ZOWEL 4 - Bible en langue guiziga

Bumbulvuŋ maga kiita da sukwi mekelemmey

¹ Bumbulvuŋ a ɓi: «Haˀaw, ti di nah na, ti ya misa ɗiya hiri ngi Zuda ati Zeruzaleme le na,

² i sa kuso sukwi ngi mizli gar, i sa pi sar ti taŋ ng'ar sozo mazilaka ‹Bumbulvuŋ migi kiita›. I sa ga taŋ kiita a diga, asi Israyel, mizli ɗuwoy, yo mi nga yahay: vur a zliɗaka taŋ hirnga le mber mber nga wuzla mizli mekelemey, yo a wunkaka hirwuy ɗu le da taŋ.

³ A kiɗam caca le ti mizli ɗuwoyo, ziri mizileheye, a hiɗikam taŋ ngwas sulomehey le, ziri mongosohoyo, a hiɗikam taŋ mbaazla le, a sakaŋ.

⁴ Kum mizli Tir ati Sidoŋhoy, waɗ kum mizli vay Filistihey gar: Ki wuɗam mi avu yaka? Ki pulaka cuwal kum avu ya kwa? Na, da ki wuɗam di i pula bol na, naɓa y'anta zum vu ta, i sa pula cuwala kutum ar kumo si.

⁵ Kum mizli mihilaka ɓiri bara ati ɓiri tapasl tapasl ɗuwoy na, kum mipaka zlili ɗu mupuɗaw puɗaway ar hay kuli kumoy na,

⁶ kum mihiɗikaka mizli Zudahay ati Zeruzalemey da mizli Grekey, ɓa a cohom taŋ kileŋ avu hirwuy taŋ na,

⁷ i ya masa ra puɗuka taŋ angi hirwuy kum mihiɗikaka taŋ ng'ara na, yo malambaˀ kum migaka na, i sa mbiɗa nga hirnga kum a muŋ.

⁸ Ziri mizile ati mongoso kumoyo, yi sa hiɗika taŋ da mizli Zudahay. Zudahaya kwana, a sa hiɗika taŋ da mizli Sabeŋ, sukwi mikileŋhey. Maɓa hana i ya Bumbulvuŋ!

Kiɗavu ngi dirba wãˀ waɗ gi kiita

⁹ Tilam mi da sukwi mekelemeye, ɓaka taŋ na: Juwam vu nga kiɗa vu, puɗukaka migi vurum kumoyo. Anja migi vurumoy gar a jaka jiviɗe, a ram.

¹⁰ Sliŋ ngi gam ngi sla kumoyo, vuɗam taŋ maslalamay. Slagway kumoyo, vuɗam taŋ ziwitey. Ko mizli hĩhĩy muwãˀ naŋhay kwana, anja a ɓam: «Ndr'i bugawlahay!»

¹¹ Kum mizli ngir prokoy gar, wusoko vu, soko, kusom ar sozo misi purla. Ka so na Bumbulvuŋ, slin ti bugawla ɗikeye ng'ar taŋ!

¹² Bumbulvuŋ a ɓi: «Anja sukwi ngi mizli mekelemey a zuɓam jiviɗ, anja a ram ng'ar sozo mazilaka ‹Bumbulvuŋ a gi kiita›. Ya masa cifi ngi gi kiita da mizli ngir prokoy na, a diga.

¹³ Zuɓaka slagwayay ɓa ki ngumaka taŋ, kaɓa mangumam daw minih le ti sifi. Soko, njirslaka taŋ kaɓa maɗucom yi ngi gudubun manaha li ɗuc naŋ cer cer hã a pi a ruwuy, manaha magayakaya cer cer. moˀore taŋ a fini gidaŋ le.

¹⁴ Akẽh na, zigiduw haɗi, ara ndilawa ng'ar sozo ngi li gi kiita, asi hin ngi Bumbulvuŋ ara ndilo gweˀ, hin naŋ masa ga slra naŋ a diga.

¹⁵ Pas ati kiya a sa goko luvuŋ, wurzlaŋhay a mucaka pusluɗ taŋ.

¹⁶ Bumbulvuŋ a buco ti muwã Siyoŋ, a tilo mi ti Zeruzaleme. Dar muŋ ati hirwuyo, a jijikam ngbir ngbir. Amma Bumbulvuŋ a wi vu ti mizli naŋhaya, naŋ i li ɗum ngi Israyeley.

¹⁷ Akẽh na, kisa sinikiy, yi Bumbulvuŋ, Buymisemuŋ kum, ya misi a Siyoŋ, muwã mipal nga ya. Zeruzalem a sa tiri i li mipal da ya, mulakay anta sa cam a diga mata ndiɗaˀ.»

Hin ngi mumul ngi mizli Israyeley

¹⁸ «Hin ara ndilawa, tapasa, ko a muwãhay kwana, gudubun a sa yi haɗi, ginewey misi a muwãhaya, ɗuwa asi taŋ jõh jõh, Zlazlar ngi ruwuy Zudahay gar a sa ɓulom yam. Mizaw a sa ɓul yam vil vil ar hay ngi Bumbulvuŋ, yam naŋ a sa ɓul ng'ar Sozo ngi ngalalay.

¹⁹ Ezipte a sa tiri diŋ, hirwuy Edom a sa tiri wuzlaɓuh kirɗak kirɗak, asi taŋ migaka moˀore da hirwuy Zuda, mizli ngi raˀahaya a gam gwat ta si na, a kiɗaka taŋ vagay vagay.

²⁰ Mizli a sa paka hirwuy Zuda ngi caˀa, Zeruzaleme, a sa paka ngi sete.

²¹ Haˀaw, i ɓa njah, mizli a gam gwat ta. Ya Bumbulvuŋ, yi sa ndir a Siyoŋ.