ROMAHAY 7 - Bible en langue guiziga

Pol muwa ɓimujuwa ati ɓi ngi ɗuvavu

¹ Sukum ɗu misikristuhoy, ɓi ya masa ɓukum di ani na, kaɓa i ɓa da mizli misinaka ɓimujuwa le gisiŋ gisiŋ. Ɓimujuwa, naŋ ti gidaŋ a hirnga mburo na, sey da naŋ da ti siifa naŋ aruŋ takwa?

² Kaɓa ani, ngwasa, da a zuɓ zil le na, ɓimujuwa a juwa le da zile hã avu mucu. Amma da zil a muc le na, naɓa ɓimujuwa a puska ngwasa le avu zile muduba.

³ Da kaɓa a sliˀi le ti zil naŋ misi angi siifa aruŋ na, a sa zilaka migi madama. Amma da zil a muc le na, naɓa ɓimujuwa anta juwaŋ mata. Da ko a zuɓ zil mekelem le kwana, a gi di i madama mata.

⁴ Sukum ɗuwoy, kumo kwana, kanah ya. Kum i mumucahay avu ɓimujuwa, asi kum mumicam jom ati dumvu ngi Kristu na, ɓa ki ndiram da mbur mekelem pal, mbur mislikiɗ ti wuzla mumucahay na, ɓa i gam gwat mezlehey da Buymisemuŋ muduba.

⁵ Asi mike na, ti ndra micifam zleˀe ti gi gwat dumvu ndra mawuɗ na, ɓimujuwa a slikiɗa ndra may gi mungra avu vu ndra, ɓa i gam gwat maru ti ndra ng'ar mucu.

⁶ Amma wurenna, i lumam hirnga ndra le avu ɓimujuwa, asi ndr'i mumucahay avu ɓi mija ndra zleˀe ng'ar dangaya, ɓa hã i gam luɓ luɓ avu ɓi mutoho magala mata, amma ɓa i gam luɓ luɓ avu Buymisemuŋ ti jiviɗ nawaya ngi ˀUf Mipal.

Ɓimujuwa ati mungra

⁷ I sa ɓam mbri ska? ɓimujuwa i mungra kwa? Kanah ta wãˀ! Amma mungra, ya miga le na, mabigiy di i gi mungra le na, i ɓimujuwa. Ɓimujuwa a ɓi zleˀe: «Ki hiyĩ gwat lambaˀ lambaˀ ta.» Da a ɓa zleˀe ta na, anja i si na hiyĩ gwat lambaˀ lambaˀ vuna ta.

⁸ Mungra a lum jiviɗ kutum tivi ɓimuɗuva, a yi sukwi ngi hiyĩ gwat gar avu ya. Asi da ɓimujuwa anta na, naɓa mungra i gwat mumuca le.

⁹ Ti ɓimujuwa misi anta zleˀe ta na, ya ti siifa zleˀe. Amma ti ɓimuɗuva mindilo na, mungra a mbul hiri a muŋ,

¹⁰ joˀ ya i mucu. Anja ɓimuɗuva aru ti mbur ng'ar siifa na ma na, a sa gi avu ya, i ngi ru ti ya ng'ar mucu.

¹¹ Vur mungra a lum jiviɗ, a giy gilaw le ti ɓimuɗuva, a kiɗiy vagay ti ɓimuɗuva vuna.

¹² Na, ɓimujuwa vuna, naŋ pal, ɓimuɗuva kwana, naŋ pal, naŋ jeŋŋe, yo naŋ mezle ma.

¹³ Ani so na, migiy ɓa i muc na, i gwat mezle vuna sukwa? Kanah ta wãˀ! Amma migiy ɓa yi muco, i mungra. A zuɓa gwat mezle, a kiɗiy ti naŋ vagay. Ar nah na, a biga vu naŋ le njoy wãˀ, i mungra gisiŋ gisiŋ, yo a zuɓa ɓimuɗuva ɓa a biga gi mungra ti gidaŋ ti naŋ.

Mungra a tika ˀay le da mburo

¹⁴ I sinaka le gisiŋ, ɓimujuwa a so tivu Buymisemuŋ, amma ya i mbur hĩhĩy, mungra a hiɗikiy le, ya ka beke naŋ.

¹⁵ Gwat ya maga na, y'anta sla wala naŋ ta gisiŋ. Gwat ya mawuɗ na, i ga ta. Yi gi di i gwat ya mahirsa jaka.

¹⁶ Da gwat ya mawuɗ ta, i ra ga na, naɓa ɓimujuwa, i tiɓa le, yo i si na le, naŋ kuy.

¹⁷ Maga kanah vuna i ya ta, amma i mungra misi a mevel ɗu na.

¹⁸ Asi i si na le, gwat mezle anta a hur ɗu ta, mbiɗeˀvra: a hur ɗu, ya mburo. Ko da may gi gwat mezle ada hur ɗu tekeɗe kwana, i ndila gi naŋ ta.

¹⁹ Asi y'anta ga gwat mezle, ya mawuɗo ta, amma gwat malambaˀ ya mawuɗ ta na, i gi di i nah jaka.

²⁰ Da ko i gi di i gwat ya mawuɗ ta tekeɗe kwana, i ya vuna maga ta, amma i mungra misi a mevel ɗu na.

²¹ Da i ra wuɗ i gi gwat mezle na, i sa pura na, nga ya, i gi di i gwat malambaˀ tewle si.

²² Asi ar jileŋ ngi mevel ɗu, ya mburo na, ɓimujuwa ngi Buymisemuŋ ara ciriy hiri ɓula.

²³ Amma avu dumvu ɗu na, i ra lum ɓi mekelem pal makiɗam vu ati ɓimujuwa, ya mangil di wuy a mevel ɗu. A ra tiri ti ya beke ngi ɓi ngi mungra misi avu dumvu ɗu.

²⁴ Kay, ya mbur migeˀ ˀircece le wãˀ! Masa tuɓo ya tivu dumvu ɗu maɗiɗiy ng'ar muc na, i waka?

²⁵ Sise da Buymisemuŋ, tisi Buy ndra Yesu Kristu! Ani wurenna, ar lesl ɗu, i ra gi slra ngi ɓimujuwa ngi Buymisemuŋ, yo ar kpak ngi vu ɗu, i ra gi slra ngi ɓi ngi mungra.