ROMAHAY 12 - Bible en langue guiziga

Mbiɗi nawaya ngi gi slra ngi Buymisemuŋ

¹ Sukum ɗu misikristuhoy, ambuh ambuh kum ti slimiɗ ngi Buymisemuŋ mapur ˀircece haɗa na so, ɓa ki vulakaŋ vu kumo wãˀ ti haŋ kumo, kaɓa gwat misi titiri ngi gi mikuli a mbuŋ Buymisemuŋ, mihĩˀĩ da Buymisemuŋ, maciraŋ hiri. Dilik kum mikaslsla ti jiviɗ naŋ a mbuŋ Buymisemuŋ, i nah so.

² Anja ki sipam sirik ngi duniya hana ta, amma pulaka Buymisemuŋ ɓa a mbuɗukum ar lesl kum mimbiɗi nawaya wãˀ na. Dar kisa slaka wala ngi gwat Buymisemuŋ mawuɗo: gwat mukuy, gwat maciraŋ hiri, gwat manja hereweɗe.

³ Buymisemuŋ a giy mezle le, vurˀe, kum purla purla gar, yi ɓukum na: anja ki wulkam wuluk mifineˀ gidaŋ kumo ta. Ko wa gar a wuluk kaslsla, weˀe avu tiɓi, Buymisemuŋ muvulaŋ nga naŋ.

⁴ Naŋ kine, dumvu ngi mburo, a wunuk le, hirzlikeye wal wal haɗi. Hirzlik gar ti slra naŋ ti slra naŋ.

⁵ Naŋ kanah ya, ndra mujom ati Kristu na, ko ti ndra mihaɗi tekeɗe kwana, i tiram le i dumvu purla. Ndra purla purla gar, i jumom le kaɓa hirzlik ngi vuhoy mujumom ar li purla.

⁶ Ndra purla purla gar, Buymisemuŋ a vula ndra gwat ngi gi wal wal, weˀe avu gimezle naŋ miga ndra di. Mbur mekelem a wuzla ndra, da a vulaŋ nga naŋ i ɓi ɓi Buymisemuŋ minjikaŋ di na, anja a ɓa weˀe avu tiɓi naŋ.

⁷ Mbur numuŋ, da a vulaŋ nga naŋ i slra ngi jina mizli na, anja a jina taŋ. Mbur mekeleme, da a vulaŋ nga naŋ i slra ngi dubuna gwat da mizli na, anja a dubuna taŋ di.

⁸ Da slra ngi mburo, i ngi vula gidaŋ da mizli na, anja a vula taŋ di. Mbur mavula zlili naŋ da mizli na, anja a ga ti mevel purla. Madiɗa ngi mizli, anja a ga slra naŋ hirdam hirdam wãˀ. Mbur mapur ˀircece da mizli, anja a pura taŋ di ti mumul.

⁹ Anja ki wuɗam vu ti kwacay purla. Hirsaka gi malambaˀa, ki pulaka gimezle ta.

¹⁰ Anja ki wuɗam vu haɗa ar wala kumo kaɓa sukumuŋhoy mawuɗam vu ar wala taŋ. Hurdumom hirdam, anja ko wa gar a ɗuva hirnga da cala.

¹¹ Anja masafaya a gukum ta, amma ndiram wirwir. Gaka slra ngi Bumbulvuŋ ti mevel purla.

¹² Mumulom, asi njaha hiri kum njah na. Da bonoy a lumukum le na, ɓusakaŋ, diram dibiɗ ndrehhe.

¹³ Gwat sukum kumoy muroko ti may naŋ na, jinaka taŋ anga. Mizli masoko a hay kumo, tiɓaka taŋ mulaka kuy kuy.

¹⁴ Tumbuloko Buymisemuŋ ɓa a ga mezle da mizli masupukum nder ndere. Tumbulokoŋ ɓa a ga taŋ mezle, anja ɓa a nisa taŋ ta.

¹⁵ Mumulom ati mizli muroko mumulomo, tuwam ati mizli muroko tuwama.

¹⁶ Nguɓam ˀay kuy kuy ar wala kumo. Anja ki huhumom vu kum ta, ko gwat ngi gi mupuɗaw ta kwana, tiɓaka, gaka si. Anja ki gam kaɓa kum i misi si na mijileŋhey ta.

¹⁷ Da mbur a gukum malambaˀ le na, anja ki makaŋ di ti malambaˀa ya ta. Puram jiviɗ ɓa ki gam gwat mezle avu mizli gar.

¹⁸ Da a gi na, anja ki gam migidaŋ kumo, ɓa ki cifam zuy zuy ati mizli gar.

¹⁹ Yeme ɗuwoy, anja ki pulaka cuwal kumo ti haŋ kumo ta, amma pulaka da himaˀ ngi Buymisemuŋ magi di. Asi ar Ɓimutoho, Bumbulvuŋ a ɓi: «Masa pula cuwal, i ya, masa wurka taŋ asi slra taŋ, i ya.»

²⁰ Yo a ɓi ma na: «Da may ara ja mesene ɗike na, vulaŋ gwat ngi zumo. Da yam ara gaŋ na, vulaŋ, a si. Asi da ka mira ga kahana na, kite ki ra cikil di i zayvu mihilɓiɓ nga hirnga naŋ.»

²¹ Anja ki pula gwat malambaˀ a puw hirnga ta, amma pa hirnga da gwat malambaˀa ti gimezle jaka.