Golle Lilaaɓe 25 - Bible Fulfulde Bénin New Testament

Pol yeeso Festus

¹ No Festus yottii der leydi, ɓaawo balɗe tati, o ummii diga Kaysariya, o yahi *Urusaliima.

² Ɗon nun, hooreeɓe *Limaamiiɓe e mawɓe *Yahuduuɓe wari to makko gaccii Pol, ɓe eeli mo o waɗana ɓe moƴƴere,

³ Pol wittinee Urusaliima. Ɓe desu nun ɓe bara mo e laawol.

⁴ Festus toontii ɓe wi'i: «Pol e maɓɓii der Kaysariya, kanko e hoore makko bo o neeɓataa go o witta ton.»

⁵ O wi'i: «Mawɓe mooɗon wara men jaada Kaysariya, ɓe gaccoo gorko on to o waɗii ko wooɗaa.»

⁶ Festus waɗay e maɓɓe ko ɓuri balɗe jeetati naa sappo, ɓaawo mum o witti Kaysariya. Fini mum, o jooɗoy faadaare, o ƴami Pol waddee.

⁷ No Pol yottii, *Yahuduuɓe ƴiwɓe *Urusaliima tummi ɗum e takka ɗum gacce bonɗe ɗuuɗɗe ɗe ɓe baawataa tabbitingo.

⁸ Pol bati ka mum, wi'i: «Mi woofanay sariya Yahuduuɓe, naa bo suudu Alla naa bo laamiiɗo Roma.»

⁹ No Festus e yiɗi welnugo ɓerne *Yahuduuɓe, o ƴami Pol, o wi'i: «Aa yiɗi jahaa *Urusaliima kiitaneɗaa ton yeeso am na?»

¹⁰ Pol wi'i: «Aawo, hiitorde laamiiɗo Roma gonumi, ɗo kaanumi hiitaneego. Mi woofanay Yahuduuɓe hande no an e hoore maa annirɗaa ɗum e gooŋa.

¹¹ To tawii min woodi gacce, to mi waɗii ko foti maayde, mi salataako wareego. Amma ko ɓe gaccortoo am to gooŋa bane, goɗɗo waawataa ko watti am e juuɗe maɓɓe. To laamiiɗo Roma nun sariya am yaaretee.»

¹² Den no Festus baddi e himɓe muuɗum, o toontii, o wi'i: «To laamiiɗo Roma jiɗuɗaa sariya maa yaaree, a yahan to lammiiɗo Roma!»

Pol yeeso Agirippa e Berenisi

¹³ Ɓaawo balɗe seɗɗa Agirippa , laamiiɗo, e Berenisi wari Kaysariya hiinnugo Festus.

¹⁴ No ɓe gaɗata ton balɗe, Festus bati laamiiɗo on haala Pol, wi'i: «Gorko gom na'on ɗo mo Felikus maɓɓi e kasu.

¹⁵ No jahumi *Urusaliima, hooreeɓe *Limaamiiɓe e *dottiiɓe *Yahuduuɓe batii am haala makko, eelimmi mi hiitanoo ɓe mo o waree.

¹⁶ Toontiimi ɓe: ‟Romankeeɓe woowaa hiitaago neɗɗo tawee o jooɗodaaki e gaccotooɓe mo, o bata ka makko.”

¹⁷ No ɓe garii ɗo, mi ɓooyinay ka. Fini mum jooɗiimi faadaare, ƴamumi gorko on waddee.

¹⁸ Gaccotooɓe mo no ummii bati ɓe gadday gacce ɗe miilunoomi.

¹⁹ Ɓe jeddontiran nun e makko dow haalaaji diina maɓɓe, e dow goɗɗo bi'eteeɗo Yeesu, maayuɗo, mo Pol wi'ata e wuuri.

²⁰ Min bo mi heɓay no biɗitortoomi haala ka, go ƴamu moo mi to o noototo hiitaneego Urusaliima.

²¹ Amma o ƴamu nun haala makko wattee e juuɗe Kaysara laamiiɗo, kan waɗi bi'umi o reenee der kasu faa to mi heɓii lildugo mo to Kaysara.»

²² Agirippa wi'i Festus: «Mii yiɗi hettinanaago gorko on, min e hoore am.» Festus wi'i: «A hettinanto mo jaaŋo.»

²³ Fini mum Agirippa e Berenisi wari e tedduŋal manŋal, naati der faadaare, kamɓe e hooreeɓe soogeeji e mawɓe siire. Festus hokki laawol Pol waddee.

²⁴ Festus wi'i: «An Agirippa laamiiɗo e kawtal mooɗon, onon jooɗiiɓe! On ji'ii gorko oo ɗo. *Yahuduuɓe fu nun gaccotoo mo diga *Urusaliima faa ɗo, ɓee boola, ɓee bi'a haanaa oo wuuri.

²⁵ Min e hoore am, tawumi o waɗay goɗɗum ko foti warugo mo. Amma kanko e hoore makko o ƴamii haala makko yaaree to Kaysara laamiiɗo, mi resii lildugo mo to Kaysara.

²⁶ Mi annaa deydey ko binnanammi Kaysara dow makko. Kan waɗi darin moo mi yeeso mooɗon, yeeso maaɗa du an Agirippa laamiiɗo, gam to haala makko daaraama mi heɓa ka binnumi.

²⁷ Gam ɗum foonnitanaaki am lildugo nanŋaaɗo den mi hollay laamiiɗo ko o nanŋanaa.»