SLUFA VU 13 - Bible en langue guiziga

Moyis mislin mizli nga pura hirwuy Kanaˀan

¹ Bumbulvuŋ a ɓa Moyise:

² «Slin mizli nga puro hirwuy Kanaˀan, ya muvula da Israyeley na, kisa slin mbur pal vur sukwi vur sukwi tiɗeˀe, wini a wuzla buyɓi ngi Israyeley.»

³ Moyis a cine mi da Bumbulvuŋ, a slina mizli tuwa baɗ a wuzlaɓuh ngi Paraŋ, i buyɓi ngi wuzla Israyeley.

⁴ Slimiɗ taŋhay ani: Ar sukwi ngi Rubene, i Samiwa, mangal ngi Zagur.

⁵ Ar sukwi ngi Simeyoŋ, i Safat, mangal ngi Hori.

⁶ Ar sukwi ngi Zuda, i Kalep, mangal ngi Yefune.

⁷ Ar sukwi ngi Isakara, i Igal, mangal ngi Zozef.

⁸ Ar sukwi ngi Efrayime, i Hoze, mangal ngi Nun.

⁹ Ar sukwi ngi Benjameŋ, i Palti, mangal ngi Rafu.

¹⁰ Ar sukwi ngi Zabuloŋ, i Gadiyel, mangal ngi Sodi.

¹¹ Ar sukwi ngi Manase, mangal ngi Zozefe, i Gadi, mangal ngi Susi.

¹² Ar sukwi ngi Daŋ, i Amiyel, mangal ngi Gemali

¹³ Ar sukwi ngi Aser, i Setur, mangal ngi Mikayel.

¹⁴ Ar sukwi ngi Neftali, i Nabi, mangal ngi Vofsi.

¹⁵ Ar sukwi ngi Gata, i Guwel, mangal ngi Maki.

¹⁶ Tayna i slimiɗ ngi mizli, Moyis mislina taŋ ngi puro hirwuy Kanaˀan tuwa. Moyis a ca slimiɗ da Hoze mangal ngi Nuno, Zozuwe

¹⁷ Ti Moyis mislina taŋ nga puro hirwuy Kanaˀan na, a ɓa taŋ: «Cam nga Kanaˀana tir vay ruwuy naŋ, kisa ra jiɗam ti muwã.

¹⁸ Ki sa puraka, da hirwuyo naŋ mbrike na. Da mizli ngi raˀahaya taŋ gidaŋ malla i hĩhĩyahay kwana, taŋ haɗa malla neˀkini kwana.

¹⁹ Ki sa puraka, da hirwuy ngi mizli tayna, i hirwuy mezle malla malambaˀ kwa. Da walahay taŋhay, i guɗukoy malla gungun ti mohol kwana.

²⁰ Ki sa puraka, da i hirwuy magi gwat malla i magi gwat ta kwana. Widisey ada malla anta kwa. A ram, ki zluwunam ta, ngiloko yi ngi gwat ngisi ruwuy taŋ a haŋ.» Hirak ti nah na, i sifi ngi yi micikiɗeffe ngi gudubun.

²¹ Mizli tayna, a ram, zle a wuzlaɓuh mikirɗak kirɗak ngi Sine, nga pura hirwuy Kanaˀan, hã a ndilam a Rehoɓ, gweˀ avu Lebo-Hamat.

²² A cam nga Kanaˀana, tir vay ruwuy, a ndilam gweˀ avu Hebroŋ, muy ngi Ahimaŋhay, ngi Sesayay waɗ ngi Talmay, dideˀ ngi Anakay misi a raŋ. Mipaka Soˀaŋ angi hirwuy Ezipte na, naɓa hirwuy Hebroŋ a gi le vi tarnaˀ.

²³ A ndilam sesẽŋ ar sozo ngi Esekol, a sloko mihaŋ ngi gudubuno jom ti yi naŋ lingis, a luwaka law avu ganday waɗ yi ngi hunduruk ati urufo, joˀ mizli cuw a jijiroko di ɓaˀ ar pepesle.

²⁴ A zilaka li nah, Sozo ngi Esekol, mbiɗeˀvra Sozo ngi yi ngi widis lingis. Vur Israyeley a sloko yi ngi widis ngi gudubun milingis na, a diga.

Mizli Moyis mislina taŋ, a slufaka ɓi ngi gwat taŋ mupuraka waɗ taŋ migama

²⁵ Mizli Moyis mislina taŋ nga puro li tuwa, a gam hin kukur mufaɗ na, a moko.

²⁶ A moko ng'avi Moyis, Aroŋ ati mizli Israyeley a muŋ, naɓa taŋ a Kades, wuzlaɓuh mikirɗak kirɗak ngi Paraŋ. Gwat taŋ mupuraka a diga, a ɓaka da zigiduw gar, yo a bigaka taŋ yi ngi widis ngi digahaya gar ma.

²⁷ A slufaka da Moyise, a ɓakaŋ na: «I ram le nga ruwuy ka mislina ndra tuwa. Kay! I hirwuy misi ɗuwa ati mam ma ɓulom ara gisiŋ gisiŋ, yi ngi widis ngi digahay ani!

²⁸ Na so na, mizli ngi digahaya taŋ gidaŋ. Walahay madiɗahaya, i migunohoy ti mohol madiɗahay, yo i puraka dideˀ ngi Anakaya le a diga, Anak mbur suburo.

²⁹ Amalekeye tir vay ruwuy, Hitihey, Zebusihey waɗ Amoriheye, taŋ a ruwuy muwã, yo mizli Kanaˀanaya taŋ a ciki mubuliy waɗ silaɓɓa a ciki mizaw Zurdeŋ.»

³⁰ Kalep a taˀa mi da mizli maram ti mi asi Moyis ta tuwa, a ɓi: «Akum! I ra tiɓaka hirwuyo, i si na le i tiɓaka gu gisiŋ!»

³¹ Amma mizli, taŋ miram bummoˀ ati Kalep tuwa, a ɓam: «I zlaka mizli tayna gu ta, asi a funam ndra le ti gidaŋ.»

³² Dar a zlaka a ɓam ɓi malambaˀ ar hirwuy taŋ mira puroko di tuwa, daˀ a mbuŋ Israyele, a ɓam: «Hirwuy ndra mira puroko di na, ara ngizla mizli naŋhaya, yo mizli ndra mupuraka taŋ a diga na, i mizli Suburohoy.

³³ Yo ma na, i puram mizli migila fineˀ gidaŋ le ma, i dideˀ ngi Anakay. Ndra ka yukoy a ciki taŋ, na zle taŋ vuna kwana, a puram ndra ka yukoy gisiŋ.»