SLUFA VU 31 - Bible en langue guiziga

Israyeley mikiɗam vu ati Madiyanay

¹ Bumbulvuŋ a ɓa Moyise na:

² «A ra pula cuwal ngi Israyeleye, asi Madiyanay migaka taŋ malambaˀ na. A dirba nah, kisa mucu.»

³ Dar Moyis a ɓa mizli na: «Anja mizli cah asi kum a juwam vu nga zla kiɗa vu ati Madiyanay na, ɓa i pulaka cuwal ngi mizli ndraˀahaya, kaɓa Bumbulvuŋ miɓa na.

⁴ Hilam mizli durmuk asi sukwi Israyeleye tiɗeˀe.»

⁵ Joˀ a wunam asi Israyeleye, mizli durmuk ar sukwi gar. Mizli mujuwam vu le ngi vurum, a gam jom gar na, mizli durmuk kuruˀ ngaŋ cuw.

⁶ Moyis a slin taŋ cek ng'ar vurumo, waɗ masay Pinas, mangal ngi Elazar. Pinas aru ti gwat mipal ngir hay ngi Bumbulvuŋhoy a haŋ, waɗ tulum ɓa ngi zla virzi ngi kiɗa vu.

⁷ Dar a ram nga gi vurum ati Madiyanaya, kaɓa Bumbulvuŋ miɓa taŋ di ti balam Moyis tuwa, a ngizlaka mizli mizileheye pay.

⁸ Mbak nah le ma na, a kiɗaka buy taŋhaya zlum taŋ gar: Evi, Rekem, Sur, Hur waɗ Reba. A kiɗaka Balaˀam mangal ngi Beˀoro le vagay ti maslalama ma.

⁹ Ngwasay ati ziri Madiyanaya, Israyeley a tiram taŋ bekehey, a ɓuloko ginew taŋhaya, gezleŋheye fec fec ti gwat taŋhaya gar.

¹⁰ Walahay madiɗahay misi Madiyanay ara gar na, a ɗuvaka taŋ vu div div, waɗ walahay guɗuk taŋhaya gar.

¹¹ Dar a cohom ti gwat taŋ mulumoko taŋ ar vurumo gar, mizli ati ginewey, taŋ mujoko taŋ.

¹² A cohom ti gwat tayna gar ng'ar walahay taŋ misi ar li micay ngi Moˀap, migweˀ avu mizaw Zurdeŋ, mupuɗak angi Zeriko na. A ram taŋ cek nga mbuŋ Moyis ati masay Elazar waɗ nga mbuŋ jum ngi Israyeley gar.

¹³ Moyis ati Elazar waɗ buyɓi ngi jum ngi Israyeley gar, a bam nga ji ti taŋ hirnga a duba gala.

¹⁴ Taŋ mumoko tir vurumo na, Moyis a ji mevel ar madiɗa miwi soje durmuk durmukoy ati miwi soje skat skataya.

¹⁵ A ɓa taŋ: «Ki pulaka ngwasaya cek ti siifa vurmike?

¹⁶ Ɓi ngi Peˀor na, ki sinaka le kuy kuy ngbaŋ. Balaˀam a kuta ngwas Madiyanaya, ɓa a hizigiɗaka mizli Israyeleye, a gam mungra madiɗa avu Bumbulvuŋ, a dirba nah, bonoy madiɗa a diɗ vu ar mizli ngi Bumbulvuŋhoyo.

¹⁷ Na wurenna so na, kiɗaka ziri mizileheye cek vagay vagay, waɗ ngwasay muzuɓam ziley le cek.

¹⁸ Amma ziri mongosohoy misinam ziley t'aruŋ na, ndiram taŋ da kum, ki kiɗaka taŋ ta.

¹⁹ Na kum vuna so na, mbur mikiɗ mbur le vagay malla mija haŋ le avu vagay ngi mbur gar na, a cifi a duba gala hã hin tarnaˀ. Ki sa zuɓaka dili kumoy ar hin mimakir naŋ waɗ hin mitarnaˀ naŋ. Beke kumoy a sa gaka kahana ya.

²⁰ Yo ma na, kisa zuɓaka dili ngi zanahay, gwat ngi garakay, ngi gwat mija ti ngwic ngi ˀaway ati gwat miɗiya ti dumoyo ma.»

²¹ A dirba nah, masay Elazar a ɓa sojehey mumoko tir vurumo: «Mingiɓi Bumbulvuŋ muɗuva da Moyis na, anihĩ:

²² gwat ngi ɓiri tapasl tapasl, ɓiri bara, ɓiri gaza, ɓiri ho gar, ɓiri eteŋ waɗ plom,

²³ mbiɗeˀvra gwat maɓusa vu gar na, kisa zuɓaka dili taŋ ar vu waɗ ar yam ngi zuɓa dili, yo gwat maɓusa vu ta gar na, kisa caka taŋ ar yam ngi zuɓa dili.

²⁴ A dirba kum mubunaka zana kumoyo le ar hin mitarnaˀ naŋ na, dili kumoy a zuɓam le muduba, joˀ ki cam ng'ar walahay guɗuko.»

Wunka gwat muluma ar vurum

²⁵ Bumbulvuŋ a ɓa Moyise na:

²⁶ «Ka vuna waɗ masay Elazar ati buy ngi sukwiheye, kisa slufaka gwat kum mutuɓoko taŋ ar vurumo gar, mizli ati gineweye.

²⁷ Ki sa wunka taˀ taˀ cuw, pal da sojehey miram le ar vurumo, numuŋ kwana, da mizli mindiramay na ya.

²⁸ Vay muvula da sojehey miram le ar vurum na, kisa hila mi nga ya anga: mizli titrahay skat skat zlum na, ki zuɓ pal da ya Bumbulvuŋ. Sla, zungu, tumuŋ, ˀaw migi le skat skat zlum gar na, ki zuɓ pal pal da ya.

²⁹ Mi nga ya, ka mihila na, kisa vula da masay Elazar.

³⁰ Tir vay muvula da mizli mindiramay na ya kwana: mizli titrahay kukur zlum na, ki zuɓ pal, yo sla, zungu, tumuŋ, ˀaw ati gwat misãmi mekelemeye, migi le kukur zlum na, ki zuɓ pal pal da ya Bumbulvuŋ. Ki sa vula taŋ da levihey magam slra ar guɗuk na.»

³¹ Moyis ati masay Elazara, a gaka kaɓa Bumbulvuŋ muɗuva ɓi nah da Moyis tuwa.

³² Gwat taŋ mutuɓoko taŋ ar vurum avu Madiyanaya, is naŋ mindir ani: tumuŋ ati ˀawaya, durmuk skat skat merkeɗ ti kukur tarnaˀ nga zlum.

³³ Slahay, durmuk kukur tarnaˀ nga cuw,

³⁴ zunguhoy, durmuk kukur merkeɗ ti pal,

³⁵ yo diilihey misinam zil t'aruŋ, durmuk kukur makir ti cuw.

³⁶ Reta muvulaka da mizli miram ar li kiɗa vu, anihĩ: tumuŋ ati ˀaway, durmuk skat skat makir ti kukur makir ti tarnaˀ ti skat skat zlum.

³⁷ A hilam da Bumbulvuŋ ara, skat skat merkeɗ ti kukur tarnaˀ nga zlum.

³⁸ Slahaya, durmuk kukur makir nga merkeɗ, a hilam da Bumbulvuŋ kukur tarnaˀ ti cuw.

³⁹ Zunguhoyo, durmuk kukur makir ti skat skat zlum, a hilam da Bumbulvuŋ kukur merkeɗ ti pal.

⁴⁰ Mizli titrahaya, durmuk kuruˀ nga merkeɗe, a hilam da Bumbulvuŋ mizli kukur makir ti cuw.

⁴¹ Moyis a vula mi ngi Bumbulvuŋ da masay Elazar, kaɓa Bumbulvuŋ muɗuvaŋ ɓi nah tuwa.

⁴² Vay muvulaka da mizli mindiramay na, taŋ rak rak ati muvulaka da migi vurumoyo.

⁴³ Muvulaka da jum ngi Israyeleye, tumuŋ ati ˀawaya, durmuk skat skat makir ti kukur makir nga tarnaˀ ti skat skat zlum.

⁴⁴ Slahay, durmuk kukur makir nga merkeɗ.

⁴⁵ Zunguhoy, durmuk kukur makir ti skat skat zlum,

⁴⁶ waɗ mizli titrahaya, durmuk kuruˀ nga merkeɗ.

⁴⁷ Vay muvulaka da Israyeley mindiram na, Moyis a ngic ara da Bumbulvuŋ. Mizli kukur zlum na, a zuɓ mbur pal, ginew kukur zlum na, a zuɓ pal, a vula taŋ da levihey magam slra ar guɗuko, kaɓa Bumbulvuŋ muɗuvaŋ ɓi nah zleˀe.

Madiɗa ngi sojehey muvulam gwat ngi mongoy taŋ da Buymisemuŋ

⁴⁸ Madiɗa miwi sojehey durmuk durmuk ati miwi soje skat skataya, a cikilam ng'avi Moyis,

⁴⁹ a ɓakaŋ: «Sojehey ndra miwaka taŋ na, ndra gawla ɗikey i slufaka taŋ le gar, ko mbur loŋ mindir anta.

⁵⁰ Vurˀe, i soko ti gwat ngi vul ndrahay da Bumbulvuŋ, ɓa a pula mungra ndraˀahaya. Mbur gar a vul gwat ngi ɓiri tapasl tapasl, naŋ mulumo di: sen ngi luw a ˀay, ɓalaŋ ngi haŋ, dangwa, gwat ngi slimiɗe waɗ virzle ngi ˀay.»

⁵¹ Gwat muvuɗa ti ɓiri tapasl tapasl, taŋ musoko taŋ na, Moyis ati Elazar a tiɓaka taŋ.

⁵² Madiɗa Miwi sojehey durmuk durmuk ati miwi soje skat skataya, gwat ngi ɓiri tapasl tapasl, taŋ musoko di da Bumbulvuŋ, a gi gwat ngi kilo skat ti kukur tarnaˀ.

⁵³ Sojehey ho gar na, a ndiram ti gwat taŋ mulumo di, da taŋ da taŋ.

⁵⁴ Moyis ati masay Elazar, a paka gwat ngi ɓiri tapasl tapasl, buy ngi sojehey musoko taŋ tuwa ng'ar guɗuk ngi zlir ti Buymisemuŋ, ɓa a puyuk hirnga ti Israyeleye ta.