ZEREMI 11 - Bible en langue guiziga

Mizli mingilaka ɓi ngi jumoˀay taŋ le ati Buymisemuŋ

¹ Bumbulvuŋ a ɓa mingiɓi naŋ da Zeremi ani:

² «Cinaka ɓi ngi jumoˀay hana, kisa ɓa ɓi nah da mizli Zudahay ati Zeruzalemeye.

³ Ki sa ɓa taŋ na: ‹Bumbulvuŋ Buymisemuŋ ngi Israyele, a ɓi na: Mbur macina ɓi ngi jumoˀay hana ta na, i bonoy ava.

⁴ I ɓi ya miɓa ɗaˀ le da dideˀ kumoy, ti di ya mabo taŋ ti ruwuy Ezipte, li ngi bonoy tuwa. I ɓa taŋ na: Cinaka mingiɓi ɗu, yo ɓi ya mawuɗ na, gam di slra, ɓa kisa tiram mizli ɗuwoy, ya kwana, i sa tiri Buymisemuŋ kum.

⁵ Ɓakanah na, ya miɓa ɓi madiɗa ɗaˀ le da dideˀ kumoy, i sa vula taŋ hirwuy misi ɗuwa ati mam maɓulom ara tuwa na, i sa ga gisiŋ. Na wurenna, a tiri le i hirwuy kum.›» Dar yi mbiɗaŋ di: «Haˀaw Bumbulvuŋ ɗu!»

⁶ Bumbulvuŋ a ɓiy: «A ra til mi ti ɓi hana gar ar walahay Zudahay waɗ a jiviɗ madiɗa ngi Zeruzalemey, ɓi na: Cinaka ɓi ngi jumoˀay hana, yo gam di slra.

⁷ Diga ya mubo ti dideˀ kumoy ti ruwuy Ezipte, hã dana na, i hurdum le ɓa a tiɓaka ɓi ɗu, i hurdum le is mbeˀ mbeˀ, mbak le anta, i ɓa taŋ: «Cinaka mingiɓi ɗu!»

⁸ Amma ko a cinikiy di ta, a jikam slimiɗ neˀ le aseˀe ta, ko wa gar na, a cici kaŋ kaŋ ti cin ta naŋ malambaˀ muwãˀ na. Ɓi ngi jumoˀay, ya miɓa taŋ di gar, anja ɓa a gam di slra, taŋ mungumam ta tuwa na, dar yi mbiɗa taŋ hirnga ti ɓi mutoho ngi raˀa gar.»

⁹ Bumbulvuŋ a ɓiy na: «Gidiɓi ada ar wala ngi mizli Zudahay ati Zeruzalemeye.

¹⁰ A mam le ng'ar mungra ngi dideˀ taŋhay mungumam cine mingiɓi ɗu ta tuwa. Taŋ kwana, ara sipam kulihey, ara huruk hurukam a mbuŋ taŋ. Mizli Israyeley ati Zudahaya, a ngilaka ɓi ngi jumoˀay, ya mujumo zleˀe ati dideˀ taŋhay tuwa le.

¹¹ Akẽh na, Bumbulvuŋ a ɓi, yo mbak ɗagay so: ‹i sa so taŋ ti bonoy misi taŋ mabam ti raˀa gu ta. A sa zilikiy ɓa i kilo widi taŋ, amma ko y'anta sa cine taŋ di ta.

¹² Akẽh na, mizli Zudahay ati Zeruzalemeye, a sa tumbuloko kulihey, taŋ migaka taŋ mikuli ngi wur ti wur tuwa, amma kuli tayna anta sa lahaka taŋ ar hin ngi bonoy taŋ na gu ta.

¹³ Hey Zudahay, kuli kumoy a gam le haɗi teˀe, kaɓa walahay kumoy mihaɗa na ya. Zeruzalemey, li gi mikulihey kum miɗiyaka taŋ ɓa ngi gi mikuli ngi wur ti wur da Baˀal kuli Mesem na, taŋ haɗi teˀe kaɓa jiviɗ kumoy na ma.›

¹⁴ Amma ka Zeremi, ko ki cufuɗiy ar deɗe ngi mizli hanayna ta. Ko ki tuwuy vur taŋ ta, ki tumbuliy ta. Taŋ masa zilikiy tapas hin ngi bonoy taŋ na, y'anta sa cine taŋ di ta.

Israyel i tutumbur ngi Bumbulvuŋ masa ngumakaŋ

¹⁵ Buymisemuŋ a ɓi: «Mizli misi ya mawuɗ taŋ haɗa jak na, ara gam gwat ngi mesem kuyta wãˀa, a soko ngi gi mi a hay ɗu aruŋ maka? Gwat taŋ maɓikiy di ɗaˀ ɗaˀ le, ati useˀ taŋ magikiy di mikuli na, a waka kaɓa a ɓula bonoy taŋ na gu sukwani? A waka kaɓa a sa laham vur gwat misi ka tayna vuna gu sukwani?

¹⁶ «Tutumbur mutukuf tukuf ndrehhe, mukuy, asi yi ɗik mimezle haɗa.» Hana islimiɗ Bumbulvuŋ mucuw di. Amma ˀay micin kaɓa ndisl ngi vuŋ na, i bula vu da ka laf naŋhaya biwbiw, waɗ mihaŋ naŋhaya kiɓac kiɓac.

¹⁷ Muhurvuw i Bumbulvuŋ misi gidaŋ wãˀ, muzulo bonoy madiɗa nga hirnga ɗik i naŋ, asi malambaˀ ngi Israyeley ati Zudahay migaka na: a jakaŋ mevel le ti gi mikuli ngi wur ti wur da Baˀal.

Zeremi, mizli ngi hay naŋhay tehhe musurokoŋ mi

¹⁸ Bumbulvuŋ a fiy ɓi nah, yi sla wala nah le, akẽh na, i pura gwat ngi gi taŋ le muduba.

¹⁹ Ya zleˀe, ya kunum kunum kaɓa tumuŋ ma ram di nga sli ˀay, dambalaka ara gam gidiɓi ar ya na, yi si na zleˀe ta. A ɓam: «Ngumukum widis hana ti tukuzo nah, susuyumukum di tisi ruwuy ngi mizli misi ti siifahaya, anja mizli a ɓaka ɓi ngi slimiɗ naŋ ɗaˀ le avu mi mata wãˀ!»

²⁰ Dar Zeremi a ɓi: «Naka Bumbulvuŋ ɗu misi gidaŋ wãˀ, ka ki zumabuy ngi ɗike jeŋ jeŋ, ki ɗumburo ɓi ngir mevel ati wuluk ngi mburo, puliy ɓa i puraka mapula cuwal ɗu avu taŋ na, vur mike na, i pula ɓi ɗu le gar asi haŋ ɗiki.

²¹ Yo mbak ɗagay so, hana i mingiɓi ngi Bumbulvuŋ a hirnga mizli Anatotoy mawuɗam muc ɗu na, a ɓikiy: «Ki njik ɓi ngi mbuŋ ti slimiɗ ngi Bumbulvuŋ mata, da kine ta na, kisa muc asi haŋ ndra!»

²² Bumbulvuŋ misi gidaŋ wãˀa, a ɓi na, yo mbak ɗagay so: «I wuɗ i guco mi da mizli tayna: gawla taŋhay a sa micam ti kiɗ ti maslalam, ziri taŋ mizile ati mongosohoy a sa micam ti may.

²³ Mizli Anatotoyo, ar vi ya masa taŋ ngizla taŋ na, ko mbur masa ndir ti siifa loŋ asi taŋ anta, asi i sa slino taŋ bonoy madiɗa.»