UJobe 26 - IBhayibhili Elingcwele LesiNdebele

UJobe Uyaphendula

¹ UJobe wasephendula wathi:

² “Usumsize njani ongelamandla! Usuyilamulele njani ingalo ebuthakathaka!

³ Yiseluleko esinjani osusiphe lowo ongelakuhlakanipha! Njalo usubonise mbono bani!

⁴ Ngubani okuncedisileyo ukukhuluma amazwi la na? Ngokabani umoya okhulume ngomlomo wakho na?

⁵ Abafileyo basebuhlungwini obukhulu, labo abangaphansi kwamanzi lalabo abahlala kuwo.

⁶ UKufa kwambulekile phambi kukaNkulunkulu; ikhamisile indawo yokubhubha.

⁷ Uyawendlala umkhathi wenyakatho endaweni engelalutho; aphanyeke umhlaba phezu kweze.

⁸ Ugoqele amanzi emayezini akhe, kodwa amayezi kawapatshaki yikusindwa ngamanzi.

⁹ Uyayigubuzela inyanga egcweleyo, endlale amayezi phezu kwayo.

¹⁰ Umisa umkhawulo wokwengama umkhathi emanzini kube ngumngcele phakathi kokukhanya lobumnyama.

¹¹ Izinsika zamazulu ziyazamazama, zisethuswa yikukhuza kwakhe.

¹² Ngamandla akhe waluthulisa ulwandle; ngenhlakanipho yakhe waquma uRahabi waba yiziqa.

¹³ Ngomoya wakhe umkhathi wacethula; isandla sakhe sayigwaza inyoka ibaleka.

¹⁴ Njalo le yimisebenzi yakhe engaphandle nje ekucineni; esikuzwayo yilizwana nje lokunyenyeza kwakhe! Pho ngubani ongawuzwisisa umdumo wamandla akhe na?”