AmaHubo 64 - IBhayibhili Elingcwele LesiNdebele

Ihubo 64

Kumqondisi wokuhlabela. Ihubo likaDavida.

¹ Ake ungizwe, Oh Nkulunkulu, nxa ngiletha ukusola kwami; vikela impilo yami ekusongelweni yisitha.

² Ngifihla emacebeni abantu ababi, kulokho kuxokozela kwezixhwali.

³ Bayazilola inlimi zabo njengezinkemba bakhombele amazwi abo njengemitshoko ebulalayo.

⁴ Batshoka becathemele umuntu ongonanga lutho; bayaphanga ukumciba bengelavalo.

⁵ Bayakhuthazana ngamacebo amabi, bakhulumisana ngokufihla imijibila yabo; bathi, “Sizabonwa ngubani?”

⁶ Baceba ukona besithi, “Sesakhe icebo elihle kakhulu!” Ngempela ingqondo yomuntu lenhliziyo yakhe ilobuqili.

⁷ Kodwa uNkulunkulu uzabaciba ngemitshoko; ngokuphangisa nje bazalahlwa phansi.

⁸ Uzakwenza banyeyane bona bodwa bacine sebedilizana; bonke abababonayo bazanyikinya amakhanda babahleke.

⁹ Bonke abantu bomhlaba bazakwesaba; bazafakaza imisebenzi kaNkulunkulu banakane ngalokho akwenzileyo.

¹⁰ Akuthi abalungileyo bathokoze kuThixo baphephele kuye; akuthi bonke abaqotho ngenhliziyo bamdumise.