Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

ZLI VIRZI 41 - Bible en langue guiziga


Buy madiɗa ngi Ezipte mumusuwun

1 Vi cuw a dirba nah na, buy madiɗa ngi Ezipte a musuwun. Aro deŋ a mi mizaw Nil.

2 Keɗ na, madiya sla mezlehey tarnaˀ, muzlumburahay, ara boko ti mizawa. Joˀ a zlaka a zumam a ˀaydidike.

3 A dirba sla tayna ma na, madiya sla mekelemey tarnaˀ, a ra boko ti mizawa ma, taŋ kuyta wãˀ, mizaha naŋhay ngiyam ngiyam. A cicam deŋ deŋ a ciki mudumbuŋhoy tuwa, a ˀaydidike.

4 Dar madiya sla mukuy tahay mitarnaˀ, mizahahay ngiyam ngiyam tuwa, ara humbuɗaka madiya sla mimezlehey mitarnaˀ tuwa; ndeˀ suɗuk ndeˀ suɗuk. Akẽh na, buy madiɗa ngi Ezipte a puɗuku.

5 A hinje a muŋ, a musuwun ava ma. Keɗ na, hirnga ngi daway tepeh tepeh tarnaˀ avu nguf purla, a nguɗoko hiri le kuy kuy.

6 A dirba tayna ma na, munjuftuk mekelemey tarnaˀ, kutuɓ a wura taŋ le, ara gam a ciki taŋ.

7 Munjuftuk mitarnaˀ tuwa, ara ndaka hirnga ngi daw mitepeh tepeh, munguɗoko hiri tuwa. Dar buy madiɗa ngi Ezipte a puɗuku. Keɗ na, a musuwun ti musuwun.

8 Put ngi miprik naŋ na, buy madiɗa ngi Ezipte ara lik, a zilo misi ketelehey ati misi sinmijileŋ ngi Ezipteheye pay. A slufa taŋ ɓi ngi musuwun naŋ. Amma ko mbur pal mimbiɗa mbiɗeˀvra naŋ gu da buy madiɗa ngi Ezipte anta.

9 Madiɗa ngi migi gwat ngi sihey, a ɓa buy madiɗa ngi Ezipte: «Buy ɗu! Wurenna yi sa wulka malambaˀ ɗu ya miga zleˀe.

10 Buy, ki zuɓ himaˀ ar gawla ɗikeye, ki ciy ar dangay, a hay madiɗa ngi soje mijigina hay ɗikeye, ya ati madiɗa ngi midi ɗafay.

11 I musuwunam cuw ndra angi duvuɗ purla, yo musuwun ngi mburo gar na, ti mbiɗeˀvra nga naŋ nga naŋ.

12 Gawla Heber ada zleˀe ati ndra. I slufakaŋ ɓi ngi musuwun ndra. A ɓa mbiɗeˀvra taŋ, ngi mburo ngi mburo.

13 A gi le gisiŋ gwat naŋ, kaɓa naŋ mimbiɗa ndra di na: A mam ti ya ya ng'ar slra ɗu muŋ, yo mbur numuŋ, a luwaka a muŋ.»


Zozef mimbiɗa pulaˀvra ngi musuwun ngi buy Ezipte

14 Akẽh na, buy madiɗa ngi Ezipte a ɓi, a ziloko Zozefe, a boko di tir dangaya kutum, a hijakaŋ hirnga, a mbiɗa zana, dar aru ng'avu buy madiɗa ngi Ezipte.

15 Buy madiɗa ngi Ezipte a ɓa Zozefe na: «i musuwun na, ko mbur mimbiɗa mbiɗeˀvra naŋ gu anta. Amma yi cine ɓi ɗike na, da mbur a slufuw ɓi ngi musuwun naŋ le na, k'ada mbiɗa pulaˀvra naŋ.»

16 Zozef a ɓaŋ: «I ya ta, i Buymisemuŋ masa si na mbiɗa pulaˀvra naŋ kaslsla.»

17 Akẽh na, buy madiɗa ngi Ezipte a ɓa Zozefe so na: «Angi musuwun ɗu, yi pura na, ya deŋ a mi mizaw Nil.

18 Keɗ na, madiya sla mezlehey tarnaˀ, muzlumburahay, ara boko ti mizawa. A zlaka, a zumam a ˀaydidike.

19 A dirba tayna ma na, madiya sla mekelemey tarnaˀ, ara boko ti mizawa ma, mizahahay, ngiyam ngiyam, hĩhĩy naŋhay, taŋ kuy ta wãˀ. Angi hirwuy Ezipte gar na, yi pur madiya sla mukuy ta ka tayna ɗaˀ ta wãˀ.

20 Madiya sla mingiyam ngiyamay, mukuyta wãˀhay tuwa, ara humbuɗaka madiya mitarnaˀ hay na ndeˀ suɗuk ndeˀ suɗuk, muzlumbura mudumbuŋhoy tuwa.

21 A humbuɗaka taŋ ndeˀ suɗuk ndeˀ suɗuk ngbaŋ, amma ko anta sin kaɓa a humbuɗam gwat le ng'ar jof taŋ ta, asi a roko ngiyam ngiyam, kuyta wãˀ ka misi zleˀe vuna si. Dar yi puɗuku.

22 A dirba nah, yi musuwun ma, keɗ na, hirnga ngi daway tepeh tepeh tarnaˀ, a gam avu nguf purla, a nguɗoko hiri le kuy kuy.

23 A dirba nah, hirnga ngi daway tarnaˀ, a bam le, i munjuftukoy, kutuɓ a wura taŋ le, ara gam a ciki taŋ ya.

24 Munjuftukoy tuwa, ara saka hirnga ngi daw mezlehey mitarnaˀ tuwa! I ɓa ɓi nah le da misi keteleheye ngbaŋ, amma ko mbur pal mubuniy ɓi nah gu anta.»

25 Zozef a ɓa buy madiɗa ngi Ezipte na: «Musuwun ɗikey i misi purla si, Buymisemuŋ a kuw di i mumuyuŋ ngi zay sla a slimiɗ, ar gwat naŋ masa gaŋ.

26 Madiya sla mezlehey mitarnaˀ na, i vi tarnaˀ, yo hirnga ngi daw mitepeh tepeh tarnaˀ na, i vi tarnaˀ: i musuwun mupurla si.

27 Madiya sla mingiyam ngiyam, mukuyta muwãˀhay muboko a dirba na, a bigi vi tarnaˀ, yo hirnga ngi daw munjuftukoy mitarnaˀ, kutuɓ a wura taŋ le na, i may masa gi vi tarnaˀ.

28 Mingiɓi ya mawuɗ i ɓa da buy madiɗa ngi Ezipte na, i hana so. Buymisemuŋ a buguw gwat naŋ masa ga le.

29 Angi vi tarnaˀa, gwat a sa gi ka zay asi ruwuy Ezipte gar.

30 A dirba nah, may a sa gi vi tarnaˀ, hã mizli a sa puyukoko hirnga ngi gwat migi ka zay asi ruwuy Ezipte tuwa. May a sa vuso hirwuyo.

31 Gwat a gi le zleˀe asi ruwuyo ka zay na, mizli anta sa sinaka mata, asi i may masa gi aseˀeŋ aseˀeŋ, i may misi ti himaˀ haɗi.

32 Da ka buy madiɗa ngi Ezipte ki musuwun le is cuw na, naɓa i Buymisemuŋ ɓi micica ɓi nah, yo a wuɗ ɓa a ga wureˀ wurenna.

33 Wurenna so na buy, sipi mbur misi ti lesl, misi sinmijileŋ, ɓa ki vulaŋ madiɗa asi ruwuy Ezipte.

34 Anja ki cifi buy micikila gwatay asi ruwuy Ezipte gar, ɓa angi vi tarnaˀ misi gwat ka zay na, mbur gar a wunka gwat naŋ a wuzla zlum, a tuɓoko pal!

35 A sa cikiloko gwat ngi mi gamay gar, angi vi mezle mitarnaˀ nga mbuŋ na, yo a sa paka dawa ti slimiɗ ngi ɗik buy madiɗa ngi Ezipte, a wam taŋ vu weˀ weˀ ar walahay madiɗahaya.

36 Gwat ngi zum hana, i gwat miwi di vu ngi sa ngir di ar vi mitarnaˀ ngi may masa gi angi hirwuy Ezipte na, ɓa kahana na, may anta sa ngizla mizli asi ruwuyo ta.»


Zozef mitiri mbur madiɗa mudumbuŋ ngi mbuŋ buy Ezipte

37 Mingiɓi ngi Zozef a cira hiri le da buy madiɗa ngi Ezipte ati gawla naŋhaya gar.

38 Dar buy a ɓa taŋ na: «Mbur hana i minaha le ti ˀUf ngi Buymisemuŋ, i lumam mbur misi kahana gu makwa?»

39 Buy madiɗa ngi Ezipte a ɓa Zozefe: «Ani Buymisemuŋ a njikuw gwat tayna le gar, mbur misi ti lesl, yo misi ti sinmijileŋ kaɓa ka vuna anta.

40 Masa cifi madiɗa ngi hay ɗu i ka. Mizli ɗuwoy gar a sa cinam avu ka, yi sa funuw na, ti zumabuy tewle.»

41 Buy madiɗa ngi Ezipte a ɓa Zozefe: «Pura, i cifuw ki madiɗaŋ angi hirwuy Ezipte gar.»

42 Buy madiɗa ngi Ezipte a cuko dangwa ngi vu muzuŋ haŋ naŋ, a ca da muzuŋ haŋ ngi Zozef. A kaŋ zana ngi slimiɗ, a luwaŋ virzle ngi ɓiri tapasl tapasl.

43 A ɓaŋ ɓa a jiɗ angi mota ngi pilisey, i mota nga naŋ mucuw naŋ, a tilam mi a mbuŋ naŋ, a ɓam: «Baˀam, buy ara cuhu, baˀam, buy ara cuhu!» Buy madiɗa ngi Ezipte a cifaŋ le madiɗa asi ruwuy Ezipte gar.

44 A ɓa Zozefe: «Yi buy madiɗa ngi Ezipte. Angi hirwuy Ezipte gar na, ko mbur a zuɓ sar ta, sey da ka mupulaŋ jiviɗ naŋ le.»

45 Buy madiɗa ngi Ezipte a ca slimiɗ da Zozefe, a zila Safnat-Paneya. A vulaŋ ngi ngwasa i Asnat, zuŋ ngi Potifera, masay a On. Zozef a bi nga guno hirwuy Ezipte.

46 Ti Zozefe muru nga mbuŋ buy madiɗa ngi Ezipte, naɓa naŋ ti vi kukur makir. A pula buy madiɗa ngi Ezipte, ara bula hirwuy Ezipte gar.

47 Angi vi tarnaˀ misi gwata ka zay na, gwat a gi teˀe asi ruwuyo.

48 Angi vi tarnaˀ, aseˀe aseˀe na, Zozef a kuso gwat ngi migamay misi angi hirwuy Ezipte gar, a pa taŋ ar walalay madiɗahay, gwat ngi migamay mahufoko taŋ ar prokoyo a cikiloko taŋ ng'ar walahay madiɗahay.

49 Zozef a kuso dawa haɗi, kaɓa muyuŋ a mizaw, hã a pula sluf naŋ, asi a wi ti wi mata.

50 Dumbuŋ angi vi ngi may masa zli na, Asnat zuŋ ngi Potifera, masay a Ono, a ya ziri mizilehey le cuw da Zozefe.

51 A zila modogomo Manase, asi a ɓi na: «Buymisemuŋ a puyukiy hirnga le avu bonoy ɗuwoy gar waɗ avu wunuk ɗu ati mizli ngi hay bahahaya.»

52 A zila mijingaˀ naŋ Efrahim, asi a ɓi na: «Buymisemuŋ a vuliy yi le angi hirwuy, ya migeˀ ircece anga.»

53 Vi mitarnaˀ, misi gwata ka zay tuwa, a kiɗ mi le angi hirwuy Ezipte.

54 Vi mitarnaˀ ngi may tuwa, ara ndilawa kaɓa Zozef miɓa ɗaˀ le tuwa. May a gi asi ruwyoyo gar, amma a Ezipte gwat ngi zum ada.

55 Ti may mizla ci avu taŋ ya na, mizli a zlaka, a cufuɗam gwat ngi zum avu buy madiɗa ngi Ezipte cǝruw cǝruw. Buy madiɗa ngi Ezipte a mbiɗa da Eziptehey gar, a ɓa taŋ: «A ram, ara lumaka Zozef, ɓi naŋ muɓukum di le gar na, gakaŋ.»

56 May a tisla hirwuyo le gar. Zozef a wuna mi ngi daw naŋ miwi di vu angi walahay madiɗa madiɗahay tuwa, ɓa a hiɗika da Ezipteheye. Maya kwana ara bul vu angi hirwuy Ezipte.

57 Mizli a soko ti ngi hirwuy gar nga hiɗika daw avu Zozef a Ezipte, asi may ara bul vu ar duniya keɗeɗe.

Bible en Langue Guiziga © L’Alliance Biblique du Cameroun, 2011.

Bible Society of Cameroon
ကြှနျုပျတို့နောကျလိုကျပါ:



ကြော်ငြာတွေ