Golle Lilaaɓe 2 - Bible Fulfulde Bénin New Testament

Garki Ruuhu Ceniiɗo

¹ No juulɗe bi'eteeɗe Pantekosta yottii, goonɗinɓe fu hawritii nokkuure woore.

² Ɗon maa ɗon rimmo nanduŋo hande hennu mawkol ƴiwi dow kammu, hebbi suudu to ɓe jooɗii ɗon fu.

³ Den goɗɗum ko wa'i hande ɗelle yiite suppitanii ɓe, ɗe ceennii, ɗe jowii e moy maɓɓe fu.

⁴ Ɓe fu ɓe keewi *Ruuhu Ceniiɗo, ɓe puɗɗi batugo batuuji feere feereeji hande no Ruuhu hokkiri ɓe ɓe batira.

⁵ Foti den, *Yahuduuɓe hulɓe Alla, ƴiwoyno leyɗe fu, wari Urusaliima.

⁶ No iido waɗata, jama'aare fu hawritii, ko ɓe jiɓii, gam moy fu nanii ɗenŋal mum e batee.

⁷ Ɓe fu ɓe jiɓii, haaynaare waɗi ɓe, ɓe bi'ontiri: «Batooɓe ɗo fu, hinaa ɓe Galilinkeeɓe bane?

⁸ Noy nanirten eɓe bata batu moy meeɗen fu?

⁹ Een Partiyankeeɓe e Mediyankeeɓe e Elamiyankeeɓe, en jooɗiiɓe Mesopotamiya e Yahudiya e Kapadosiya, Pontus e Asiya,

¹⁰ Firigiya e Panfiliya, Misira e weccoore Sirene der leydi Libiya. Woɓɓe meeɗen ƴiwii Roma,

¹¹ Yahuduuɓe e tuubuɓe naati diina Yahuduuɓe. Woɓɓe kade ƴiwii Kereta e Arabiya, en fu een nana bo eɓe bata e batu meeɗen haala golle mawɗe ɗe Alla waɗi!»

¹² Ɓe fu ɓe jiɓii sanne, ɓe ƴamontiri: «Ume ɗum ɗon fillitii?»

¹³ Woɓɓe e jaanca goonɗinɓe, e wi'a: «Ɓe jaru nun bagi!»

Waaju Piyer

¹⁴ Piyer darii caka lilaaɓe sappo e go'o horiiɓe, bati e daane towne, wi'i jama'aare: «Onon *Yahuduuɓe tawaaɓe *Urusaliima fu, kettinee nanee haala am gam paamon ko waɗata.

¹⁵ Himɓe ɓee ɗo buusay hande no miiloton, gam yanne jeenay subaka tawaɗen taw.

¹⁶ Kanka nun annabi Yoo'el bati:

¹⁷ ‟Alla wi'i: Der nyalaaɗe cakitiiɗe mi waanjan Ruuhu am dow himɓe fu. Ɓiɓɓe mooɗon worɓe e rewɓe waɗan annabaaku gojankeeɓe mooɗon yi'an jiiki. Nayeeɓe mooɗon hoyɗan,

¹⁸ e gooŋa, mi waanjan *Ruuhu am dow maccuɓe am, worɓe e rewɓe der nyalaaɗe ɗen, ɓe gaɗan annabaaku

¹⁹ Mi waɗan haaynaareeji dow kammu, mi waɗan maaneeji dow leydi, Ƴiiƴam e yiite e cucculle wanŋan.

²⁰ Hakko nyalaane Joomiraawo mawne teddune warata, naaŋe niɓɓan, lewru wojjan.

²¹ Den neɗɗo fu nodduɗo inne Joomiraawo hisan ”.»

²² Onon Isira'iilaaɓe, kettinee haalaaji am ɗii: Yeesu mo Nasaratu laati nun mo Alla yerdii, kan waɗi o hokki mo baawɗe waɗugo haaynaareeji e kaayeefiiji caka mooɗon, hande no onon e ko'e mooɗon annirɗon ɗum.

²³ Neɗɗo on, mo jowanaɗon juuɗe, nunnun Alla resirnoo ɗum e annal mum manŋal, ko accuɗon heeferɓe tiggi mo e palaaŋal, baruɗon mo.

²⁴ Amma Alla fintinii mo, firti mo diga ɓoggi maayde, gam waɗataako maayde waawa ko jogii mo der baawɗe mum.

²⁵ Nani bo Dawda batii haala makko, wi'i: ‟Mii yi'a Joomiraawo wakkati fu yeeso am, oo woni nyaamo am, heɓa to mi dimmoo.

²⁶ Kan waɗi ɓerne am weli, mii bata e welwelo, ɓannu am bo siwtoto e hoolaare,

²⁷ gam a accataa yonki am der joonne maayɓe, a accataa Ceniiɗo maa nyola.

²⁸ A hollii am laabi gurnam, a welniran ɓerne am e wondugo maa e am ”.»

²⁹ Onon banniraaɓe, accee mi bata on laaɓuka: «Kaaka meeɗen Dawda maayii, o uwaama, saabeere makko na'on hakkune meeɗen faa hanne.

³⁰ O laatino nun Annabiijo, oo anni Alla haɓɓanii mo alkawal, hunii gooto e taaniraaɓe makko, burtiiɗo e makko, jooɗoto e gurol laamaare makko .

³¹ O artii o yi'i pintol *Almasiihu, kanŋol o batani o wi'i yonki makko accataake der joonne maayɓe, ɓannu makko nyolaataa.

³² Yeesu on, Alla fintinii ɗum, men fu men ceedake ɗum bo.

³³ Nyaamo Alla ettii mo, teddinii mo, o heɓii e *Baaba *Ruuhu Ceniiɗo hande no alkawal mum haɓɓirano, o waanji mo e meeɗen. Jooni oon ji'a ɗum, oon nana ɗum.

³⁴ Nani bo Dawda meeɗay ko eenci dow kammu, amma o wi'ii: ‟Joomiraawo bati Joomam wi'i: jooɗa nyaamo am,

³⁵ faa mi waɗa jowaa koyɗe maa dow wayɓe maa ”.

³⁶ Gam majjum, sey himɓe Isira'iila fu anna laaɓina, Yeesu mo tigguɗon dow palaaŋal, Alla waɗii mo Joomiraawo e *Almasiihu.»

³⁷ No ɓe nani ka, ɓerɗe maɓɓe taƴi, ɓe ƴami Piyer e lilaaɓe horiiɓe, ɓe bi'i: «Banniraaɓe, noy men gaɗata?»

³⁸ Piyer toontii ɓe, wi'i: «Tuubee, moy mooɗon fu waɗanee *batisi e inne Yeesu *Almasiihu, gam keɓon yaafuye hakkeeji mon, den on keɓan dokkal Alla, kanŋal woni *Ruuhu Ceniiɗo.

³⁹ Gam alkawal Alla e laatanii on, onon e ɓiɓɓe mooɗon e woɗɗuɓe fu, ɓe Alla Joomiraawo men noddoyta, no ɓe ɗuuɗiri fu.»

⁴⁰ E haalaaji goɗɗi ɗuuɗɗi kade, o seedini ɓe, o eeli ɓe o eelitii, o wi'i: «Ceennee ko'e mon e himɓe oonyiiɓe gam kison.»

⁴¹ Jaɓuɓe haala makko waɗanaa *batisi. Nyalaane nee ɗon, himɓe ujune tato ɓeydaa e maɓɓe.

⁴² Ɓe kaɓɓi anniya nanugo janŋinol lilaaɓe janŋinta ɓe, ɓe kawti, ɓe laatii gootum, eɓe ceenna peen eɓe gaɗa du'aaje .

Joonne hakkune goonɗinɓe

⁴³ Kulol nanŋi moy fu gam haaynaareeji e kaayeefiiji ɗuuɗɗi ɗi lilaaɓe waɗanno.

⁴⁴ Goonɗinɓe ɓen fu waɗi hunnuko wooto, ɓe kawti ko ɓe goodi fu.

⁴⁵ Ɓee cootta jawdi maɓɓe e ko ɓe goodi fu, ɓe kokki moy fu jaka ko haajaa.

⁴⁶ Nyalaane fu eɓe kaɓɓi anniya, eɓe kawritoo der suudu Alla, ɓe gaɗi hunnuko wooto, eɓe ceenna peen, eɓe nyaamda der cuuɗi maɓɓe e belɗum ɓerne, munaafitaare walaa.

⁴⁷ Eɓe maanta Alla, ko himɓe fu yiɗi ɓe. Nyalaane fu Joomiraawo e ɓeydana eklesiya hisuɓe.