Golle Lilaaɓe 18 - Bible Fulfulde Bénin New Testament

Pol der siire bi'eteene Korintu

¹ Ɓaawo mum, Pol ummii Ateena, yottii Korintu.

² O tawi ton *Yahuduujo bi'eteeɗo Akilas, neɗɗo leydi bi'eteeni Pontus. Ɓooyay gorko on e debbo muuɗum Pirisilla ƴiwi Itali, gam Kalawdiyus laamiiɗo resiino Yahuduuɓe fu wurto Roma . Pol yahi to maɓɓe.

³ O jooɗi to maɓɓe ɓee gollida, gam o laati nun gaɗoowo jinkaaji ɗi gude hande maɓɓe.

⁴ *Nyalaane siwteteene fu, Pol e yaha der *waajorde e yeddontira e Yahuduuɓe e Yunaninkeeɓe, gam ɓe goonɗina Yeesu.

⁵ No Silaasi e Timote ƴiwnoo Maseduwaan yottii Korintu, Pol wittini hakkillo muuɗum fu der waajaago, oo seedanoo *Yahuduuɓe Yeesu nun woni *Almasiihu.

⁶ Amma ɓe calii haala makko, ɓee jenna mo, go o fiɗɗi sollaare gineeji makko, o wi'i: «To on kalkii, ka am bane, ka mooɗon nun! Mii laaɓi e mooɗon. Diga jooni mi yahan to ɓe lenyi janani.»

⁷ O ƴiwi ɗon, o yahi to gorko kulɗo Alla, bi'eteeɗo Titiyus Yustus, mo wuro muuɗum takkii *waajorde.

⁸ Kirispus, hooreejo *waajorde, e getti mum goonɗini Joomiraawo. Korintuuɓe hettinaniiɓe Pol ɗuuɓɓe goonɗini, waɗanaa *batisi.

⁹ Jemmaare gom Joomiraawo wi'i Pol e koyɗool: «Taa hulu, waaja, taa jeeɗa,

¹⁰ gam mii wondi e maa. Goɗɗo waawataa ko yowi junŋo mum dow maa, hakko o waɗanee ko halli, gam himɓe am e hebbi der siire nen.»

¹¹ Pol jooɗodii e maɓɓe duuɓol e feccere, oo janŋina ɓe haala Alla.

¹² De Galliyon laatii gomna leydi Akaya, *Yahuduuɓe hawri baddi, nanŋi Pol, yaari mo hiitorde,

¹³ wi'i: «Gorko oo ɗo batan nun himɓe ɓe cujidana Alla e laawol luudontirŋol e sariya.»

¹⁴ No Pol yiɗi batugo, Galliyon wi'i *Yahuduuɓe: «To tawii boofol gom nun, naa bo kalluɗum gom o waɗi, mi hettinanto on, onon Yahuduuɓe.

¹⁵ Amma no haala dow boliiɗe e inɗe, e haala sariya mon nun, ka mooɗon nun. Mi yiɗaa laataago kiitantooɗo kujje ɗee ɗon!»

¹⁶ Den o riiwi ɓe e hiitorde.

¹⁷ Ɗon, ɓe fu ɓe nanŋi Sosteni, hooreejo *waajorde Yahuduuɓe, ɓe piyi ɗum yeeso hiitorde, amma Galliyon faalaaka.

Pol wittii Antiyokiya

¹⁸ Pol jooɗii der Korintu balɗe ɗuuɗɗe. Ɓaawo mum ɓe baynontiri e banniraaɓe o naati laana diyam, o foonnanii Siriya, kanko e Pirisilla e Akilas. Tawi o femmii hoore makko der siire bi'eteene Kenkereya gam o haɓɓiino alkawal.

¹⁹ Ɓe jottii Efesu, Pol acci ɗon Pirisilla e Akilas, kanko o naati der waajorde *Yahuduuɓe oo yeddontira e maɓɓe.

²⁰ Ɓe eeli mo o ɓooya to maɓɓe, amma o jaɓay.

²¹ No o waynotoo ɓe, o wi'i: «To Alla jaɓii, mi wittaan to mooɗon.» O naati laana diyam o dilli diga Efesu,

²² o yottii Kaysariya, o yaali *Urusaliima o sanni eklesiya. Ɓaawo mum, o yahi Antiyokiya.

²³ No o waɗi ton balɗe seɗɗa, o witti o woosoy leydi Galaatiya e leydi Firigiya, oo semmiɗina goonɗinɓe fu.

Apollos e waajoo der Efesu e Korintu

²⁴ *Yahuduujo bi'eteeɗo Apollos, dimaaɗo Aleksandiriya, yottii Efesu. Gorko baawuɗo haala nun, oo anni bo Dewte e laaɓal,

²⁵ o janŋinaama laawol Joomiraawo. Oo waajoo e belɗum ɓerne, oo janŋina deydey gooŋa dow haala Yeesu. Amma *batisi Yuhaana tan nun o anni.

²⁶ Oo waajoo e cuusal der *waajorde. No Pirisilla e Akilas hettinanii mo, ɓe jaari mo to maɓɓe, ɓe kolli mo laawol Alla faa laaɓi.

²⁷ Apollos yiɗunoo yahugo leydi Akaya go banniraaɓe tiiɗini mo, ɓe binnani goonɗinɓe tawaaɓe ton ɗerewol ɓe jaɓɓoo mo faa wooɗa. No o yottii ton, o wallii goonɗinɓe sanne e moƴƴere Alla.

²⁸ E haala semmenteha o jaalorii Yahuduuɓe yeeso himɓe fu, oo holla diga e Dewte Yeesu nun woni *Almasiihu.