ZOWEL 3 - Bible en langue guiziga

Bumbulvuŋ a sa po ˀUf naŋ ar mizli gar

¹ Buymisemuŋ a ɓi: «A dirba nah na, i sa po ˀUf ɗu ar mbur titira gar. Ziri kum mizilehey ati mongosohoy, a sa ɓam ɓi ngi gwat masa gi tumbuŋ, midigila kumoy a sa musuwunam, yo gawla ati diili kumoy a sa puram ti kleŋ.

² ko ar gawla ɗu mizile ati mongosohoy kwana, tapasa, i sa po ˀUf ɗu angi taŋ.

³ I sa gi gwat migam ɗaˀ tahay a muŋ waɗ a ruwuyo, pumbus, vu waɗ musure ngi cunju.

⁴ Ti hin ngi Bumbulvuŋ, hin mimadiɗa magi zluwun haɗa na, pas a sa mbiɗi a go luvuŋ, yo kiya a sa tiri gagazakaɓa pumbusu.»

⁵ Akẽh na, ko waka gar mizila slimiɗ ngi Bumbulvuŋ le na, a sa lihi. Asi mike na, mizli ada masa ndiram ti siifa a muwã Siyoŋ waɗ a Zeruzaleme, kaɓa Bumbulvuŋ miɓa zleˀe, i mizli naŋ Bumbulvuŋ masa zila taŋ.