ZEREMI 19 - Bible en langue guiziga

Kukulum muwaha

¹ Bumbulvuŋ a ɓa Zeremi na: «A ra hiɗik kukulum, wini mizli micawwahay ndac a wuzla mizli waɗ a wuzla masayaya ma.

² A dirba nah, kisa ra bi ar hurjijiŋ Ben-Hinom misi tir vay mizlingre ngi gigaˀayay na, ɓa ki til mi a diga ti ɓi ya masa ɓuw di ɗaˀ ɗaˀ na gar.

³ Ki sa ɓi na: Buy Zudahay ati mizli Zeruzalemey, cinaka mingiɓi ngi Bumbulvuŋ. Bumbulvuŋ misi gidaŋ wãˀ, Buymisemuŋ ngi Israyel a ɓi na: I wuɗ i slino bonoy ng'ar li misenna, ko wa gar misa cine ɓi nah le na, a digislaŋ kiriŋ.

⁴ Keɗ keɗ na, mizli Zudahay a pulikiy le, taŋ mawuram gwat taŋ mavuka taŋ da kulihey ara na, a mbiɗaka le, mbak anta sin mata. I kulihey misi a jinaka taŋ vuna gu ta, a jinaka cine taŋhaya gu ta, yo ko a jinaka buy ngi Zudahaya gu ta ma. A nahaka li hana le ti pumbus ngi ziri migam gwat ta.

⁵ A ɗiyam li ɗingir ɗingir da Baˀal, ɓa a gam mikuli mizlam zlam ti ziri taŋhay anga da Baˀala. Nah na, i gwat ya muvula taŋ jiviɗ naŋ ta ma kini, ko i ɓa taŋ vur ɓi nah ɗaˀ ta, yo ko ɓi nah a so ar wuluk ɗu ɗaˀ ta ndiɗaˀ si.

⁶ Ya Bumbulvuŋ i ɓi na, yo mbak ɗagay so, hin ara ndilawa, anta sa zilaka li hana ‹Tofet› malla ‹hurjijiŋ Ben-Hinom› mata, amma a sa zilaka ‹hurjijiŋ ngi ngizla vu›.

⁷ Ar li misenna, ɓi ngi zumabuy ngi ngomna ngi ruwuy Zuda ati ngi walahay Zeruzalem na, i sa geˀ geˀ kiɗip, i sa kiɗa mizli ti maslalam daˀ a mbuŋ mesene taŋhaya, i sa vula taŋ vuna asi haŋ ngi mizli muroko ti may ngi kiɗ taŋ vuna si, i sa pula vagay taŋhay mupuyas kuros na da ɗiyuw ngi ɓuhoy ati gwat misãmi ngi si ruwuyoy, a humbuɗaka taŋ.

⁸ I sa tiri ti walahay Zeruzaleme daŋ daŋ, sey tuwuy ngi bonoy ara tewle. Mbur masa cuh ti cikeˀe gar na, a sa zumaŋ hirnga: naŋ misa pura hiryi nah le keɗ keɗ na, a sa hiziga widi ti zluwun.

⁹ I sa ga ɓa a zumam useˀ ngi ziri taŋ mizilehey ati ngi ziri taŋ mongosohoy. Mesene taŋhay mawuɗam kiɗ taŋ vagay vagay masa gaka taŋ bonoy, yo masa muɗaka taŋ didak haɗa na, hã a sa humbuɗam vu ar wala taŋ.

¹⁰ Ki sa waha kukulumo daˀ a mihiri mizli makusukuw na.

¹¹ Joˀ kisa ɓa taŋ: Bumbulvuŋ misi gidaŋ wãˀa, a ɓi na: I ngurufo mizli hanayna ati walahaya, kaɓa mangurufom gwat mindira le, misi a juɓ gu mata. A sa dikaka vagay ngi mizli mumucahaya a Tofet, asi li ngi dik taŋ anta.

¹² Gwat ya maga da li hana waɗ da mizli ngi raˀahaya i nah so, i tiri ti walahay hana kaɓa Tofet. I ya Bumbulvuŋ maɓi.

¹³ Hay misi dili ngi Zeruzalemey ati ngi buy Zudahaya, a sa tiram kaɓa li ngi Tofet. Naŋ kanah, waɗ gbale tayna gar, mawuram gwat taŋ mavulaka taŋ da gwat ngi muŋhoy a hirnga taŋ, yo mapuslam kulihey ara na gar.

¹⁴ Zeremi a mo ti Tofet, li Bumbulvuŋ mislinaŋ nga njika ɓi naŋ a diga tuwa, ara cici deŋ a wazlaray Bumbulvuŋ, dar a ɓa mizli gar:

¹⁵ «Bumbulvuŋ misi gidaŋ wãˀ, Buymisemuŋ ngi Israyele, a ɓi na: Bonoy ngi gihey mimbizeˀ mbizeˀ a kwacay ɗu gar na, i sa ga taŋ angi walahay hana, asi a gaka hirnga taŋ gidaŋ, yo a ngumam cine mingiɓi ɗu ta.