Golle Lilaaɓe 20 - Bible Fulfulde Bénin New Testament

Pol der leydi Maseduwaan e leydi Yunaniya

¹ No fitina kan deƴƴi, Pol hawriti goonɗinɓe, semmiɗini ɓe. Ɓaawo mum, o waynii ɓe, o dilli Maseduwaan.

² O falti e leydi nin, oo semmiɗina goonɗinɓe e haalaaji ɗuuɗɗi. Ɓaawo mum o yottoy Yunaniya.

³ O waɗi ton lebbi tati. Wakkati o yiɗi naatugo laana diyam o yaha Siriya, den *Yahuduuɓe dawri ɓe jammoo mo ɓe bara, go o resi o wittira laawol Maseduwaan.

⁴ Ɗottuɓe mo nani: Sopater, ɓii Pirrus Bereyankeejo, Aristarkus e Sekundus Tesalonikiiɓe, Gayus Derbenkeejo, Timote, e Tikikus e Torofimus Asiyankeeɓe.

⁵ Ɓe ardii men, ɓe keɗoyii men Torowas.

⁶ Menen, men naati laana diga Filippi ɓaawo juulɗe peen ko ƴuufinaaka . Ɓaawo balɗe joy men tawoy ɓe Torowas, men gaɗi ton balɗe jeeɗiɗi.

Pol fintinii Ewtikus der Torowas

⁷ Nyaanne alal, tawii emen kawritii gam men nyaama kirtaari, Pol e waajoo himɓe, gam oo yiɗi yawtugo fini mum. O tokki oo waajoo faa caka jemma.

⁸ Fitillaaji ɗuuɗɗi e wonnoo der suudu dowrowol ŋol men kawriti e muuɗum.

⁹ No Pol juutinta waaju muuɗum, ko oo ŋoŋa. No o ɗaani ɗoyŋol lugguŋol, O ɗaggitoy diga dow suudu tataɓol. No ɓe etti mo, ɓe tawi o maayii.

¹⁰ Amma Pol jippii, takkii mo, etti mo e juuɗe muuɗum, wi'i: «To on bullee! Yonki makko na'on!»

¹¹ Den o eencitii, o ŋappiti peen, o ƴakki. Ɓaawo mum, o tokki haala makko faa fajiri den o yawti.

¹² Suka gojankeejo on hooraa e wuuri. Ɗum laatanii ɓe belɗum ɓerne ko mawni.

Yaadu Pol diga Torowas faa Miletus

¹³ Menen, men ardii, men naati laana diyam men jahi Assos. Ɗon nun men koccata Pol, gam o yiɗiino yahirgo ton e koyɗe.

¹⁴ No o hewtoy men Assos, men naanni mo, men poonnanii Mitilene.

¹⁵ Men ummii diga ɗon e laana, men jottoyii fini mum yeeso dunne Kiyos. Finti mum men jottii Samos, balɗe mum tatawre men jottii Miletus.

¹⁶ Gam Pol haɓɓii niiya yawtugo Efesu, gam o yiɗaa neeɓugo e leydi Asiya, oo haaɓi yottaago *Urusaliima nyaanne Pantekosta, to ɗum waɗoto.

Pol e badda e dottiiɓe eklesiya Efesu

¹⁷ No Pol wonnoo Miletus, o noddini *dottiiɓe eklesiya Efesu.

¹⁸ No ɓe gari, o wi'i ɓe: «Oon anni no gontirmi e mooɗon diga nyalaane koyŋal am arti naatugo e leydi Asiya faa hanne.

¹⁹ Mi gollanake Joomiraawo e leesingo hoore e gonɗi ɗuuɗɗi, caka tooraaji e jammaaji bonɗi ɗi *Yahuduuɓe soomaanimmi.

²⁰ Oon anni no baajotoomi on, mi suuɗay on huune fu ko nafata on, mi janŋinii on hakkune himɓe, e der wurooji mooɗon.

²¹ Mi seedinii Yahuduuɓe e ɓe lenyi janani fu, ɓe tuubana Alla, ɓe goonɗina Joomiraawo meeɗen Yeesu Almasiihu.

²² Nani *Ruuhu Ceniiɗo e doolammi, go mii yaha *Urusaliima hande no Ruuhu Ceniiɗo wi'immi, mi annaa ko heɓatammi ton,

²³ huune gootum tan annumi: Ruuhu Ceniiɗo e laaɓinanammi der ci'e fu e wi'a callalluuji e tooraaji e heɗii am.

²⁴ Amma mi daaray yonki am hande kii laatanii am tedduki, mi heɓa ni yottinoygo e welwelo golle ɗe Yeesu Joomiraawo halfinimmi, kanje woni waajaago *linjiila ka moƴƴere Alla.

²⁵ Jooni, mii anni on on fu, on ji'ataa am kade, onon ɓe gondunoomi e mum mii waajoo on haala *Laamaare Alla.

²⁶ Kan waɗi mii seedina on hanne: To goɗɗo mooɗon halkii, gacce am bane.

²⁷ Gam mi waajake on anniyaaji Alla fu, mi suuɗay on goɗɗum.

²⁸ Kakkilanee ko'e mooɗon, kakkilonon hoggo ŋo *Ruuhu Ceniiɗo yowani on, laatoɗon durooɓe eklesiya Alla ŋa o heɓiri e ƴiiƴam makko .

²⁹ Mii anni ɓaawo am caafaali bonɗi naatan hakkune mooɗon, ɗi accataa hoggo.

³⁰ Diga der mooɗon nun woɓɓe ummoto e bata haalaaji fewreeji gam fooɗa goonɗinɓe, tokka ɓaawo mum.

³¹ Gam majjum, kakkilanee ko'e mooɗon, ciwtoron, ɗum waɗii duuɓi tati, jemma e nyalooma, mi accay seedingo moy mooɗon fu e gonɗi.

³² «Jooni, mi halfinii on e juuɗe Alla, mi halfinii on e der haala moƴƴere makko baawoowa mawningo on, hokka on geɗu, caka cuɓaaɓe makko fu.

³³ Daɗey mi suunaaka ceede goɗɗo naa bo kanŋeeri mum naa bo gineeji mum.

³⁴ Onon e ko'e mooɗon, oon anni juuɗe am ɗee ɗo nyaannirmi hoore am e goondaaɓe am.

³⁵ Mi hollii on der huune fu e haani golloɗon no wooɗi gam keɓon balliton tampuɓe. Ciwtoron haala Yeesu Joomiraawo ka o bati e hoore makko, o wi'i: “Hokkugo e ɓuri barke dow jaɓugo”.»

³⁶ No Pol batidi kaa ɗon fu, o diccii o du'odii e maɓɓe.

³⁷ Ɓe fu ɓe bulli bojji mawɗi, ɓe jogii daane Pol, ɓe mammilii mo.

³⁸ Ko ɓuri biisugo ɓerɗe maɓɓe nun gam o wi'i ɓe ji'ataa mo kade. Ɓaawo mum ɓe ɗotti mo faa to laana diyam.