ZLI VIRZI 11 - Bible en langue guiziga

Mizli mindiram hay suburo a ruwuy Babel

¹ Zlezle zleˀe na, asi gazlavay kurzluˀ gara, mizli a ɓam mi purla, a zilaka gwata misi purla.

² Ti taŋ maram kini ngir tisi pas ngi miprik na, a lumam li mifaw a ruwuy Babiloŋ, dar a pam a diga.

³ A zlaka a ɓam ar wala taŋ: «Yawwa! Kuɗukum brik, zlumukum di ar vu!» Brike ar deɗe ngi ɗugur, a caka wala naŋ ti gudroŋ.

⁴ Dar a ɓam ma: «Yawwa! Pukum walahay madiɗaŋ, yo ndurukum hay musubur, misi hirnga naŋ a wusa muŋ, ɓa slimiɗ ndra a zil, yo ɓa i zliɗam hirnga asi ruwuy gar ta.»

⁵ Bumbulvuŋ a po sar ɓa a pura berne ati hay musubur mizli titrahay mandiraka tuwaŋ.

⁶ Joˀ Buymisemuŋ a ɓi: «Ani taŋ gar ara jumom, ɓa a tiram sukwi purla, ɓa a ɓam mi purla! Da a zlaka le kahana na, naɓa gwat taŋ majuwaka le ngi gi gar na, gwat masa tika taŋ ngi gi naŋ anta mata.

⁷ Yawwa! Pukum sar, juhuɗukum mingiɓi taŋ wurenna, ɓa mbur a cine ngi cala mata!»

⁸ Bumbulvuŋ a zliɗa taŋ hirnga ti kẽh asi ruwuy kurzluˀgar, a pulaka pi walahaya.

⁹ A zilaka walahay nah Babel na vurˀe, asi Bumbulvuŋ mijihiɗa mi ngi mizli ngisi ruwuy gar na a diga, yo naŋ mizliɗa hirnga ngi mizli ng'asi ruwuy fuk gar na, baɗ a diga.

Tizer, zle avu Sem hã avu Abram

¹⁰ Dideˀ ngi Semeye t'ani: Sem miya Arpakzat na, vi cuw a dirba mekepel madiɗa, naɓa naŋ ti vi skat.

¹¹ Sem a gi vi skat skat zlum, a dirba naŋ miya Arpakzata, a yi ziri mizile mekelemey ati mongosohoy le ma.

¹² Arpakzata, ti naŋ misi ti vi kukur makir nga zlum na, a yi Sela.

¹³ Arpakzata, a dirba naŋ miya Sela, a gi vi skat skat mufaɗ ti makir. A yi ziri mizile mekelemey ati mongosohoy le ma.

¹⁴ Sela, ti naŋ misi ti vi kukur makir na, a yi Eber.

¹⁵ Sela, a dirba naŋ miya Ebere, a gi vi skat skat mufaɗ ti makir. A yi ziri mizile mekelemey ati mongosohoy le ma.

¹⁶ Ebere, ti naŋ misi ti vi kukur makir nga mufaɗ na, a yi Peleg.

¹⁷ Ebere, a dirba naŋ miya pelege, a gi vi skat skat mufaɗ ti kukur makir. A yi ziri mizile mekelemey ati mongosohoy le ma.

¹⁸ Pelege, ti naŋ misi ti vi kukur makir na, a yi Reˀu.

¹⁹ Pelege, a dirba naŋ miya Reˀu na, a gi vi skat skat cuw ti ngoltir. A yi ziri mizile mekelemey ati mongosohoy le ma.

²⁰ Reˀu, ti naŋ misi ti vi kukur makir nga cuw na, a yi Serug.

²¹ Reˀu, a dirba naŋ miya Serugo, a gi vi skat skat cuw ti tarnaˀa. A yi ziri mizile mekelemey ati mongosohoy le ma.

²² Serugo, ti naŋ misi ti vi kukur makir na, a yi Nahor.

²³ Serugo, a dirba naŋ miya Nahoro na, a gi vi skat skat cuw. A yi ziri mizile mekemey ati mongosohoy le ma.

²⁴ Nohoro, ti naŋ misi ti vi kukur cuw nga ngoltir na, a yi Tera.

²⁵ Nahoro, a dirba naŋ miya Tera na, a gi vi skat ti kuruˀ nga ngoltir. A yi ziri mizile mekelemey ati mongosohoy le ma.

²⁶ Tera mindila vi kukur tarnaˀ na, a yi Abram, Nahor waɗ Haraŋ.

²⁷ Dideˀ ngi Terahay anihĩ: Tera a yi Abram, Nahor waɗ Haraŋ. Haraŋ a yi Lot.

²⁸ Haraŋ a muc, naɓa Tera naŋ da ar siifa aruŋ, a muc ar walahay Ur, hirwuy Babiloŋ.

²⁹ Abram ati Nahor a zuɓam ngwasay. A zilaka ngwas ngi Abrama Saray, yo ngwas ngi Nahoro kwana, a zilaka Milka, zuŋ ngi Haraŋ. Haraŋ i cine ngi Milka ati Yiska.

³⁰ Saray i dirlay, a yi ta.

³¹ Tera a zuɓa mangal naŋ Abram ati dideˀ naŋ Lot mangal ngi Haraŋ, waɗ Saray dideˀ naŋ, ngwas ngi Abram. Taŋ gar a slikiɗam baɗ a Ur, hirwuy Babiloŋ nga hirwuy Kanaˀan. A ndilam a Haraŋ, pam a diga

³² Tera a gi vi skat skat cuw ti zlum a dirba nah, a muc a Haraŋ.