AmaHubo 97 - IBhayibhili Elingcwele LesiNdebele

Ihubo 97

¹ UThixo uyabusa, umhlaba kawuthokoze; akuthi amakhumbi akude ajabule.

² Amayezi lomnyama omkhulu kumsibekele; ukulunga lokwahlulela kuhle kuyisisekelo sesihlalo Sakhe sobukhosi.

³ Umlilo uhamba phambi Kwakhe uzihangule izitha zakhe inxa zonke.

⁴ Umbane wakhe ukhanyisa umhlaba; umhlaba ukubone lokho uthuthumele.

⁵ Izintaba zincibilika njengengcino phambi kukaThixo, phambi kweNkosi yomhlaba wonke.

⁶ Amazulu amemezela ukulunga kwayo, labantu bonke bayayibona inkazimulo yayo.

⁷ Bonke abakhonza izifanekiso bathelwa ihlazo, labo abazikhukhumeza ngezithombe mkhonzeni, lonke lina bonkulunkulu!

⁸ IZiyoni iyezwa ithokoze lemizi yakoJuda iyajabula ngenxa yokwahlulela Kwakho, Oh Thixo.

⁹ Ngoba wena, Oh Thixo ungoPhezukonke kuwo wonke umhlaba; uphakeme ngaphezulu kakhulu kwabonkulunkulu bonke.

¹⁰ Akuthi bonke abamthandayo, uThixo, bazonde okubi, ngoba uyazilinda impilo zabathembekileyo bakhe abakhulule esandleni sababi.

¹¹ Ukukhanya kuyehliselwa kwabalungileyo lentokozo kwabaqotho enhliziyweni.

¹² Thokozani kuThixo lina elilungileyo, lidumise ibizo lakhe elingcwele.