Golle Lilaaɓe 23 - Bible Fulfulde Bénin New Testament

¹ Pol daari *dawrooɓe ɓen, wi'i: «Banniraaɓe, e ɓerne laaɓune nun tokkirmi Alla faa yottaago hanne.»

² Hooreejo *Limaamiiɓe, bi'eteeɗo Ananiyas hokki dariiɓe takkol Pol laawol ɓe piya mo e hunnuko.

³ Den, Pol wi'i mo: «Alla fiyete, an bombooru rawninaaŋol! Aa jooɗii gam kiitanoɗaa am e tawreeta Muusa go aa ƴartoo sariya kan, aa wi'a mi fiyee!»

⁴ Darinooɓe ɗon wi'i: «Hooreejo *Limaamiiɓe Alla nun jennataa?»

⁵ Pol toontii, wi'i: «Banniraaɓe, mi annaa hooreejo Limaamiiɓe nun, gam mii anni e winnaa: “Taa huna hooreejo lenyol maa !”»

⁶ Pol e annunoo woɓɓe e *dawrooɓe laati nun *Sadukiiɓe, woɓɓe bo *Farisaaɓe, o bati e semme, o wi'i: Banniraaɓe, min mi Farisaajo nun, ɓii Farisaajo. Gam mii woodi tammuwe dow pintol maayɓe waɗi ko mii hiitanee.

⁷ No o bati ka, Farisaaɓe e Sadukiiɓe nanŋontiri jeddi, kawtal ŋal seenniri ɗiɗi.

⁸ Gam Sadukiiɓe e wi'a pintol walaa, malaykaaɓe walaa, ruuhuuji walaa, amma Farisaaɓe e goonɗini ɗum ɗum fu.

⁹ Woolo manŋo ummii darii. *Moodiɓɓe tawreeta woɓɓe der waalde Farisaaɓe ummii e yeddontira e semme, e wi'a: Walaa fu ko boni ko men ji'i e gorko oo. Waɗoto ruuhu nun naa bo malaykaajo baddi mo!

¹⁰ Jeddi ɗii mawni puy faa hooreejo soogeeji huli to Pol serkitee. Kan waɗi o hokki laawol soogeeji wara der hawriine nen, teeta Pol e juuɗe himɓe, hoora mo wuro maɓɓe.

¹¹ Jemma muuɗum, Joomiraawo darii yeeso Pol, wi'i mo: Taa hulu! No ceedanoriɗaa am der *Urusaliima, nunnun bo ceedanortoɗaa am der Roma.»

Dawriine Yahuduuɓe gam ɓe bara Pol

¹² No weeti, *Yahuduuɓe baddi e cuuɗiiɗum, hunii nyaamataa, jarataa sey to ɓe barii Pol.

¹³ Badduɓe ka ɓuran worɓe lasoy ɗiɗo.

¹⁴ Ɓe jahi to hooreeɓe *Limaamiiɓe e *dottiiɓe, ɓe bi'i: «Men kunake men mettataa goɗɗum sey to men barii Pol.

¹⁵ Jooni, onon e *dawrooɓe, bi'ee hooreejo soogeeji waddana on Pol, bi'on mo on jiɗu nun daaritaago haala makko. Menen emen ciriyii warugo mo diga o yottaaki.»

¹⁶ Baaɗiraawo Pol nani haala pitti ɗe o falantee, yahi wuro soogeeji, naati, bati ka Pol.

¹⁷ Pol noddi gooto der mawɓe soogeeji, wi'i mo: «Yaaru suka gorko oo ɗo to hooreejo, gam oo woodi ka o yiɗi batugo.»

¹⁸ Mawɗo soogeeji yaari mo to hooreejo, wi'i mo: «Nanŋaaɗo bi'eteeɗo Pol noddimmi, ƴamimmi mi wadda gojankeejo oo ɗo to maa, gam oo woodi ka o yiɗi batugo maa.»

¹⁹ Hooreejo nanŋi junŋo makko, yaari mo sera, wi'i: Kaye gooduɗaa bataa am?»

²⁰ O wi'i mo: *Yahuduuɓe baddi, gam waɗa gaddanaa ɓe Pol jaaŋo yeeso *dawrooɓe, ɓe gaɗa hande ɓe jiɗu nun daaritaago haala makko.

²¹ Taa nootana ɓe! Gam ko ɓuri worɓe lasoy ɗiɗo na'on fukkanii mo laawol, ɓe kunii ɓe nyaamataa, ɓe jarataa to ɓe baray mo. Ɓe na'on siriyii, an ɓe kettinanii.»

²² Hooreejo wi'i suka gorko on: «Taa batu goɗɗo naa a wujjanii am ka.» Den o acci mo o yawti.

Pol lildaama to Felikus

²³ Den o noddi mawɓe soogeeji makko ɗiɗo, o wi'i ɓe: Kawritee soogeeji keme ɗiɗo e waɗɗiiɓe pucci lasoy tato e sappo, e jogiiɓe labbe keme ɗiɗo. On fu, ciriyee jahon Kaysariya janɗe jeenay jemma.

²⁴ Kirkinee pucci, jaaron Pol jam to Felikus, gomnaajo.

²⁵ Hooreejo winnii ɗerewol, o wi'i:

²⁶ Min, Kalawdiyus Lisiyas, mii sannee, an Felikus, gomnaajo tedduɗo.

²⁷ Gorko mo lildu maa mi oo, *Yahuduuɓe nanŋi mo, yiɗi warugo mo. No nanumi o Romankeejo nun, jaadumi e soogeeji, teetu moo mi.

²⁸ No jiɗumi faamugo ko ɓe gaccantoo mo, gaddumoomi yeeso *dawrooɓe maɓɓe.

²⁹ Tawumi dow jeddi sariya maɓɓe tan ɓe gaccotoo mo, amma ko o gaccaa e muuɗum, waawataa ko waddani mo wareego naa bo maɓɓeego.

³⁰ Ɓaawo mum, gattanaami der nowru no Yahuduuɓe dawrii wara mo. Kan waɗi ko lildu maa mi mo law, bi'umi gaccotooɓe mo yaha to maa.

³¹ Soogeeji waɗi ko wi'aa, hocci Pol jemma, yaari mo siire Antipateris.

³² Fini mum, soogeeji jahirannooɗi e koyɗe wittii wuro, acci waɗɗiiɓe pucci yottinaa Pol.

³³ No ɓe jottii Kaysariya, ɓe kokki gomnaajo ɗerewol, ɓe kolli mo Pol.

³⁴ No gomnaajo janŋi ɗerewol, ƴami toy o jeyaa. No o nani Silisiya Pol jeyaa,

³⁵ o wi'i mo: «To gaccotooɓe maa warii, mi nanan haala maa.» O wi'i o reenee der laamorde *Eroodu.