Golle Lilaaɓe 11 - Bible Fulfulde Bénin New Testament

Piyer der eklesiya der Urusaliima

¹ Lilaaɓe e banniraaɓe wonuɓe Yahudiya nani lenyi janani bo jaɓii haala Alla.

² Piyer yahi *Urusaliima, no o yottii sikan, *Yahuduuɓe goonɗinɓe wooltani mo,

³ wi'i: «A naati caka himɓe ɓe juulnaaka, a nyaamdii e maɓɓe!»

⁴ Den Piyer bati ɓe ko waɗi diga fuɗɗoode faa heennyitoode, wi'i:

⁵ «Siire Yoppe gonunoomi, mii du'oo, den Alla hollitimmi goɗɗum ko wa'i hande wudere mawne ne gawarɗe muuɗum naay haɓɓaa, e deentoy diga e kammu e foonnoy am.

⁶ No daarumi ne faa wooɗi, ji'umi bisaaji, ɗi koyɗe naay e tewuuji ladde e ladoojum e pooli.

⁷ Go nanumi daane e wi'ammi: ‟Piyer, umma, hiisu, nyaamu!”

⁸ Bi'umi: ‟Aawo, Joomiraawo! Abada mi nyaamay ko harmi naa bo ko laaɓaa.”

⁹ Daane nen toontitii am kade diga kammu, wi'i: ‟Taa harmin ko Alla laaɓini.”

¹⁰ Ɗum waɗi nun faa laabi tati. Ɓaawo mum kujje ɗee fu safaa dow kammu.

¹¹ E wakkati mum nun, worɓe tato lilaaɓe to am ƴiwoyɓe Kaysariya wari e wuro to gonumi.

¹² *Ruuhu Ceniiɗo wi'i am mi yaada e maɓɓe, to mi waɗu seko. Den banniraaɓe jeego'o ɓee ɗo yaadi e am, men naatidi suudu gorko on.

¹³ O bati men no o yi'iri malaykaajo darinooɗo suudu makko e wi'a mo: ‟Lilu noddaneɗaa Simon innitirteeɗo Piyer, gonɗo e siire Yoppe.

¹⁴ O waajete ko hisintee, an e saare maa fu.”

¹⁵ No puɗɗumi waajaago, Ruuhu Ceniiɗo jippii e maɓɓe hande no o jipporinoo e meeɗen arande.

¹⁶ Den, ciwtormi ka Joomiraawo wi'uno: ‟Yuhaana waɗii *batisi e diyam, amma onon, on gaɗirte batisi e Ruuhu Ceniiɗo”.

¹⁷ To Alla hokkii ɓe dokkal iri ŋal o hokkunoo en, no goonɗinɗen Yeesu *Almasiihu Joomiraawo, den kan, ume laatiimi ko mi haɗa Alla?»

¹⁸ No ɓe nani ka, ɓe jeeɗii, eɓe teddina Alla, eɓe bi'a: «Alla hokkii lenyi janani bo laawol tuubugo gam ɗi keɓa yonki.»

Eklesiya wonɓe Antiyokiya

¹⁹ Woɓɓe der sankitiiɓe sabbu tooraaji garuɗi gam maayde Etiyen, yahi faa Finikiya, Kipurus e Antiyokiya, ɓe baajaaki goɗɗo sey *Yahuduuɓe tan.

²⁰ Amma woɓɓe maɓɓe laatiiɓe ɓe Kipurus e Sirene yahi Antiyokiya e waajoo *linjiila Yeesu Joomiraawo hakkune Yunaninkeeɓe.

²¹ Baawɗe Joomiraawo e wondi e maɓɓe. Himɓe ɗuuɓɓe goonɗini, tuubi, wittoy to Joomiraawo.

²² Eklesiya tawaaka *Urusaliima nani habaru ko waɗi Antiyokiya, ɓe lili ton Barnabas.

²³ No o yottii o yi'i moƴƴere Alla, ɓerne makko weli, o waajii, o semmiɗini ɓe ɓe fu ɓe tinnoo, ɓe tabbitoo der Joomiraawo e ɓerne woore.

²⁴ Barnabas laati nun gorko geeto, kebbinaaɗo *Ruuhu Ceniiɗo e goonɗinki. Jama'aare ɗuunne goonɗini Joomiraawo.

²⁵ Ɓaawo mum, Barnabas yahi Tarsus daartoygo Sol.

²⁶ No o yiiti mo, o yaari mo Antiyokiya. Ɓe jooɗii ton ɓe gaɗi duuɓol eɓe golla caka eklesiya, ɓe janŋini himɓe ɗuuɓɓe. Goonɗinɓe wonɓe Antiyokiya artaa noddeego Yeesuuɓe.

²⁷ E balɗe ɗen, annabiiɓe ƴiwoyɓe Urusaliima warii Antiyokiya.

²⁸ Gooto maɓɓe, bi'eteeɗo Agabus, ummii, darii, bati e Ruuhu, wi'i rafo manŋo waɗan e duuniyaaru fu. Ŋo waɗii bo der laamaare Kalawdiyus .

²⁹ Goonɗinɓe haɓɓi anniya hawritingo ballal, moy fu no waawata, gam ɓe lilda banniraaɓe wonɓe Yahudiya.

³⁰ Ɓe gaɗi ɗum, ɓe lildani dottiiɓe eklesiya ballal ŋal e juuɗe Barnabas e Sol.