkete ko goodumi: E inne Yeesu *Almasiihu mo Nasaratu, umma, yahu!»

⁷ O nanŋi junŋo makko nyaamo, o darni mo. Ɗon maa ɗon koyɗe makko e kolɓuli makko firtii.

⁸ O fitti, o darii, oo yaha. O naatidi e maɓɓe der suudu Alla, oo yaha, oo fitta, oo maanta Alla.

⁹ Himɓe fu yi'i mo, oo yaha, oo yetta Alla.

¹⁰ Ɓe anniti, kanko woni jooɗotonooɗo to Dammugal Booɗuŋal oo eela sadaka. Haynaare e jiɓayeere nanŋi ɓe sanne gam ko o waɗanaa.

Waaju Piyer

¹¹ Gorko on salii wittugo ɓaawo Piyer e Yuhaana, himɓe fu ɓe ɗum haaynii ɗon doggoy fotti e maɓɓe ley danki bi'eteeki «danki Suleymaanu».

¹² No Piyer yi'i ɗum, wi'i himɓe: «Onon Isira'iilaaɓe, ko waɗi e ɗum haaynoo on? Ko waɗi oon pattina gite mooɗon dow amen hande baawɗe amen naa bo kulol Alla amen waɗi gorko on e yaha e koyɗe muuɗum?

¹³ Alla Iburahiima e Isiyaaku e Yaakuubu, Alla kaakiraaɓe meeɗen, teddini jaggiiɗo muuɗum Yeesu mo gattuɗon e juuɗe mawɓe leydi go jedduɗon mo yeeso Pilaatu, jiɗunooɗo yoofitingo mo.

¹⁴ Amma onon, on jeddii Ceniiɗo, Poonnitiiɗo, on daartii yoofitaneego baroowo himɓe.

¹⁵ Jom gurnam nun baruɗon ko Alla fintini mo. Emen ceedoo ɗum.

¹⁶ Inne Yeesu nen e goonɗingo ne, kan nyawti neɗɗo mo daaroton, mo annuɗon on. Goonɗinki Yeesu on nun hokki mo jamu yeeso mooɗon on fu.»

¹⁷ «Jooni, onon banniraaɓe, ko onon e hooreeɓe mooɗon gaɗuɗon mo, mii anni der bundan nun.

¹⁸ Amma, hande nun Alla hebbiniri ko o batunoo e hunnuko annabiiɓe mum fu o wi'i *Almasiihu makko tooroto.

¹⁹ To non tuubee, bittoon to Alla, heɓa hakkeeji mooɗon moytee,

²⁰ gam Joomiraawo wadda wakkatiiji belɗi, lildaa on Almasiihu, waato Yeesu mo o suɓani on diga ko ɓooyi.

²¹ Doole Yeesu on e woni dow kammu faa to Alla laatinii kujje fu kese hande no annabiiɓe seniiɓe fu batunoo diga den.

²² Gam Muusa wi'ii: ‟Joomiraawo Alla mooɗon lildaan on Annabiijo hande am, ƴiwoowo e mooɗon. Jaɓon huune fu ko o batata on.

²³ Neɗɗo fu mo jaɓay ka Annabiijo on, ikkinte e himɓe mum ”.

²⁴ Diga Samuyila faa e annabiiɓe tokkuɓe, ɓe fu ɓe bataniino nyalaaɗe ɗen.

²⁵ Onon on ɓiɓɓe annabiiɓe, alkawal ŋal Alla haɓɓani kaakiraaɓe meeɗen e laatanii on hande no o wi'unoo Iburahiima: ‟Kookiragel maa barkiɗiniranmi lenyi duuniyaaru fu ”.

²⁶ Onon Alla arti lildanoy jaggiiɗo muuɗum, o artii lilugo mo, gam o barkiɗina on, o waylita moy mon fu diga baadi mon bonni.»