Golle Lilaaɓe 24 - Bible Fulfulde Bénin New Testament

Pol yeeso Felikus

¹ Balɗe joy ɓaawo muuɗum, Ananiyas, hooreejo *Limaamiiɓe, yottii Kaysariya e dottiiɓe woɓɓe, kanko e kiitotooɗo annuɗo sariya Romankeeɓe bi'eteeɗo Tertullus. Ɓee kolla laamiiɗo gacce Pol.

² No Pol noddaa, Tertullus yanti takkugo mo gacce e wi'a: «An Felikus, gomnaajo tedduɗo, laamaare maa waddanii men jam mawɗo, jiiki maaɗa waylitii lenyol men sanne.

³ Ɗum fu gam maa men keɓiri ɗum, toy fu e wakkati fu men jaɓii ɗum, men jettii maa bo sanne.

⁴ Mi yiɗaa mi jogitee puy, amma mii eelee gam moƴƴere maa, kettinanoɗaa men seɗɗa.

⁵ Men ji'ii gorko oo kalluɗo nun sanne, oo wadda fitina hakkune *Yahuduuɓe wonɓe e duuniyaaru nuu fu. O laati nun hooreejo diina Nasaratuuɓe.

⁶ O daartii du soɓingo suudu Alla, ɗon nun men nanŋi mo. [Men jiɗi hiitaago mo e sariya amen,

⁷ amma Lisiyas hooreejo soogeeji teeti mo e juuɗe amen e semme,

⁸ go o wi'i gaccotooɓe mo wara yeeso maa.] An e hoore maa, ƴamu mo, a faaman ko men gaccortoo mo fu gooŋa nun.»

⁹ *Yahuduuɓe e tabbitina ka, e wi'a nunnun ɗum laatii.

Pol e jaaboo ka mum yeeso Felikus

¹⁰ No gomnaajo hokki Pol haala, o toontii o wi'i: «Mii anni waɗii duuɓi aa hiitanoo lenyol ŋol. Gam majjum e hoolaare mawne batiranmi mi teetira hoore am.

¹¹ Ɓuraa balɗe sappo e ɗiɗi ko garmi* Urusaliima mi sujidana Alla. To a ƴamii, a tawan nun ɗum laati.

¹² Ɓe taway am mii yeddontira e goɗɗo naa bo mii ummina jama'aare der suudu Alla, naa der baajorɗe, naa bo nokkuure gom der siire.

¹³ Ɓe baawataa ko tabbitini ko ɓe gaccortoo am jooni.

¹⁴ Amma, mi nootake yeeso maa mii sujidana Alla baabiraaɓe amen der laawol ŋol ɓe bi'ata diina fewreha. Mii goonɗini ko winnaa der sariya fu e ko winnaa der dewte annabiiɓe fu.

¹⁵ Mii hoolii Alla mo ɓe kooli kamɓe bo, fintinan foonnitiiɓe e ɓe foonnitaaki fu diga maayɓe.

¹⁶ Kan waɗi mii tinnii heɓa mii woodi ɓerne laaɓune nyalaane fu yeeso Alla e yeeso himɓe.

¹⁷ Ɓaawo duuɓi ɗuuɗɗi gartumi gam mi waddana himɓe am dokkal, mi waɗa sadakaaji.

¹⁸ Der majjum ɓe tawimmi der suudu Alla ɓaawo mi senaama, mi naatay e jama'aare, mi naatay e woolo.

¹⁹ Amma *Yahuduuɓe ɓe leydi Asiya wonnooɓe ɗon, kamɓe haanunoo wara gaccoo am yeeso maa, to ɓee goodi ko ɓe gaccortoo am.

²⁰ Naa bo ɓe bata gacce ɗe gaɗumi no dariimi yeeso *dawrooɓe,

²¹ to hinaa haala goota ka haalumi e daane towne no dariimi caka maɓɓe, bi'umi: “Gam pintol maayɓe kiitotoɗon am hanne!”»

²² Tawii Felikus e annuno e laaɓuɗum haala laawol goonɗinɓe, kan waɗi o bati ɓe o wi'i: «To Lisiyas hooreejo konu warii, mi daaran haala mon.»

²³ O hokki laawol mawɗo soogeeji reena Pol, o hoynana mo, to o haɗu himɓe makko wara nafa mo.

Pol yeeso Felikus e Durusiila

²⁴ Ɓaawo balɗe seɗɗa Felikus waridi e debbo muuɗum *Yahuduujo bi'eteeɗo Durusilla. O lili Pol waddee, o hettinanii mo oo batana haala goonɗinki dow Yeesu *Almasiihu.

²⁵ Amma no Pol yanti e batana haala foonnitaare e nantaare, e haala kiita garoowa, Felikus huli, wi'i: Yawtu taw! To mi heɓii jayri fu mi nodditinte.

²⁶ O miilii Pol hokkan mo ceede. Kan waɗi oo nodda ɗum oo nodditoo, ɓe badda.

²⁷ Ɓaawo duuɓi ɗiɗi, Porkiyus Festus wattiri Felikus, o laamii. Felikus e yiɗuno waɗugo ko waddanta ɗum moƴƴere *Yahuduuɓe, acci Pol der kasu.