SLUFA VU 8 - Bible en langue guiziga

Ɗuva lampehey ar hay ngi Buymisemuŋ

¹ Bumbulvuŋ a ɓa Moyise:

² «Ɓa Aroŋ na: da ka mira bula lampehey mitarnaˀ na, anja a ciɗkam ngir tumbuŋ li ɗuv taŋ.»

³ Aroŋ a ga kanah: a ɗuva lampeheye, ɓa a cilkaka li ngir tumbuŋ li ɗuv taŋ, kaɓa Bumbulvuŋ muɗuva da Moyise.

⁴ Li ɗuva lampe i muvuɗa ti ɓiri tapasl tapasl pal naŋ, zle avu sar naŋ hã avu mufuyuk ngi kiɗa mi naŋ ndok wãˀ. A ɗiyaka li ɗuva lampeheye, kaɓa Bumbulvuŋ mibiga da Moyis vuna.

Mezegwel ngi vula levihey da Buymisemuŋ

⁵ Bumbulvuŋ a ɓa Moyise na:

⁶ «Ngica mizli leviheye ti wuzla Israyeleye sek pal, yo zuɓa taŋ dili avra.

⁷ Gwat ka masa ga ngi zuɓa taŋ dili na, ani: kuca taŋ yam ngi zuɓa dili, anja a hijaka ngwic misi avu vu taŋ cek, a bunaka zana taŋhaya, naɓa dili taŋ a zuɓ le avra.

⁸ A sa jam gusoŋ a haŋ waɗ hapa mufukuɗa ti mal aseˀe, ngi ra vul ngi gi mikuli. Ka kwana, kisa ji gusoŋ mekelem ngi gi mikuli ngi puya mungra.

⁹ Ki sa kiroho leviheye nga mbuŋ guɗuk ngi zlir ti ya Buymisemuŋ, yo ki cikila Israyeleye gar.

¹⁰ Ki sa ɓa levihey ɓa kiraham ng'avi ya Bumbulvuŋ, joˀ Israyeley a sa paka taŋ haŋ a hirnga.

¹¹ Akẽh na, Aroŋ a sa vuliy leviheye kaɓa gwat ngi mikuli, Israyeley mavulikiy di, ɓa levihey a sa ndiram hĩˀĩ ngi gi mezegwel a mbuŋ ɗu.

¹² Leviheye kwana, a sa paka haŋ taŋhay a hirnga gusoŋ mucuwoy na. Aroŋ a zuɓ gusoŋ pal, a gi di mikuli ngi puya mungra, waɗ pal numuŋ, a gi di mikuli mizlam zlam wãˀ. A dirba nah, a sa ga mezegwel a hirnga leviheye ngi pula taŋ mungraˀahaya.

¹³ Moyis, kisa cica levihey a mbuŋ Aroŋ ati ziri naŋ mizileheye, yo kisa vuliy taŋ da ya Bumbulvuŋ ar deɗe ngi mikuli.

¹⁴ Da ki ga le kine na, naɓa ki gwaha leviheye le ti wuzla Israyeleye, taŋ inga yahay.

¹⁵ A dirba nah, levihey a sa gam slra ar guɗuk ngi zlir ti ya Buymisemuŋ gu muduba. Sey ki zuɓa dili ngi levihey avra kwaɗay, joˀ kisa vuliy taŋ da ya.

¹⁶ Asi taŋ inga yahay, inga yahay gisiŋ, a wuzla Israyel mekelemeye. I wi taŋ vu le weˀ da ya, ar deɗe ngi modogom ngi mizli Israyeley gar.

¹⁷ Naŋ kine, modogomoy misi angi hirwuy Israyel gar na, inga yahay, modogom ngi mizli ati ngi ginewey gar. Zle tapas ya mikiɗa modogomoy vagay vagay angi hirwuy Ezipte na, modogom ngi Israyeley gar, i muvulahay le da ya.

¹⁸ Amma i hila leviheye da ya, ar deɗe ngi modogom ngi Israyeley gar.

¹⁹ Joˀ i vula taŋ da Aroŋ ati ziri naŋ mizileheye. A wuzla Israyeleye, a vulaka taŋ leviheye, a sa gam gawla ngi Israyeley ar guɗuk ngi zlir ti ya, waɗ ɓa a gaka taŋ mezegwel a hirnga taŋ ngi puya mungra. Naŋ kine, da ko Israyeley a gumbaˀam le ng'avu guɗuko kwana, y'anta sa ga taŋ bonoy mata.»

²⁰ Moyis, Aroŋ ati mizli Israyeley gar, a gaka da levihey kasl kasl kaɓa Bumbulvuŋ muɗuva da Moyis tuwa.

²¹ Levihey a zuɓaka dili taŋhay avra, a bunaka zana taŋhaya. Aroŋ a vula taŋ da Bumbulvuŋ kaɓa gwat ngi mikuli, dar a ga taŋ mezegwel ngi puya mungra waɗ ngi zuɓa dili.

²² A dirba nah na, levihey a zlaka slra taŋ ar guɗuk ngi zlir ti Buymisemuŋ. I Aroŋ ati ziri naŋ mizilehey mawaka taŋ ar slra. A gam ti leviheye kaɓa Bumbulvuŋ muɗuva da Moyis tuwa.

²³ Bumbulvuŋ a ɓa Moyise ma:

²⁴ «Mbur levi mindila le vi kukur cuw nga zlum na, sey a gi slra ar guɗuk ngi zlir ti ya Buymisemuŋ.

²⁵ Da a ndila le vi kukur zlum na, a pula gi slra nah, a ga mata.

²⁶ A sa jina sukum naŋhay ti jini ar li gi slra ngir guɗuk ngi zlir ti ya Buymisemuŋ na ɓula, amma i slra naŋ mihĩˀĩ mata. Ki sa ɗiya ɓi ngi slra ngi leviheye kahana so.»