Golle Lilaaɓe 14 - Bible Fulfulde Bénin New Testament

Pol e Barnabas der siire Ikoniya

¹ Der siire Ikoniya bo Pol e Barnabas naati der waajorde *Yahuduuɓe, ɓe baajii faa Yahuduuɓe e ɓe lenyi janani ɗuuɓɓe laatii goonɗinɓe.

² Amma Yahuduuɓe woɓɓe saliiɓe goonɗingo ummini ɓe lenyi janani, laawi ɓerɗe maɓɓe gam ɓe banya banniraaɓe goonɗinɓe.

³ Ɗum ɗon haɗay ɓe ɓooyugo ton. Ɓe baajake e cuusal gam hoolaare maɓɓe e woni dow Joomiraawo kokkuɗo ɓe baawɗe waɗugo haaynaareeji e kaayeefiiji diga e juuɗe maɓɓe. Nunnun o hollitiri ka ɓe baajotoo dow moƴƴere makko, gooŋa nun.

⁴ Himɓe siire nen seenniri: Woɓɓe darii ɓaawo Yahuduuɓe, woɓɓe bo daranii lilaaɓe.

⁵ Den *Yahuduuɓe e ɓe lenyi janani e ardiiɓe mum dawri toora ɓe, warira ɓe e kaaƴe.

⁶ No ɓe paami ka, ɓe doggi far Listira e Derbe, ci'e leydi Ikoniya, e ko fiiltitii ɗe,

⁷ ɓee baajoo ton *linjiila.

Pol e Barnabas der siire Listira

⁸ Gorko gom, dimdaaɗo moofaaku e jooɗii, meeɗay daraago e koyɗe mum, e wonnoo Listira.

⁹ Oo hettinii waaju Pol. Pol daari mo tititi, yi'i goonɗinki makko fotii ko nyawti mo,

¹⁰ O bati dow dow, o wi'i: «Umma, dara e koyɗe maa!» Gorko on fitti, darii, e yaha.

¹¹ No jama'aare yi'i ko Pol waɗi, ɓe bati dow e likoniyankeere, ɓe bi'i: «Saafeteeɓe nanduɓe e himɓe, jippake e meeɗen!»

¹² Ɓe innitiri Barnabas ‟Jewus”, Pol bo ‟Hermes”, gam kanko wonnoo batoowo .

¹³ Jewus mo suudu mum wonnoo ley naatirde siire, *Limaamiijo mum waddi ga'i e pinni ley dammuɗe. O yiɗuno waɗango Barnabas e Pol sadaka, kanko e jama'aare.

¹⁴ Amma no lilaaɓe ɓen nani ɗum, ɓe cerkiti gineeji maɓɓe, ɓe doggani jama'aare ɓee bata dow dow,

¹⁵ Ɓee bi'a: «Onon worɓe, gam ume go oon gaɗa ɗum ɗo? Menen bo men himɓe nun hande mooɗon. Emen baajoo on *linjiila gam tuubon, accon gaɗuuji mon baanjaaji, bittoon e Alla buuruɗo, taguɗo kammu e leydi e maayo e ko woni e muuɗum fu.

¹⁶ E jaamanuuji jawtuɗi o accii lenyi fu e tokki laabi muuɗum.

¹⁷ Amma o accay hoore makko seedaaku walaa, oo waɗa ko wooɗi, oo toɓinana on diyam diga dow. Oo hokka on dugge geete der wakkatiiji mum. Oo hokka on nyaamdu e belɗum ɓerɗe.»

¹⁸ Baa no ɓe bati kaa ɗon fu, e toora mawka nun ɓe kaɗiri jama'aare waɗango ɓe sadaka.

¹⁹ Ɓaawo mum *Yahuduuɓe woɓɓe ƴiwoy Antiyokiya e Ikoniya. Ɓe ummini hakkillooji jama'aare, ɓe paɗɗi Pol kaaƴe, ɓe daasi mo faa ɓaawo siire, gam ɓee miilii o maayi.

²⁰ Amma no goonɗinɓe wari, fiiltitii mo, o ummii, o naati der siire. Fini mum, o yaadi e Barnabas siire bi'eteene Derbe.

Wittugo Antiyokiya der leydi Siriya

²¹ Ɓe baajii der Derbe ton *linjiila, ɓe keɓi goonɗinɓe ɗuuɓɓe. Ɓaawo muuɗum ɓe bitti Listira e Ikoniya, e Antiyokiya,

²² ɓee cemmiɗina ɓerɗe goonɗinɓe, ɓe baajii ɓe ɓe daroo der goonɗinki, ɓe bi'i: «Sey e tooraaji ɗuuɗɗi naatirten *Laamaare Alla.»

²³ Eklesiya fu, ɓe cuɓanii ɗum *dottiiɓe, ɓe du'ii, ɓe cuumii, ɓe kalfini ɓe Joomiraawo mo ɓe goonɗini.

²⁴ No ɓe palti Pisidiya, ɓe jottii Panfiliya.

²⁵ Ɓe baajii der siire Perge. Ɓaawo muuɗum ɓe jottii Attaliya.

²⁶ Ton ɓe naati laana diyam, ɓe bitti Antiyokiya to ɓe kalfinaa moƴƴere Alla gam golle ɗe ɓe gayni jooni.

²⁷ No ɓe jottii, ɓe kawriti eklesiya, ɓe bati ɓe ko Alla waɗi diga e maɓɓe fu, no o maɓɓitirani ɓe lenyi janani dammugal goonɗinki.

²⁸ Ɓe gondi ton e goonɗinɓe faa ɓooyi.