TESALONIKEY MUCUW NAŊ 2 - Bible en langue guiziga

Slikiɗaɓi ngi durba wãˀ

¹ Kum sukum ndrahay, vur ɓi ngi so ngi Buy ndra Yesu Kristu, yo ndra masa ra kusom acikeˀe na, ambuh ambuh kum,

² da ko mbur a ɓukum le: hin ngi so ngi Yesu a ndilo le kwana, anja ki pulaka lesl kum a hiryi kutum kine ta, ko ki zluwunam ta. Mudum ta na, mbur mekelema ɓukum le, kaɓa i Buymisemuŋ minjikaŋ di, malla ko a tulukum di mi le ti til, malla ko a ɓukum le, kaɓa i tohoko ɓi naŋ le angi ɗerewol kwani.

³ Anja ko ki pulaka mbur a gukum gilaw ko ti ɓi wanaka ta wãˀ si. Asi hin nah na, anta ndilo lambaˀ kine ta, amma sey slikiɗa ɓi ngi durba wãˀ, yo mbur misi moˀore, muzuwulakaŋ ngi zizi angi vu na kwana, sey naŋ mubugo vu le ɗagay.

⁴ Gwat gar mizli mapuraka kaɓa i bumbulvuŋ, malla madilkam a mbuŋ naŋ gar na, mbur misi moˀore nah na, a sa tika mizli ɓa a dilkam a mbuŋ naŋ ta. Hã a sa ci angi hay ngi Buymisemuŋ, naŋ ti hirnga naŋ a sa til mi, a ɓi: «Yi Buymisemuŋ.»

⁵ Ti ya misi zleˀe a wuzla kum na, i ɓukum ɓi ngi gwat nah le, ki sinaka mata kwa?

⁶ Amma ki sinaka le, gwat nah magi wurenna t'aruŋ na, gwat mitik naŋ ada. Da hin naŋ misa ndila le na, a sa bugo vu.

⁷ Asi mbur misi moˀore, ara ga slra naŋ muɗum ti ɗum vuna si. Mindir wurenna, ɓa mitik naŋ a kirih avra tewle.

⁸ A dirba nah, mbur misi moˀore tuwa a sa bugo vu, dar Buy Yesu, ti naŋ masa so na, a sa kiɗa vagay ti himiɗ ngi balam naŋ, yo a sa zizaŋ wãˀ ti wucuɗ naŋ.

⁹ Misi moˀore nah masa so na, a sa so ti gidaŋ ngi Satan. A sa bugo vu ti gi gwat madiɗahay ti sukwi wal wal, cekenehey ati gwat migam ɗaˀ tahay ngi gi gilaw da mizli.

¹⁰ Mizli masa zizam gar na, a sa tikina taŋ ti slra malambaˀ miwal wal gar, asi wuɗavu ngi ɓi mijeŋŋe ngi Buymisemuŋ masa laha taŋ zleˀe na, a ngumam tiɓi naŋ ta.

¹¹ Vurˀe, Buymisemuŋ a slino taŋ gidaŋ ngi ziza vu a mevel taŋ, ɓa a tiɓam nga taŋ i ɓi ngi slirey,

¹² ɓa mizli matiɓaka ɓi mikaslsla ta ati mamumuloko mungra gar na, Buymisemuŋ a sa ga taŋ kiita.

Buymisemuŋ a wunukum le ɓa ki laham

¹³ Kum sukum ndrahay, kum Bumbulvuŋ mawuɗokum na, sey ndr'i gaka sise da Buymisemuŋ ndrehhe vur kumo. Asi Buymisemuŋ a wunukum le zle dumbuŋ, ɓa ˀUf naŋ a luhukum, ˀUf naŋ matiri ti mburo, naŋ pal, yo asi kum matiɓaka ɓi mikaslsla na.

¹⁴ I tulukum mi ti Ɓimezle le. Buymisemuŋ muzulukum ng'ara na, ti naŋ, ɓa ki lumam dudok ngi Buy ndra Yesu Kristu.

¹⁵ Naŋ kine so, sukum ndrahay, cicam zlak kuy kuy, gwat ndra mudubunukum di na, ko da i ɓukum di ti mi ɗaˀ ɗaˀ, malla ko da i tuhukum di ti tuh angi ɗerewol kwana, kum jaka ɓi nah kuy kuy a hirnga.

¹⁶ Anja Buy ndra Yesu Kristu ti haŋ naŋ ati Cine ndra Buymisemuŋ muwuɗ ndra, naŋ mitisla ndra mevel tisi gi mezle naŋ ngi sete, yo naŋ mijina ndra ɓa i njaham hiri njah kuy kuy na,

¹⁷ a tuslu kum mevel, yo a vulukum gidaŋ angi gwat mezle kum magaka gar waɗ angi ɓi mezle kum maɓaka gar.