Golle Lilaaɓe 22 - Bible Fulfulde Bénin New Testament

¹ «Banniraaɓe, e baabiraaɓe, kettinee ka batanmi on mi teetira hoore am.»

² No ɓe nani oo badda ɓe e Iburaninkeere, ɓe jeewi so. O wi'i:

³ «Mi *Yahuduujo nun, mi dimaaɗo Tarsus der leydi Silisiya. Amma der siire *Urusaliima ɗo nun mawnumi. Gamaliyel janŋinimmi sariya kaakiraaɓe meeɗen faa laaɓi. Mii wooduno tinnaare gam Alla hande no on fu laatiɗon hanne.

⁴ Mi toorii tokkuɓe Laawol ŋol ɗo, faa woɓɓe maayi. Mi nanŋii worɓe e rewɓe, maɓɓumi ɓe e kasu.

⁵ Hooreejo *Limaamiiɓe e *dottiiɓe Yahuduuɓe fu e seedanoo am ɗum. Diga e maɓɓe keɓumi ɗereeji ɗi ɓe binnani banniraaɓe wonɓe Damas, go jahumi, mi haɓɓaa wonɓe ton, mi wadda ɓe Urusaliima gam ɓe kiitee.»

Pol e bata no tuubiri

⁶ «No jahanmi faa paaniimi Damas, caka nyalooma, ɗon nun jayŋol manŋol ƴiwi dow kammu, yaayni, filtitii am.

⁷ Den janumi e leydi, go nanumi daane gom e wi'ammi: “Sol, Sol, ko waɗi aa toorammi?”

⁸ Toontiimi, bi'umi: “An nun moy Joomiraawo?” O wi'immi: “Min woni, Yeesu Nasaratuujo mo toorataa.”

⁹ Wonduɓe e am yi'ii jayŋol, amma ɓe paamay daane baddanɗo am .

¹⁰ Den, bi'umi: “Joomiraawo, ko gaɗanmi?” Joomiraawo wi'immi: “Umma, yahu Damas, ton nun bateteɗaa ko desanaɗaa gaɗaa fu.”

¹¹ Semme jayŋol acci mi yi'ay, wonduɓe e am nun jogii am e junŋo faa Damas.

¹² Gorko gom bi'eteeɗo Ananiyas, gorko kulɗo Alla, tokkuɗo tawreeta Muusa, mo *Yahuduuɓe Damas fu batanta geeta,

¹³ wari, darii yeeso am, wi'immi: “Sol, banniraawo, wuntu!” Ɗon maa ɗon bumtumi, daaru moo mi.

¹⁴ O wi'i: “Alla kaakiraaɓe meeɗen suɓi maa gam annaa ko o yiɗi, ji'aa Poonnitiiɗo, nanaa haala makko.

¹⁵ Gam an seedantoo mo yeeso himɓe fu ko ji'uɗaa e ko nanuɗaa.

¹⁶ Jooni, ko keɗiɗaa? Umma, gaɗaneɗaa *batisi, laaɓineɗaa diga hakkeeji maa diga e noddugo inne Joomiraawo .”

¹⁷ No bittumi *Urusaliima, mii du'oo der suudu Alla, Alla hollimmi ko haaynii,

¹⁸ ji'umi Joomiraawo, o wi'immi: Yawɗa, wurta law Urusaliima, gam ɓe jaɓataa seedaaku mo ceedantoɗaa am.

¹⁹ Bi'umi: Joomiraawo, ɓee anni mii maɓɓannoo, mii fiyannoɗo bo goonɗinɓe maa der baajorɗe fu.

²⁰ Ko Etiyen, ceedantooɗo maa waretenoo, mi na'onno ɗon, e welimmi bo, min reenunoo gineeji waruɓe mo.”

²¹ O wi'immi: ‟Yahu, mi lilee to woɗɗi, to ɓe lenyi janani.”»

²² Ɓe kettinanii mo faa o yottii dow haala kaa ɗon. Den ɓe bati dow dow, ɓe bi'i: «Kalkee iri neɗɗo oo ɗo! Haanay o wuura!»

²³ Ɓee kuuɓa, ɓee paɗɗa kaddule maɓɓe dow, ɓee ummina sollaaje dow.

²⁴ Gam majjum hooreejo soogeeji hokki laawol Pol yaaree der suudu, o fiyee faa o bata gooŋa, gam ɓe anna ko waɗi jama'aare e huuɓa mo nunnun.

²⁵ No ɓe kaɓɓi mo ɓee piya mo, o wi'i mawɗo gonɗo ɗon: «Oon goodi laawol piyon Romankeejo tawe o hiitaaka na?»

²⁶ No mawɗo on nani ka, batoy hooreejo konu, wi'i: «Aa anni ko gaɗataa ɗon? Gorko on Romankeejo nun!»

²⁷ Den hooreejo konu yahi to Pol, ƴami mo, wi'i: «Batam, a Romankeejo nun e gooŋa na?» O toontii, o wi'i: «Ee, nunnun.»

²⁸ Hooreejo on wi'i: «Min, ceede ɗuuɗɗe joɓumi go keɓumi romankaaku.» Pol wi'i mo: «Min, nun nun dimiraami.»

²⁹ Ɗon maa ɗon yiɗunooɓe fiyugo mo, wurti. Hooreejo huli, gam o nanii Pol laati nun Romankeejo, o haɓɓiino ɗum bo.

Pol e yeeso dottiiɓe Yahuduuɓe

³⁰ Fini mum, no o yiɗunoo annugo deydey ko *Yahuduuɓe gaccantoo Pol, o firti mo, o noddini hooreeɓe *Limaamiiɓe e *dawrooɓe fu, ɓe kawritoo. Den o waddi Pol, o darni ɗum yeeso maɓɓe.