TIMOTE MUCUW NAŊ 4 - Bible en langue guiziga

¹ I ra guw ambuh ambuh a mbuŋ Buymisemuŋ waɗ a mbuŋ Yesu Kristu masa so ngi ga kiita da mizli misi ti siifahay ati mumucahay na, ambuh ti slimiɗ naŋ masa njiko vu waɗ ti Zumabuy naŋ na:

² Til mi ti ɓi ngi Buymisemuŋ, hurdum di, ko angi hin mezle malla angi hin malambaˀa. Biga malambaˀ ngi mizli, guco taŋ mi, vula taŋ gidaŋ, yo ga ndrehhe ti ɓusa ɓi waɗ ti dubuna taŋ gwata.

³ Naŋ kine, hin a sa ndilawa, tapasa, mizli mekelemey anta sa wuɗam cine dubun mijeŋŋe mata. Amma a sa sipam gwat makiɗa taŋ may, yo a sa cikilam mizli sikinih ngi dubunaka taŋ gwat ngisi mevel taŋ.

⁴ Tˀanta sa wuɗam cine ɓi mikaslsla mata, amma a sa mbiɗam hiri ngi cine mambaˀ lambaˀhay jaka.

⁵ Amma ka so na, jigina vu ɗik ar gwat gar. Ɓusa bonoyo, ga slra ngi tila mi ti Ɓimezle. Kiɗa mi ngi slra ɗike.

⁶ Ya kwana, i sa cuh le gweˀe, ani hin ɗu a ndilo le, ɓa a gam ti ya mikuli.

⁷ Yi cik vu le ti gi vurum mezle, yi kiɗa mi ngi pi mi ɗu le. Yi ja tiɓi ɗu le a mevele.

⁸ Wurenna, migir ɗu asi ya mulum bugawla na, ara kutukuy, i loppol mijeŋŋe, Bumbulvuŋ migi kiita mijeŋŋe masa vuliy di tapasa. A sa vula da ya pal ta ɓula, amma da mizli gar mawuɗam kutuk naŋ ɓa a bugo vu.

Gwat Pol vuna mupura

⁹ Tum vu, ɓa ki so lumiy kutum.

¹⁰ Asi Demas a puliy le, vur a wuɗ gwat ngi duniya hana haɗa. Aru le nga Tesalonik, Kresaŋ aru le nga Galati. Tite kwana, aru le nga Dalmati.

¹¹ Misi ati ya aka, i Luk pal naŋ. Zuɓo Marke, so di a haŋ, asi i mbur mupuɗaw wãˀ avu ya ngi gi slra.

¹² I slina Tikike le nga Efez.

¹³ Da ki ra so na, godo ya mupula a Trowas a hay Karpos na, zuɓiy di a haŋ, waɗ ɗerewoloy, wãˀ naŋ na, ɗerewol ngi garakay na.

¹⁴ Alekzaŋdir, mbur gudi na, a giy malambaˀ le haɗa. Bumbulvuŋ a sa wurkaŋ weˀe avu gwat naŋ miga na.

¹⁵ Ka kwana, ji lesl avu mbur nah, asi a cici le kaŋ kaŋ, anta ngum tiɓa mingiɓi ndra ta.

¹⁶ Ti ya miɓa ɓi ngi laha hirnga ɗu sar mudumbuŋ ar kiita na, ko mbur deŋ a ciki ɗu anta, a pulikiy le fuku. Anja Buymisemuŋ a slufa ɓi nah ka ɓi ta.

¹⁷ Amma Bumbulvuŋ, naŋ a jiniy le, a vuliy gidaŋ le, ɓa yi til mi ti Ɓimezle kuy kuy wãˀ, ɓa hã mizli Yudehey ta gar kwana, a cinam. Yo a lihiy le ti balam moboro.

¹⁸ Bumbulvuŋ a sa cukiy avu ɓi malambaˀhay gar. A sa lihiy ng'ar li Zumabuy naŋ a muŋ. Anja mizli a gakaŋ dudok ndrehhe hã ngi sete. Amin.

Ji haŋ ngi kiɗa mi naŋ

¹⁹ Ja haŋ da Prisil ati Akilas, waɗ da mizli ngi hay Onesiforoy.

²⁰ Eraste a ndir le a Korenti. I pula Trofime a Mile, asi naŋ guta.

²¹ Kiɗ vu, ɓa ki so dumbuŋ angi kiya ngi himiɗe. Ebul, Pudeŋ, Linus, Klodiya ati sukum ndra mekelemey gar na, a jukuw haŋ le ya.

²² Anja Bumbulvuŋ a ndir avu ka. Anja a gukum mezle gar kumo.