AmaHubo 33 - IBhayibhili Elingcwele LesiNdebele

Ihubo 33

¹ Hlabelelani kuThixo ngentokozo, lina balungileyo; kubafanele abaqotho ukumdumisa.

² Dumisani uThixo ngechacho; mhlabeleleni ngesiginci sezintambo ezilitshumi.

³ Mhlabeleleni ingoma entsha; tshayani kamnandi lihlokome ngentokozo.

⁴ Ngoba ilizwi likaThixo lilungile, liqinisile; uthembekile kukho konke akwenzayo.

⁵ UThixo uthanda ukulunga lokwahlulela okuqondileyo; umhlaba ugcwele uthando lwakhe olungaphuthiyo.

⁶ Ngelizwi likaThixo amazulu enziwa, ubunkanyankanya bezinkanyezi ngomoya womlomo wakhe.

⁷ Uyawaqoqa amanzi olwandle awathele enkonxeni; athululele inziki zolwandle eziphaleni.

⁸ Umhlaba wonke kawesabe uThixo; akuthi bonke abantu bomhlaba bazithobe phambi Kwakhe.

⁹ Ngoba wakhuluma, kwahle kwaba khona; wayala, kwema kwaqina nko.

¹⁰ UThixo uyawachitha amacebo ezizwe; uyazinyampisa izinhloso zabantu.

¹¹ Kodwa amacebo kaThixo ami aqinile nini lanini, izinhloso zenhliziyo yakhe kuzozonke izizukulwane.

¹² Sibusisekile isizwe uNkulunkulu waso onguThixo, abantu abakhethayo baba yilifa lakhe.

¹³ UThixo ukhangele phansi esezulwini ababone bonke abantu;

¹⁴ esemzini wakhe uyababona bonke abahlala emhlabeni

¹⁵ yena owenza inhliziyo zabo bonke, enanzelela konke abakwenzayo.

¹⁶ Akulankosi esizwa yibukhulu bebutho layo; akulaqhawe eliphunyuka ngamandla alo amakhulu.

¹⁷ Yikuthemba ize ukuthi ibhiza lingakusindisa; loba lona lilamandla amakhulu ngeke lisindise.

¹⁸ Kodwa amehlo kaThixo akulabo abamesabayo, kulabo othemba labo lisethandweni lwakhe olungapheliyo,

¹⁹ ukubakhulula ekufeni baphiliswe lanxa kulendlala.

²⁰ Simlindele uThixo ngokwethemba; ulusizo lwethu lesihlangu sethu.

²¹ Inhliziyo zethu zithokoza Ngaye, ngoba sithembe ebizweni lakhe elingcwele.

²² Sengathi uthando Lwakho olungaphuthiyo, Thixo, lungaba phezu kwethu njengalokhu sibeka ithemba lethu kuwe.