TIMOTE MUDUMBUŊ NAŊ 4 - Bible en langue guiziga

Mizli madubunam ɓi mijeŋ da mizli

¹ ˀUf Mipal ara ɓa njah: angi hin ngi dirba na, mizli mekelemey a sa pulaka tiɓi, a sa sipam ɓi ngi setenehey mitikinam mizli, yo a sa vulaka vu taŋ da ɓi ngi milyamay manjikaka taŋ di.

² Miɓi mi cuw cuwoy ati misi slirey a sa zizaka taŋ. Wuluk ngir mevel ngi mizli tayna, i muzluma le ti ɓiri munjulili.

³ A sa tikaka ɓi ngi zuɓa zil ati ngwasa, waɗ ɓi ngi zuma gwat mekelemeye. Amma Buymisemuŋ a ga gwat ngi zumoy gar, ɓa mitiɓihey misinaka ɓi mikaslsla le kuy kuy na, a zumaka ti gaŋ sise.

⁴ Asi gwatay Buymisemuŋ miga taŋ gar na, taŋ mezleŋ, ko ngi hizik purla avra, anta, amma sey i zumaka taŋ ti ga sise da Buymisemuŋ.

⁵ Asi mike na, gwat ngi zum gar na, mingiɓi ngi Buymisemuŋ ati diradibiɗe, a tiri di ɓa Buymisemuŋ a pura kuy.

Mbur mezle migi slra ngi Yesu Kristu

⁶ Dubuna gwat tayna cek da sukum ɗik mitiɓiheye: naɓa ki mbur mijini vu mezle ngi Yesu Kristu. Ki sa biga, mavuluw gidaŋ, i ɓi ka mitiɓa waɗ ɓi mudubunukuw di kuy kuy, ka misipa hirdam hirdam na.

⁷ Mambaˀ ngi gilaway ati cikisla ɓi ngi madangwasay na, zliɗa taŋ kileŋ avra. Zuwen sirka vu ɗike ti sipa jiviɗ ngi Buymisemuŋ jaka.

⁸ Asi mike na, sirka dumvu ti gi gwat na, naŋ kuy vur gwat neˀkini si. Amma sipa jiviɗ ngi Buymisemuŋ na, naŋ kuy vur gwat gar, asi a biga ndra ɓi miɓa ɗaˀ le ngi luuma siifa wurenna waɗ nga mbuŋ ma.

⁹ Ɓi hana, i ɓi mijeŋŋe njah wãˀ, yo a ndila le ɓa mizli a tiɓaka kuy kuy wãˀ, ar li gar.

¹⁰ Da i ra gam slra gǝr gǝr, yo da i ra cikam di vu na, asi i njaham hiri njah ar Buymisemuŋ misi ti siifa, malaha mizli gar, wãˀ naŋ na, mitiɓihey.

¹¹ Kuta misikristuhoyo ti ɓi hana gar, dubuna taŋ di.

¹² Vur ka ki zuŋ aruŋ si na, anja ko ki pula mbur a hirsuw ta. Amma anja ki ɓi ɓi mezle jaka, gwat ngi gi ɗike mezle, ki wuɗ vu, ki tiɓi, ki ci ar dili ta, ɓa mitiɓihey a sipaka sar ɗike.

¹³ Vula vu ɗike ngi slufa Ɓimutoho a wuzla mizli, ngi vula taŋ gidaŋ, dubuna taŋ gwat cici, hã tapas ya masa ndilawa.

¹⁴ Gwat ngi gi ɗik, Buymisemuŋ muvuluw di a hur ɗik, mijiviɗey muvulukuw di, jom ati mizli micawwahay mubucukuw haŋ a hirnga na, ki burɗa ta.

¹⁵ Gwat ngi ji kaw a mevel ɗik i hana, yo hurdum di hirdam, naɓa mizli gar a sa puraka slra ɗike, ara ru nga mbuŋ nga mbuŋ.

¹⁶ Ji lesl vur hirnga ɗike, yo vur gwat ka madubuna da mizli, cici zlak anga. Da kanah na, naɓa kisa laha hirnga ɗik vuna, waɗ mizli macinaka mingiɓi ɗike gar gisiŋ.