SLUFA VU 9 - Bible en langue guiziga

Hin ngi muguzlum Pak

¹ A wuzlaɓuh mikirɗak kirɗak ngi Sinay, ar kiya mudumbuŋ ngi vi mucuw naŋ, a dirba Israyeley muboko ti ruwuy Ezipte, Bumbulvuŋ a ɓa Moyise na:

² «Anja Israyeley a gaka muguzlum Paka ar hin naŋ muɗuva.

³ Ki sa gaka ar hin kuruˀ nga mufaɗ ngi kiya hana, ti li zuyyo. Ki sa gaka mezegwel ngi Paka kasl kasl, kaɓa kum misirkoko di.»

⁴ Moyis a ɓa Israyeleye, ɓa a gaka muguzlum Paka.

⁵ A gaka a wuzlaɓuh mikirɗak kirɗak ngi Sinay, ti li zuyyo, ar hin mukuruˀ nga mufaɗ ngi kiya mudumbuŋ. Israyeley a gaka kasl kasl kaɓa Bumbulvuŋ muɗuva da Moyis tuwa.

⁶ Dambalaka, mizli ada asi taŋ, a gam muguzlum Paka ta, asi taŋ ti dili, a jam haŋ le avu vagay ngi mbur. Vurˀe, ara lumaka Moyis ati Aroŋ tapasa kalla,

⁷ a ɓaka Moyise na: «Ndra ti dili, asi i jam haŋ le avu vagay ngi mbur. Na, ɓa ngi vula gwat da Bumbulvuŋ kaɓa Israyel mekelemey gar, ar hin muɗuva na, ngi ndra jiviɗ anta vurmike?»

⁸ Moyis a mbiɗa taŋ di: «Kwaɗay, da Bumbulvuŋ a ɓi vur kumo mbrike na, sey da i cin le ti vaˀaŋ.»

⁹ Bumbulvuŋ a ɓa Moyise na:

¹⁰ «Ɓa Israyeleye na: Hirak ti muguzlum Paka, da mburo naŋ ti dili, asi a ja haŋ le avu vagay ngi mbur, malla asi a zuɓ mulak le kileŋ na, a sa ga muguzlum Paka ngi ɗuviy hirnga da ya Bumbulvuŋ. Ɓi hana, naŋ vur kum ati dideˀ kumoy nga mbuŋ gar.

¹¹ Amma mizli tayna, a sa gaka ti li zuyyo, hin mukuruˀ nga mufaɗ ngi kiya mucuw naŋ. A sa zumaka useˀ ngi zuŋ tumuŋ ti ɗaf manja ˀis ara waɗ lar miɗalak wasl wasl.

¹² A pulam is naŋ ngi tiprike ta, a wahaka tesl naŋhaya ta. A sa gaka Paka kasl kasl ka mezegwel naŋ mawuɗo.

¹³ Amma mbur manja dili, da a zuɓ mulak ta, yo a gi jalaɓi le ti muguzlum Paka na, a sa gwahaka ti wuzla Israyeley avra, vur naŋ muso ti gwat ngi vul da ya Bumbulvuŋ ar hin naŋ muɗuva mijeŋŋe na ta, mbur nah a sa jijira zayɓi ngi mungra naŋ na.

¹⁴ Mbur mislikiɗo ti slikiɗ ngi hay kumo, da a wuɗ le ɓa a ga muguzlum Paka ngi ɗuviy hirnga da ya Bumbulvuŋ na, a sa ga mezegwel naŋ kaɓa ɓi naŋ ɓi micica ati sirik ngi raˀa gar. Mezegwele naŋ purla si, vur mulakay ati Israyeleye ma.»

Gazlavay misirit ar guɗuk mipal ngi huroˀo

¹⁵ Tapas ming'aka guɗuk ngi Buymisemuŋ ngi huroˀo na, gazlavay a so sirta guɗuk misi belelerey mucuw ngi jumoˀay anga na. Ti hiikuɗo, gazlavay nah, a ga le njahha hã avu miprik.

¹⁶ A gi ndrehhe kanah: gazlavay a sirta guɗuk ngi huroˀo ngi Buymisemuŋ, ti duvuɗo, a ga li njahha.

¹⁷ Da gazlavay mislikiɗ le a hirnga guɗuko na, Israyeley a cohom kutum aya, yo ar li gar naŋ mira pi sar le na, Israyeley a paka walahay guɗuk a diga aya.

¹⁸ Naŋ kine so, da Bumbulvuŋ a pula taŋ jiviɗ le ngi slikiɗ na, a slikiɗam, da a pula taŋ jiviɗ le ngi pi na, a pam. Da gazlavay aro a hirnga guɗuko na, a slikiɗam ti walahay guɗuko ta.

¹⁹ Ko da gazlavay a zik le haɗa a hirnga guɗuko kwana, Israyeley a gaka slra ngi Bumbulvuŋ, a cohom ta.

²⁰ Pas mekeleme, gazlavay anta gi hin haɗa a hirnga guɗuko ta. A slikiɗam na, sey da Bumbulvuŋ a pula taŋ jiviɗ nah le, yo a pam na, sey da Bumbulvuŋ a pula taŋ jiviɗ nah le.

²¹ Pas mekeleme, gazlavay a ndir zle ti pastaˀ hã avu miprik tewle, malla ta na, a cici hiipas jom ti duvuɗ naŋ, da naŋ mislikiɗ le si na, Israyeley a slikiɗam ti hay taŋhay aya.

²² Amma da gazlavay a gi a hirnga guɗuko, hin cuw, ko kiya, malla ko a funa le kwana, Israyeley a slikiɗam ta. Da gazlavay a slikiɗ le na, a slikiɗam aya.

²³ Israyeley a slikiɗam, malla a paka haya na, sey da Bumbulvuŋ mupula taŋ jiviɗ nah le. A gaka slra ngi Bumbulvuŋ kasl kasl ka naŋ mudubuna taŋ di tisi Moyis na.