Golle Lilaaɓe 12 - Bible Fulfulde Bénin New Testament

Toora goonɗinɓe ɓeydake

¹ Wakkati mum laamiiɗo *Eroodu fuɗɗi e toora woɓɓe caka eklesiya.

² O wari Yaakuuba, mawniraawo Yuhaana e kaafahi.

³ No o yi'i ɗum fottaani mawɓe *Yahuduuɓe, o nanŋi Piyer bo. Wakkati on fotti e juulɗe peen ko *ƴuufinaaka .

⁴ No o nanŋunoo mo, o maɓɓi mo, o waɗi ukke soogeeji naay reena mo. Ukkere baaney fu e woodi soogeeji naay. Oo wattuno ɓerne hiitaago mo yeeso himɓe to juulɗe *Paska yawtii.

⁵ Ɗon Piyer e reenaa der kasu, amma eklesiya accay eelango mo Alla.

Piyer yoofaama

⁶ No *Eroodu yiɗi hiitaago mo yeeso himɓe, jemma oo ɗaani hakkune soogeeji ɗiɗi, oo haɓɓiraa callalluuji ɗiɗi. Reenuɓe dammugal kasu bo e reeni.

⁷ Ɗon nun malaykaajo Joomiraawo wari to makko, suudu ŋol fu laaɓi, o fiyi wuttudu makko, o finnini mo, o wi'i: «Umma law!» Go callalluuji ɗin fittii e juuɗe makko.

⁸ Malaykaajo on wi'i mo: «Haɓɓu ɓelɓelol maa, faɗa paɗe maa.» Piyer waɗi nunnun. Malaykaajo wi'i mo: «Waana waanaare maa, tokkaa am.»

⁹ Piyer wurtii, tokki mo. O annaa ko malaykaajo waɗata ɗon naa gooŋa nun, e wa'ani mo hande hollitiru nun.

¹⁰ Ɓe ƴartii ukkere reenooɓe arandeere, e ɗiɗawre, ɓe jottii dammugal janni daaruŋal far siire. Ŋal maɓɓitii e hoore maggal yeeso maɓɓe, ɓe burtii, ɓe tokki laawol maɓɓe. Ɗon de woore malaykaajo acci mo.

¹¹ Hakkillo Piyer wittoy, o wi'i: «Jooni mi annitii Joomiraawo lili malaykaajo muuɗum, o faaboo am e junŋo *Eroodu e ko *Yahuduuɓe yiɗuno mi waɗanee»

¹² No o faami ɗum, o yahi wuro Mariyama, inna Yuhaana innitirteeɗo Marku, to himɓe ɗuuɓɓe hawritii e du'oo.

¹³ No Piyer tappi dammugal wuro, korɗo bi'eteeɗo Rooda wari maɓɓitingo.

¹⁴ No o anniti daane Piyer, o maɓɓitay dammugal ŋal kade sabbu no ɓerne makko weliri, o doggi o batoy ɓe Piyer nun darii e dammugal yaasi.

¹⁵ Ɓe bi'i mo: «A haaŋa nun!» Amma kanko o tabbitini no Piyer nun. Ɓe bi'i kade: «To nun, malaykaajo makko nun.»

¹⁶ Amma Piyer accay tappugo. No ɓe maɓɓiti ɓe ji'i mo, haaynaare waɗi ɓe sanne.

¹⁷ O ɓantani ɓe junŋo gam ɓe deƴƴa, o fillanii ɓe no Joomiraawo wurtiniri mo e kasu, go o wi'i: «Batee ɗum Yaakuuba, kanko e banniraaɓe horiiɓe.» Ɓaawo muuɗum o wurtii, o yawti nokkuure wonne.

¹⁸ No weeti, soogeeji e ƴamontira: «Noy Piyer waɗi?» Ɗum laatanii ɓe jiɓayeere mawne.

¹⁹ No *Eroodu ƴamani mo yiitay o wiɗitii haala mum caka reenooɓe, den o wi'i ɓe baree. Ɓaawo mum o ummii diga Yahudiya, o yahi Kaysariya, o jooɗoy ton.

No Eroodu maayiri

²⁰ *Eroodu e tikkani himɓe Tirus e Sidon. Ɓe kawri, ɓe baddi ɓe gari to makko. Ɓe artiri Bilastus, doogariijo makko, ɓe beldi e mum. Den ɓe daarti beldal Eroodu gam nyaamdu maɓɓe ƴiwataa maa e leydi makko.

²¹ No nyalaane resaane yottii, *Eroodu ɓornii kaddule laamiiɗo, jooɗii e kittaal laamu, o baddi ɓe.

²² Himɓe bati e daane towne, wi'i: «Daane Alla nun, daane neɗɗo bane!»

²³ Ɗon malaykaajo Joomiraawo fiyi mo gam o teddinay Alla. Gilɗi nyaami mo, o maayi.

²⁴ Amma haala Alla witti e yaha yeeso, e ɓeydoo sankitaago.

²⁵ No Barnabas e Sol heennyi golle mum der *Urusaliima, ɓe kootidi e Yuhaana innitirteeɗo Marku.