AmaHubo 77 - IBhayibhili Elingcwele LesiNdebele

Ihubo 77

Kumqondisi wokuhlabela. KuJeduthuni, Elika-Asafi. Ihubo.

¹ Ngakhala kuNkulunkulu ngicela uncedo; ngakhala kuNkulunkulu ukuthi angizwe.

² Ngathi ngikhathazekile ngamdinga uThixo; ebusuku ngazelula izandla azazezadinwa lomphefumulo wami wala ukududuzeka.

³ Ngakukhumbula, Oh Nkulunkulu, ngabubula; ngacabanga, umoya wami wancipha.

⁴ Wala ukuthi amehlo ami avaleke; ngangikhathazekile ngisehluleka ukukhuluma.

⁵ Ngakhumbula ngezinsuku ezedlulayo, insuku zakudala;

⁶ ngakhumbula izingoma zami ebusuku. Inhliziyo yami yacabanga lomoya wami wadinga:

⁷ “INkosi izakhalala kokuphela na? Ayisayikuphinde itshengise uthando lwayo njalo na?

⁸ Kanti uthando lwayo olungapheliyo selunyamalele kokuphela na? Kanti isithembiso sayo sesiphelile kokuphela na?

⁹ Kanti uNkulunkulu usekhohliwe ukuba lesihawu na? Usethe ngokuzonda wagodla uzwelo lwakhe na?”

¹⁰ Ngasengikhumbula ngathi, “Yilokhu okunginqundayo, ukuthi isandla sokunene soPhezukonke kasisekho phezu kwami.

¹¹ Ngizayikhumbula imisebenzi kaThixo; yebo, ngizayikhumbula imimangaliso yakho yekadeni.

¹² Ngizacabanga ngayo yonke imisebenzi yakho nginakane ngazozonke izenzo zakho ezinkulu.”

¹³ Izindlela zakho, Oh Nkulunkulu, zingcwele; nguphi unkulunkulu omkhulu njengoNkulunkulu wethu na?

¹⁴ Nguwe Nkulunkulu owenza izimanga; uyawatshengisa amandla akho ebantwini.

¹⁵ Ngengalo yakho elamandla wabakhulula abantu bakho, izizukulwane zikaJakhobe loJosefa.

¹⁶ Amanzi akubona wena, Oh Nkulunkulu, amanzi akubona atshotshobala; inziki zagonyuluka.

¹⁷ Amayezi awathulula amanzi, isibhakabhaka sandindiza ngokuduma; imitshoko yakho yaphazima yaya le lale.

¹⁸ Umdumo wakho wezwakala uphakathi kwesivunguzane, umbane wakho wawukhanyisa umhlaba; umhlaba wavevezela wanyikinyeka.

¹⁹ Indlela yakho yadabula olwandle, umkhondo wakho phakathi kwamanzi, kodwa izinyathelo zakho zazingabonakali.

²⁰ Wabahola abantu bakho njengomhlambi wezimvu ngesandla sikaMosi lo-Aroni.