SLUFA VU 30 - Bible en langue guiziga

¹ Moyis a ɓa ɓi Bumbulvuŋ muɗuvaŋ di tuwa cek da Israyeleye.

Ɓimujuwa vur jimi

² A dirba nah, Moyis a ɓa buy ngi sukwi Israyeleye: «Bumbulvuŋ a pulukum ɓimuɗuva naŋ ani:

³ Da mbur a ɓi le ɓa a sa vul gwat ngi mi ngi Bumbulvuŋ malla a juwa le ɓa a pul gwat na, anja a ngila ɓi nah ta, sey a gam cummo kaɓa naŋ miɓa vuna si.

⁴ Amma, da kaɓa ani: zuŋ diili a hay cine aruŋ, a ɓi le a sa vul gwat ngi ji mi da Bumbulvuŋ, malla a juwa le ɓa a gi gwata,

⁵ da cine a cine ɓi nah le, a ɓaŋ ta na, diili tuwa, a ga gwat naŋ ngi ji mi, naŋ mujuwa tuwa.

⁶ Amma da cine micina le, a ɓaŋ le tapasa kalla, a ngum ta na, naɓa ɓi naŋ miɓa ngi jimi ati gwat naŋ mujuwa ngi gi tuwa, i ngataraŋ. Bumbulvuŋ a sa pulaŋ mungra nah, asi i cine mungum ta.

⁷ Da kaɓa ani: zuŋ diili a ɓi le a sa ja mi ngi Bumbulvuŋ, malla a juw ɓi le ngi gi gwat, a dirba nah a sliˀi le.

⁸ Tapas zil naŋ micina le, a ɓaŋ tapasa kalla ta na, naɓa a ga gwat naŋ miɓa ngi ji mi ati naŋ mujuwa ngi gi tuwa.

⁹ Amma tapas zil naŋ micina le, a ɓaŋ le tapasa kalla, a ngum ta na, naɓa jimi naŋ ati gwat naŋ mujuwa ngi gi tuwa, i ngataraŋ. Ko ti naŋ miga gwat naŋ ngi ji mi na mata tekeɗe kwana, Bumbulvuŋ a sa pulaŋ mungra naŋ.»

¹⁰ «Da wudiga malla ngwas muɓula le, a ɓi le a sa vul gwat ngi ji mi na, sey a ga gwat naŋ mujuwa ngi sa gi na.

¹¹ Da kaɓa ani, ngwas ngi hay zil a ɓi le a sa vul gwat ngi ji mi da Bumbulvuŋ, malla a juwa le ngi gi gwata.

¹² Amma zil naŋ micina na, a ɓaŋ ta na, naɓa gwat naŋ miɓa ngi ji mi waɗ gwat naŋ mujuwa ngi gi tuwa, a ga gu.

¹³ Amma da zil naŋ a waɗ le ɓa a tika tapas naŋ micina vuna kalla na, naɓa gwat naŋ ngi ji mi malla naŋ mujuwa ngi gi tuwa, i ngataraŋ. Bumbulvuŋ a sa pula mungra ngi ngwas tuwa, asi i zil naŋ mungum ta.

¹⁴ Da ngwas a ɓi le a sa vul gwat ngi ji mi malla a juwa le ngi pula gwat na, zil a pulaŋ jiviɗ malla a tikaŋ gu.

¹⁵ Na, da zil naŋ a ɓaŋ ta, hã li wun na, naɓa gwat naŋ ngi ji mi malla naŋ mujuwa ngi gi na, a ga gu. Zil naŋ miteˀteˀ tapasa na, mbiɗeˀvra, a ngum le ɓa a ga.

¹⁶ Amma da hin naŋ micina na, a cuh le si, da a wuɗ le ɓa a tika ɓula si na, naɓa zluɓ ngi ngwas naŋ a mbiɗi le nga hirnga naŋ.»

¹⁷ Ɓimujuwahay, Bumbulvuŋ muvula taŋ da Moyis, vur ɓi ngi zil ati ngwas naŋ, vur cine ati zuŋ naŋ diili aruŋ na, i hanayna so.