TESALONIKEY MUCUW NAŊ 3 - Bible en langue guiziga

Diram dibiɗ vur ndra

¹ Sukum ndrahay, ɓi mindir ngi ɓukum di na, anihĩ: diram dibiɗ vur ndra ɓa ɓi ngi Bumbulvuŋ aru nga mbuŋ kutum kutum, yo ɓa mizli a duduɓaka ɓi nah kaɓa kum mududuɓaka a hay kum na ya.

² Tumbuloko Buymisemuŋ ma ɓa a laha ndra avu mizli malambaˀ misi moˀoreheye. Asi matiɓaka Ɓimezle hana, i mizli gar ta.

³ Amma Buymisemuŋ naŋ kaslsla. A sa vulukum gidaŋ, a sa jiginukum avu Satana.

⁴ Asi ndra mujom ati Buymisemuŋ na, kumo, i sinukum le njah, gwat ndra muɓukum di le ngi gi gar na, ki ra gakaŋ, yo kisa gaka nga mbuŋ ava na si.

⁵ Anja Bumbulvuŋ a bugukum jiviɗ ngi wuɗa Buymisemuŋ a mevel kumo ati ngi ɓusa ɓi Kristu muɓusa na ya.

Gi slra i gwat mupuɗaw wãˀ

⁶ Sukum ndrahay, ambuh ambuh kum, ti slimiɗ ngi Buy ndra Yesu Kristu: sukum kum masafayahay ati masipaka ɓi ndra madubunukum di ta gar na, kiraham kileŋ avu taŋ.

⁷ Kumo, ki sinaka sipa sar ndra le kuy kuy, asi ndra micifam a wuzla kumo zleˀe na, ndr'i masafayahay ta.

⁸ Ɗaf ndra muzumaka na, i cufuɗam ɗaˀ avu mbur ta wãˀ. Amma duvuɗ ti papas gar na, i ra gam slra hã i giram kupuyah kupuyah wãˀ, ɓa i vulam gir da mbur pal a wuzla kumo ta.

⁹ Anja zliv ndr'ada ti jiviɗ ɓa i cufuɗukum, ki jinam ndra vuna zleˀe ngbaŋ, amma ndr'i wuɗam na, ɓa bugukum gwat mezle ngi gi.

¹⁰ Naŋ kine, ti ndra misi zleˀe a wuzla kumo, i ɓukum na: «Da mbur a ngum ngi gi slra ta na, anja a zum gwat ta ya.»

¹¹ Ani, i cinam ma na, mizli mekelemey ada a wuzla kumo, i masafayahay, a cam tos tos lambaˀ ar ɓi ngi mizli, t'anta ngumam gi slra ta wãˀ.

¹² Mizli misi ka tayna na, anja a gam slra ti mi teˀteˀe, ɓa a zumam gidaŋ taŋ. Ndra maɓaka taŋ ati ndra makutaka taŋ kahana na, ti slimiɗ ngi Buy ndra Yesu Kristu.

¹³ Kumo so na, sukum ndrahay, anja ki pulaka gimezle ta.

¹⁴ Da mbur anta ngum tiɓa ɓi ndra maɓaka angi ɗerewol hana ta na, jaka buy naŋ kaw a hirnga kumo. Anja ki jumom ati naŋ mata wãˀ, ɓa a gaŋ mesem.

¹⁵ Na so na, anja ki puraka kaɓa i mesene kum ta ɓula, amma kum kutakaŋ kaɓa i sukum kum misikristu si.

Ɗuwula mi ati ji haŋ

¹⁶ Anja Bumbulvuŋ, buy ngi zuyo, naŋ ti haŋ naŋ a vulu kum zuy ndrehhe ti jiviɗ wal wal gar. Anja Bumbulvuŋ a ndir ati kum gar.

¹⁷ I ya Pol majukum haŋ ti haŋ ɗu. Ɗerewol ya matoho taŋ gar na, i ɗuva haŋ ɗu angi taŋ, i toho kahana.

¹⁸ Anja Buy ndra Yesu Kristu a gukum mezle gar kumo.