ZLI VIRZI 34 - Bible en langue guiziga

Simeyoŋ ati Levi mupulaka cuwal ngi mihinam ti sukum taŋ Dina

¹ Ti di numuŋ ada na, Dina, zuŋ Leya miya ti Zakopo, a bi nga pura ziri diili ngi hirwuy nah.

² Sikem, mangal ngi Hamor, mbur Hevit, buy ngi hirwuy nah vuna, a pura Dina tuwa, a ja, ara hin di ti gidaŋ.

³ A slrup ti Dina slrap, a wuɗaŋ haɗi teˀe, a wuɗ ɓa Dina a hina mevele aseˀe.

⁴ Dar Sikem a ɓa cine naŋ Hamoro na: «Zuɓiy zuŋ hana ɓa i ɗuvaŋ.»

⁵ Zakop a cine na, Sikem a hirya zuŋ naŋ Dina le, naɓa ziri naŋ mizilehey a roko ti ginewey a ɓuh, amma naŋ teˀteˀ hã a moko.

⁶ Hamor cine ngi Sikeme, a bi ɓa ara ɓa Zakopo.

⁷ Ti ziri ngi Zakopoy mumoko ti ɓuh, taŋ micinaka ɓi nah cin si na, a ja taŋ mevel haɗi. A slikiɗam himaˀ fõh fõh, asi Sikem mihin ti zuŋ ngi Zakop na, a gi gwat ngi mesem le, anta a gam kanah angi hirwuy Israyele ta.

⁸ Hamor a ɓa taŋ na: «Mangal ɗu Sikeme, mevele a hin le wãˀ asi zuŋ kumo, vulakaŋ di ɓa a ɗuva sini.

⁹ Gukum jomo ar wala ndra: Ki sa vulam ndra ziri kumoy, yo ki zuɓaka ngi ndrahay aya.

¹⁰ Ki sa cifam ati ndra, li ani, kisa pam anga, kisa gam gwat kumoy, kisa tiram taŋ ngi kumoy.»

¹¹ Sikem ti hirnga naŋ, a so ɓa cine ngi zuŋ ati sukum naŋhaya na: «Ambuh kum! Gwat kum mucufuɗam le gar na, yi sa vulukum di.

¹² Cufuɗikiy ɓa i vul zlili ar ngwasa haɗa waɗ gwat mekelemey ma, gwat kum mucufuɗam le gar na, i sa vula kaslsla, amma kum vulikiy zuŋ ɓa i ɗuvaŋ.»

¹³ Ziri ngi Zakopoy a mbiɗaka da Sikem ati cine naŋ Hamoro ti wer, asi Sikem a ga gwat ngi mesem le da sukum taŋ Dina.

¹⁴ A mbiɗaka taŋ di: «Ɓi ka miɓa hana, i gaka ta, yo mbur mici mizaw ta na, i vulakaŋ sukum ndra ta, naɓa a sa gi avu ndra, i gwat ngi mesem madiɗa.

¹⁵ Ɓa i sa jumomˀay na, sey da ki mbiɗam le kaɓa ndra far. Mizli mizile kumoy gar na, ki caka taŋ a mizaw.

¹⁶ Kine so na, i sa vulukum ziri ndraˀahaya, i sa zuɓaka ngi kumoyo da ndra ya, i sa cifam ati kum, i sa tiram sukwi purla.

¹⁷ Da ki tiɓaka ci mizaw ndra ta na, i sa tiɓaka zuŋ ndra a muŋ, i cohom le.»

¹⁸ Hamor ati mangal naŋ Sikeme, a hĩyãka mingiɓi taŋ le.

¹⁹ Gawla a mur ngi ga gwat taŋ miɓaka na mata, asi ara wuɗ zuŋ ngi Zakopo. Asi mangal vuna i hirnga a hay cine.

²⁰ Hamor ati mangal naŋ Sikeme, a ram nga mizlingre ngi walahay taŋ madiɗa, a ɓaka mizli taŋhaya:

²¹ «Mizli tayna taŋ zuy zuy ati ndra, anja a cifam asi hirwuy ndra, yo a gam gwat taŋhaya, anja hirwuy hana a ndir baŋ avu taŋ, zuɓukum ziri taŋhay, yo i vulaka taŋ ziri mongoso ndraˀahaya, a zuɓam aya.

²² Ɓa a sa ngumam cifi ati ndra, yo ɓa i tiram sukwi purla na, sey da mizli mizile ndrahay gar a cam mizaw le ka taŋ na ya.

²³ Da i ngumam le si na, a sa cifam ati ndra, naɓa ginew taŋhay, zlili taŋhay, gwat misãmi taŋhay gar na, a sa ndiram da ndra takwa?»

²⁴ Mizli misi a mizlingre ngi walahay gar na, a tiɓaka ɓi ngi Hamor ati ngi mangal naŋ Sikeme le. A caka zileye gar a mizawa.

²⁵ Na, angi hin mimakir naŋ, naɓa ziley a roko ar bonoy aruŋ na, ziri ngi Zakopoy cuw, Simeyoŋ ati Levi sukum ngi Dinahaya, maslalam maslalam, a cam ng'ar walahay muro setetete, a kiɗaka mizli mizileheye gar vagay vagay,

²⁶ waɗ Hamor ati mangal naŋ Sikeme ma. Ti taŋ mabam le ti hay Sikeme na, a zuɓaka Dina a haŋ.

²⁷ Ziri mekelem ngi Zakopoyo, a ndilam vu kpis ar vagay ngi mizli tuwa, a sliraka gwat ngir walahaya slar slar, asi a gaka gwat ngi mesem le da sukum taŋ mongoso.

²⁸ A ɓulaka tumuŋhoy, ˀaway, slahay, zunguhoy, yo a hilaka gwat ngir walahaya waɗ ngir guvahaya gar.

²⁹ A hilaka zlili taŋhaya gar, ziri taŋhay ati ngwas taŋhaya gar, yo a sliraka gwat ngi hayaya slar slar gar.

³⁰ Dar Zakop a ɓa Simeyoŋ ati Levi na: «Wurenna ki cikiy le ar ɓi so, mizli Kanaˀanay ati Perizihey, a sa purikiy avu hiri ta. Ndra tuwa, ndra neˀkini, a sa jumom ar ya, a sa kiɗikiy, a sa ngizlam ndra ati hay ɗu gar.»

³¹ Simeyoŋ ati Levi a mbiɗakaŋ di: «Anja mbak a gam ti sukum ndra ka sulome sukwa?»