AmaHubo 30 - IBhayibhili Elingcwele LesiNdebele

Ihubo 30

Ihubo. Ingoma. Elokunikela ithempeli. ElikaDavida.

¹ Ngizakuphakamisa, Oh Thixo, ngoba wangenyula ekujuleni awaze wavumela izitha zami zijabule phezu kwami.

² Awu Thixo, Nkulunkulu wami, ngacela Kuwe uncedo wangisilisa.

³ Yebo Thixo wangenyula elibeni, wangisiza ngaphepha ukungena egodini.

⁴ Hlabelelani kuThixo lina bathembekileyo bakhe; dumisani ibizo lakhe elingcwele.

⁵ Ngoba ukuthukuthela Kwakhe ngokomzuzwana nje, kodwa umusa wakhe ukhona okwempilo yonke; ukulila kungaqhubeka ubusuku bonke, kodwa ukuthokoza kuyafika ekuseni.

⁶ Ngathi lapho ngizizwa ngihlezi kuhle ngathi, “Kangisoze ngafa ngahlukuluzeka.”

⁷ Yebo Thixo, wathi lapho ungizwela wenza intaba yami yagxila qho; kodwa kwathi lapho usufihle ubuso Bakho ngaphelelwa lithemba.

⁸ Ngakhala kuwe, Thixo; ngacela umusa eNkosini:

⁹ “Kulenzuzo bani ngokubhujiswa kwami na, ngokutshona kwami egodini? Kambe uthuli luzakudumisa na? Lona luzafakaza na ngokuthembeka Kwakho?

¹⁰ Zwana, Oh Thixo, ube lomusa kimi; woba lusizo lwami.”

¹¹ Waguqula ukububula kwami kwaba ngumgido; wangihlubula izigqoko zamasaka wangigqokisa ukuthokoza,

¹² ukuze inhliziyo yami ikuhlabelele ingathuli. Oh Thixo, Nkulunkulu wami, ngizakubonga nini lanini.