Golle Lilaaɓe 13 - Bible Fulfulde Bénin New Testament

Barnabas e Sol lilaama

¹ Annabiiɓe e janŋinooɓe e wonno der eklesiya Antiyokiya. Kamɓe woni Barnabas e Simeyon innitirteeɗo ɓaleejo e Lusiyus mo Sirene e Manahen, mawnidinɗo e *Eroodu hooreejo leydi, e Sol.

² Nyalaane gom eɓe cujidana Joomiraawo eɓe cuumorii, go *Ruuhu Ceniiɗo wi'i ɓe: «Accanee am Barnabas e Sol gam golle ɗe noddanmi ɓe.»

³ Ɓaawo ɓe cuumii, ɓe du'ii, ɓe jowi juuɗe maɓɓe dow maɓɓe, ɓe acci ɓe ɓe jawti.

Barnabas e Sol e waajoo himɓe Kipurus

⁴ Nunnun *Ruuhu Ceniiɗo liliri Barnabas e Sol, ɓe jahi Selewkiya, diga ɗon ɓe naati laana diyam ɓe jahi Kipurus.

⁵ No ɓe jottii siire Salamis, ɓe baajii haala Alla der *baajorɗe Yahuduuɓe. Yuhaana-Markus, balloowo ɓe e wondi e maɓɓe.

⁶ No ɓe joli dunne ɓe jottii Pafos, ɓe tawi ton gaɗoowo dobo dobo, annabiijo pewoowo, *Yahuduujo, inne makko nun Bar-Yeesu,

⁷ O wondi e Segiyus Pol hooreejo dunne nen, neɗɗo mo annal. O noddi Barnabas e Sol gam oo yiɗi nanugo haala Alla.

⁸ Amma Elimas e daarta haɗugo laamiiɗo on goonɗingo (maana Elimas woni mo dobo dobo.)

⁹ Den Sol, bi'eteeɗo kade Pol, kebbinaaɗo *Ruuhu Ceniiɗo, tiggi mo gite,

¹⁰ wi'i: «An kebbuɗo jamma e baadi jaayni, ɓii *Seyɗan e ganyo ko wooɗi fu! A accataa lelugo laabi Joomiraawo poonnitiiɗi na?

¹¹ Jooni kiita Joomiraawo warante, a wuman, a yi'ataa naaŋe faa wakkati gom waɗa.» Ɗon maa ɗon niwre yanti mo, o wumi, oo mema nokku fu oo daarta jogotooɗo mo.

¹² No hooreejo on yi'i ko waɗi, o goonɗini, haaynaare waɗi mo e janŋinol Joomiraawo ŋol.

Waaju Pol der siire Antiyokiya der leydi Pisidiya

¹³ Pol e jaadiraaɓe muuɗum naati laana diyam der siire Pafos, e foonnii Perge der leydi Panfiliya. Ton Yuhaana acci ɓe, wittii *Urusaliima.

¹⁴ Amma kamɓe ɓe ummii diga Perge, ɓe gari Antiyokiya der leydi Pisidiya. Ɓe jahi der *waajorde, *nyalaane siwteteene, ɓe jooɗii.

¹⁵ Ɓaawo no ɓe janŋanaa der tawreeta Muusa e der dewte annabiiɓe, hooreeɓe waajorde nen lili e maɓɓe, wi'i: «Banniraaɓe, to oon goodi ka kokkirton himɓe semme, batee.»

¹⁶ Pol ummii darii, ɓanti junŋo muuɗum, wi'i: «Onon Isira'iilaaɓe e onon hulɓe Alla, kettinee.

¹⁷ Alla mo himɓe Isira'iila suɓii kaakiraaɓe meeɗen, ɗuuɗini lenyol maɓɓe no ŋol hoɗoy leydi Misira, kade o wurtiniri ɓe ton e baawɗe makko.

¹⁸ O hakkilanii ɓe faa duuɓi lasoy ɗiɗi der haro .

¹⁹ Ɓaawo o halki lenyi jeeɗiɗi der leydi Kanaana, o seennani ni himɓe makko ɓe jeya ni,

²⁰ jaka duuɓi keme naay e laasooji ɗiɗi e sappo. Ɓaawo mum, o hokki ɓe alkaaliiɓe faa jaamanu annabi Samuyila.

²¹ Ɓaawo mum, ɓe ƴami Alla hokka ɓe laamiiɗo. O hokki ɓe Sawulu, ɓii Kis, ƴiwuɗo der lenyol Benyamin. O laamanii ɓe duuɓi lasoy ɗiɗi.

²² Den Alla wurtini mo laamaare, laamini Dawda, mo o bati haala muuɗum o wi'i: ‟Mi heɓii Dawda, ɓii Yesa, gorko mo fottani ɓerne am , gaɗoowo ko jiɗumi .”

²³ E lenyol makko Alla yaarani Isira'iila Kisinoowo hande no o haɓɓunoo alkawal mum, kanko woni Yeesu.

²⁴ Go o wara, Yuhaana waajakeno lenyol Isira'iila fu tuuba, ɓe gaɗanee *batisi.

²⁵ Kade, no Yuhaana heennyata golle muuɗum, o wi'ii: “Mi laataaki mo miiloton. Amma goɗɗo e wara ɓaawo am mo mi fotay baa fittugo ɓoggi paɗe muuɗum”.»

²⁶ «Banniraaɓe, onon ɓe lenyol Iburahiima e onon bo hulɓe Alla! Enen lildaa habaru faabuwe oo ɗo.

²⁷ Gam wonɓe *Urusaliima e hooreeɓe mum fu annitay Yeesu on. No ɓe kiitii mo, ɓe tabbitini haalaaji annabiiɓe janŋetenooɗi *nyalaane siwteteene fu.

²⁸ Baa no ɓe keɓay gacce baa goote ɗe ɓe barirta mo, ɓe eeli Pilaatu wara mo.

²⁹ No ɓe kebbini ko Dewte wi'uno dow makko fu, ɓe jippini mo e *palaaŋal, ɓe gatti mo der saabeere.

³⁰ Amma Alla fintinii mo.

³¹ Balɗe ɗuuɗɗe oo holla hoore makko wardunooɓe e makko diga *Galili faa Urusaliima. Kamɓe nun woni seedantooɓe mo jooni yeeso himɓe Isira'iila.

³² Menen bo emen bata on *linjiila dow alkawal gaɗanaaŋal kaakiraaɓe meeɗen,

³³ Alla hebbinanii en ŋal, enen ɓiɓɓe maɓɓe, no o fintini Yeesu, hande no winniraa e jimol Jabuura ɗiɗaɓol: ‟An, a ɓiyam, hanne mi rimii maa ”.

³⁴ Dow haala pintol caka maayɓe gam to o nyolu, ninni nun o wi'i: ‟Mi barkiɗinan on barkaaji ceniiɗi, laaɓuɗi, koolaaɗi, ɗi alkawal mum kaɓɓanmi Dawda ”.

³⁵ Kan waɗi o wi'i e nokkuure gom: ‟A accataa Ceniiɗo maa nyola ”.

³⁶ Gam Dawda waɗii yidde Alla e jaamanu muuɗum. Ɓaawo mum o maayi, o hawraa e kaakiraaɓe makko, o nyoli.

³⁷ Amma mo Alla fintini nyolay.

³⁸ Banniraaɓe, annee gam makko nun baajaɗon yaafuye hakkeeji.

³⁹ tawreeta Muusa waaway ko waɗi neɗɗo laatoo poonnitiiɗo, amma der kawtal e makko, goonɗinɗo mo fu, laaɓinte e hakke mum.

⁴⁰ Gam majjum, gaɗee hakkillo, ko annabiiɓe batunoo e annabaaku mum to tawu on:

⁴¹ ‟Daaree onon yawiiɓe Alla, kayɗinee, majjitee! Gam mi waɗan gollal der wakkati mooɗon, gollal ŋal on goonɗintaa baa to neɗɗo batiino on ”.»

⁴² No Pol e Barnabas wurtoto e *waajorde, jama'aare eeli ɓe kade ɓe bittitoo *nyalaane siwteteene waroore, gam ɓe baajitoo haala kan.

⁴³ Ɓaawo hawriine nen, *Yahuduuɓe ɗuuɓɓe e naatuɓe diina maɓɓe tokki Pol e Barnabas. Kamɓe bo eɓe badda e maɓɓe eɓe cemmiɗina ɓe ɓe tabitoo der moƴƴere Alla.

⁴⁴ *Nyalaane siwteteene tokkune, ɓurna siire nen fu hawritii gam hettinoo haala Alla.

⁴⁵ No *Yahuduuɓe yi'i jama'aare, nawniraagu maɓɓe ummii, ɓe jeddi ka Pol waajotoo, ɓee jenna mo.

⁴⁶ Den Pol e Barnabas bati e cuusal, wi'i: «Doole men arta batugo on haala Alla, amma no boppuɗon ka, kiitiɗon ko'e mooɗon on kaananaa yonki tabitiiki, jooni men jahan to lenyi janani.

⁴⁷ Gam ɗum ɗo nun Joomiraawo resani men men gaɗa, o wi'i: ‟Mi darnii maa gam laatanoɗaa lenyi ɗii jayŋol, gam jaaraa faabuwe faa heennyitorde duuniyaaru ”.»

⁴⁸ No himɓe lenyi janani nani haalaaji ɗin, ɓerɗe maɓɓe welii, ɓe teddini haala Joomiraawo. Ɓe yonki tabitiiki resanaa fu goonɗinii.

⁴⁹ Haala Joomiraawo sankitii toy fu e leydi nin.

⁵⁰ Amma *Yahuduuɓe ummini rewɓe saafooɓe Alla, tedduɓe, e mawɓe siire. Ɓe gaddi toora mawka dow Pol e Barnabas, ɓe diiwi ɓe e leydi maɓɓe.

⁵¹ Lilaaɓe bo fiɗɗani ɓe collaaje koyɗe mum, yawtiri Ikoniya.

⁵² Goonɗinɓe Antiyokiya hebbi belɗum ɓerne e *Ruuhu Ceniiɗo.