1 AbaseKhorinte 13 - IBhayibhili Elingcwele LesiNdebele

¹ Loba ngikhuluma ngendimi zabantu lezezingilosi, kodwa ngingelalo uthando, ngiyinsimbi nje ekhalayo loba izenge elincencethayo.

² Loba ngilesipho sokuphrofitha, ngingaqedisisa imfihlakalo zonke kanye lokwazi konke, njalo nxa ngilokukholwa okungasusa izintaba, kodwa ngingelalo uthando, kangisilutho.

³ Loba nginganika abayanga konke engilakho nginikele lomzimba wami emalangabini, kodwa ngingelalo uthando, kangizuzi lutho.

⁴ Uthando luyabekezela, uthando lulomusa. Kalulamona, kaluzincomi, kaluzigqaji.

⁵ Kalusisosiqholo, kaluzifuneli okwalo, kaluphangisi ukuthukuthela, kalubambeli zikhwili.

⁶ Uthando kaluthokozeli okubi, kodwa luthokozela iqiniso.

⁷ Luhlezi luvikela, luhlezi lukholwa, luhlezi lusethemba, luhlezi lubekezela.

⁸ Uthando kalupheli. Kodwa lapho okuleziphrofethi khona, zizaphela, lapho okulezindimi khona, zizathuliswa; lapho okulokwazi khona, kuzakwedlula.

⁹ Ngoba sazi ingxenye, njalo siphrofitha ingxenye,

¹⁰ kodwa lapho ukuphelela kufika, ukungapheleli kuyanyamalala.

¹¹ Ngisesengumntwana, ngakhuluma njengomntwana, ngacabanga njengomntwana, nganakana njengomntwana. Sengiyindoda, ngaziyekela izindlela zobuntwana.

¹² Khathesi sibona kalufifi esibukweni; sizabuye sibone ubuso ngobuso. Khathesi ngazi ingxenye; ngizabuye ngazi okupheleleyo, njengoba lami ngisaziwa ngokupheleleyo.

¹³ Okuthathu lokhu kuma kunjalo: ukukholwa, ithemba lothando. Kodwa okukhulu kwalokhu luthando.