TIMOTE MUDUMBUŊ NAŊ 3 - Bible en langue guiziga

Madiɗa ngi Cikil ngi misikristuhoy

¹ Da mbur a hĩyã le ɓa a cifi madiɗa ngi Cikil ngi misikristuhoy na, a hiyĩ slra mezle le. Ɓi misenna a ndila le njah wãˀ.

² Mbur madiɗa ngi Cikil ngi misikristuhoyo, anja i mbur misi ti ɓi a hirnga naŋ ta, i zil ngi ngwas purla, a si mbaazla haɗa ta, a gi lambaˀ lambaˀ ta, a ndir ti lesl, a tiɓi mizli a hay naŋ kuy kuy, sey i mbur mindila le ngi dubuna gwat da mizli.

³ Anja i mbur miwi ti mbaazla ta, i mbur muwuɗa mi ta, amma i mbur mileleŋ, anta tiri ta, yo i mbur misi may dala ta ma.

⁴ Anja i mbur misina ji haya le, a si na ji haŋ ziri le, a cinakaŋ mi, a ɗuvakaŋ hirngaŋ.

⁵ Asi mike na, da mbur a si na ji hay nga naŋ vuna ta na, a sa ja Cikil ngi misikristuhoyo gu mbri mbrike?

⁶ Anja i mbur mici wureˀ ar jiviɗ ngi Kristu ta. Da kanah na, naɓa huhumvu a sa baŋ sar, Buymisemuŋ a sa gaŋ kiita kaɓa ngi Satan.

⁷ Anja ma na, ko misikristuhoy ta kwana, a ngilam di wuy. Da kanah ta na, mizli a sa singiram angaŋ, joˀ Satan a sa jaŋ ti mazaɓ naŋ.

Mijini vuhoy a wuzla misikristuhoy

⁸ Mijini vuhoy a wuzla misikristuhoy kwana, anja i mizli mindilaka le ya. A ɓam ɓi dar purla, a sam mbaazla haɗi ta, a lumaka gwata ti jiviɗ malambaˀ ta.

⁹ Ɓi masli wasla ta ngi tiɓi a mevel na, sey a jaka a hirnga ti mevel purla.

¹⁰ Anja mizli a cam a kwacay taŋ ɗagay, da ɓi ngi mbiɗa taŋ hirnga aseˀe anta na, a sa gaka slra ngi jini vu so.

¹¹ Ngwasay kwana, anja i ngwasay mindilaka le ya. Anja i micikisla ɓihey ta, a sam mbaazla haɗa ta, taŋ teŋteŋ ar gwat gar.

¹² Anja mbur mijini vu, sey i zil misi ngwas purla, a si na ja haŋ ziri naŋhay ati hay nga naŋ le.

¹³ Asi mizli mijini vuhoy kuy kuy gar a wuzla misikristuhoy na, anja mizli a ngilam wuy ti taŋ kuy kuy, naɓa ɓi taŋ mitiɓaka tisi Kristu tuwa na, a sa ɓaka gu manja zluwun.

Ɓi madiɗa miyaŋŋa

¹⁴ Ya matuhuw ɗerewol hana na, ti njaha hiri, neˀ nga mbuŋ aka, i sa ru nga pur ɗike.

¹⁵ Asinta, da ko i sa mur le nga pur ɗike kwana, ɗerewol ya mutuhuw di hana, a sa buguw jiviɗ ɓa ki si na gwat ngi gi ɗik a wuzla mizli ngir hay ngi Buymisemuŋ, mbiɗeˀvra: Cikil ngi misikristuhoy, jum ngi Buymisemuŋ misi ti siifa, yo ɓamtal ngi jaha ɓi mikaslsla.

¹⁶ Gisiŋ, ɓi mufuna wuluk ngi mbur, ndra masipaka na, i ɓi madiɗa! Yesu Kristu a bugo vu ti dumvu ngi mbur, ˀUf Mipal a biga le, naŋ jeŋŋe, modro ngi Bumbulvuŋhoy a purakaŋ le keɗ keɗe, a tilam di mi le a wuzla sukwi ngi mizli, duniya keɗeɗe a tiɓakaŋ le, yo a zuɓaka le nga luuma dudok a muŋ.