SLUFA VU 2 - Bible en langue guiziga

Cifi ngi sukwi Israyeley ar walahay guɗuk

¹ Bumbulvuŋ a ɓa Moyis ati Aroŋ na:

² «Israyeley a sa pam, mbur gar a wuzla soje nga taŋhay, gweˀ aciki drapo taŋ, a sa pam zar neˀ, gun hirnga ngi guɗuk ngi zlir ti ya Buymisemuŋ.

³ Tir vay mbuŋ, sojehey mujumom ar ngay ngi Zuda na, a sa cifam tisi pas ngi miprik. Buyoy ar sukwi ngi Zuda, i ti: Nasoŋ mangal ngi Aminadap.

⁴ Naŋ ti sojehey durmuk kukur tarnaˀ nga mufaɗ, ti mizli skat merkeɗ.

⁵ Masa cifam ati taŋ, i sukwi ngi Isakar waɗ ngi Zabuloŋ. Buy asi ziri ngi Isakaraya, i ti: Netaneˀel mangal ngi Suwar.

⁶ Naŋ ti sojehey durmuk kukur zlum nga mufaɗ ti mizli skat skat mufaɗ.

⁷ Ar sukwi ngi Zabuloŋ: i Eliyap, mangal ngi Heloŋ,

⁸ naŋ ti mizli ziley durmuk kukur zlum nga tarnaˀ ti skat skat mufaɗa.

⁹ Soje ngi Zudahay jom gara: Mizli durmuk skat ti kukur dangafaɗ nga merkeɗ ti mizli skat skat mufaɗa. Masa kaka mbuŋ i taŋ.

¹⁰ Tir vay ruwuyo, sojehey misi ar ngay ngi sukwi ngi Rubene, buy ngisi taŋ i Elisur mangal ngi Sedewur.

¹¹ Naŋ ti sojehey durmuk kukur mufaɗ nga merkeɗ ti skat skat zlum.

¹² Masa cifam ati taŋ i sukwi ngi Simeyoŋ: Buy ngisi taŋ i Selumiyel, mangal ngi Surisaday,

¹³ naŋ ti sojehey durmuk kukur zlum nga ngoltir ti mizli skat skat makir.

¹⁴ Ar sukwi ngi Gata: Buy i Eliyasaf, mangal ngi Dewuyel,

¹⁵ naŋ ti sojehey durmuk kukur mufaɗ nga zlum ti mizli skat skat merkeɗ ti kukur zlum.

¹⁶ Mizli ngir ngay ngi soje ngi Rubeney, sojehey mitaˀ taˀ makire, a gam jom gar: mizli ziley durmuk skat ti kukur zlum ngaŋ kaˀ ti mizli skat skat mufaɗ ti kukur zlum. Masaram asi mudumbuŋhoy i taŋ.

¹⁷ A dirba nah, i dideˀ ngi levihey masaram ti guɗuk ngi zlir ti ya Buymisemuŋ. Taŋ a ndiram a wuzla, ngay cuw ti mbuŋ, cuw ti dirba, a sa ram vur sila vur sila, kaɓa taŋ mipam ar walahaya, mbur gar ar li naŋ ar li naŋ, ti ngay ti ngay.

¹⁸ Sojehey mujumom ar ngay ngi Efrayime, a sa cifam tisi pas ngi pastaˀ. Buy ngisi taŋ i: Elisama, mangal ngi Amihuɗ.

¹⁹ Soje naŋhaya, jom gar na, taŋ zileye durmuk kukur mufaɗ ti skat skat zlum.

²⁰ Masaram aseˀe i sukwi ngi Manase ati sukwi ngi Benjameŋ: Buy ngisi sukwi ngi Manase i: Gamliyel, mangal ngi Pedasur,

²¹ naŋ ti sojeheye, ziley durmuk kukur makir nga cuw ti skat skat cuw.

²² Yo buy ngisi sukwi ngi Benjameŋ i: Abidaŋ, mangal ngi Gidoni,

²³ naŋ ti sojeheye, ziley durmuk kukur makir nga zlum ti skat skat mufaɗa.

²⁴ Mizli ngir ngay ngi soje ngi Efrayimey, mitaˀ taˀ makire, a gam jom gar na: ziley durmuk skat ti dangafaɗ ti mizli skata. Masaram mimakir taŋ, i taŋ.

²⁵ Sojehey mujumom ar ngay ngi soje ngi Daŋ, a sa cifam tir vay muŋ. Buy ngisi sukwi ngi Daŋ i: Ahiyezer, mangal ngi Amisaday,

²⁶ naŋ ti sojeheye, ziley durmuk kukur merkeɗ nga cuw ti skat skat tarnaˀ.

²⁷ Masa cifam ati naŋ i sukwi ngi Aser ati sukwi ngi Neftali. Buy ngisi sukwi ngi Aser i: Pagiyel, mangal ngi Okraŋ,

²⁸ naŋ ti sojeheye, ziley durmuk kukur mufaɗ ngaŋ kaˀ ti mizli skat skat zlum.

²⁹ Yo buy ngisi sukwi ngi Neftali i: Ahira, mangal ngi Enaŋ.

³⁰ Naŋ ti sojeheye, ziley durmuk kukur zlum nga makir ti skat skat mufaɗ.

³¹ Mizli ngir ngay ngi soje ngi Daŋ, a gam jom gar na, ziley durmuk skat ti kukur zlum nga tarnaˀ, ti mizli skat skat merkeɗ. «Masaram a dirba wãˀ i taŋ, ti ngay taŋ, ti ngay taŋ, asi cala asi cala.»

³² Israyeleye, a slufaka taŋ vur sukwi vur sukwi, vur sojehey mitaˀ taˀa, a gam jom gar na, ziley durmuk skat merkeɗ ti makir ti mizli skat skat zlum ti kukur zlum.

³³ Kaɓa Bumbulvuŋ muɗuva da Moyis na, a slufaka dideˀ ngi levihey asi Israyel mekelemeye ta.

³⁴ Israyeley a gaka kasl kasl kaɓa Bumbulvuŋ miɓa da Moyise ɗaˀ le tuwa: a pam ti ngay ngi soje taŋ ngi soje taŋ, yo a cohom vur muyo vur muyo, yo vur wazlaraya vur wazlaraya.