ROMAHAY 1 - Bible en langue guiziga

Ji haŋ

¹ I ya Pol, gawla ngi Yesu Kristu. Buymisemuŋ a ziliy ɓa yi tiri mislin naŋ, a winiy ngi tila mi ti Ɓimezle mubo baɗ ava.

² Buymisemuŋ a ɓa Ɓimezle hana le ɗaˀ le zleˀe. Ɓi nah, a bo ti balam mijiviɗ naŋhay miɓaka angi Ɗerewol muvuku vu taŋ.

³ I Ɓimezle maɓi ɓi ngi Mangal naŋ, Buy ndra Yesu Kristu. Taŋ miyakaŋ i mbur na, angi tizer ngi Daviti.

⁴ Amma ti naŋ mislikiɗ ti wuzla mumucahay na, ˀUf Mipal a biga le ti gidaŋ, naŋ i Mangal ngi Buymisemuŋ.

⁵ Buymisemuŋ migiy mezle na, tisi Yesu Kristu. A tiri ti ya mislin naŋ ɓa sukwi ngi mizli gar a tiɓam, a cinam mi da Buymisemuŋ, a ɗuvaka hirnga da Yesu Kristu.

⁶ Kumo kwana, kum i mizli, Yesu Kristu mizila taŋ vuna ya.

⁷ I ra tuhukum di da kum ngi Romahay, Buymisemuŋ ara wuɗukum gar, a zulukum le ɓa ki tiram nga naŋhay. Anja Cine ndra Buymisemuŋ ati Buy Yesu Kristu a gukum mezle, a vulukum zuy.

Polo, naŋ ti may ngi ra pura misikristu ngi Romahay

⁸ Dumbuŋ dumbuŋ na, i ga sise da Buymisemuŋ ɗu tisi Yesu Kristu vur kum gar. Asi ar duniya gar na, ara ɓaka ɓi ngi kum matiɓam na.

⁹ Buymisemuŋ, ya mahuruk huruk a mbuŋ naŋ ti mevel ɗu wãˀ, ti tila mi ti Ɓimezle ngi Mangal naŋ na, a si na le, ya maɓi na, naŋ kaslsla. A si na le, i ra wuluk ar kumo ndrehhe.

¹⁰ Ya mira dir dibiɗ gar na, i ra cufuɗaŋ, da a ngum na, anja i lum haŋ ngra purukum muduba.

¹¹ Naŋ kine, may nga purukum ara jiy haɗi haɗi wãˀ ngi vulukum gwat ngi ˀUf Mipal na, ɓa ki lumam di gidaŋ.

¹² Wãˀ naŋ na, i wuɗ anja y'ada a wuzla kumo. Da ki ra purikiy ya mitiɓi na, ki lumam di gidaŋ, ya kwana, kanah ya.

¹³ Sukum ɗuwoy, i wuɗ ɓa ki sinaka, i juwa ɓi nah le a mevel ɗu is mbeˀ mbeˀ ɓa i ru ngi hay kumo, amma hã wurenna gwat matikiy ada. Yi wuɗ na, anja slra ɗu a yi zinga a wuzla kumo, kaɓa naŋ miyi a wuzla sukwi mekelemey na ya.

¹⁴ Ɓimezle nah na, sey yi til di mi da mizli gar, da mizli ngir walahay madiɗahay ati ngi ɓuhoy, da mizli misinam gwat le ati misinam gwat ta gar.

¹⁵ Ya muro ti may ngi ra tila mi ti Ɓimezle da kum Romahay aya na vurˀeŋ.

Gidaŋ ngi Ɓimezle

¹⁶ Y'anta gi mesem ngi tila mi ti Ɓimezle ta, asi i gidaŋ ngi Buymisemuŋ malaha ko wa mitiɓi le gar, Yudehey dumbuŋ waɗ sukwi mekelemey gar.

¹⁷ Naŋ kine, Ɓimezle a biga gwat ani: Buymisemuŋ a si na mizli, taŋ jeŋŋe na, asi tiɓi taŋ tewle. Kaɓa mutohoko ɓi naŋ: «Mbur mijeŋŋe a sa ndir ti siifa tisi tiɓi.»

Mizli a cam le ar mungra

¹⁸ Naŋ kine, mizli magam mungra waɗ gwat mijeŋ tahay gar ngi tika ɓi mikaslsla ɓa a njik ta na, Buymisemuŋ a zuɓ himaˀ le, yo a njuyo di le paɗ ti muŋ ng'ar taŋ.

¹⁹ Asi mike na, gwat zliv ɓa mizli a sinaka Buymisemuŋ ava na, naŋ njak ar li babara avu taŋ. Buymisemuŋ ti hirnga naŋ, a biga taŋ di le njoy wãˀ si.

²⁰ Naŋ kine, mbur a pura Buymisemuŋ, yo a si na kpak naŋ gu ta gisiŋ. Amma zle ti naŋ miga duniya na, a biga sli wala ngi gwataya le njah wãˀ da mizli ti gwatay naŋ miga taŋ na. Vurˀe, anta sa pula mungra ngi mizli titrahaya teˀ mata.

²¹ Asi mike na, a sinaka Buymisemuŋ le ngbaŋ, amma a ɗuvakaŋ hirnga ta, yo a gakaŋ sise ti jiviɗ naŋ kaslsla ta ma. Wuluk taŋ a kirih le kileŋ tivi ɓi mikaslsla jaka, mevel taŋ anta sla wala ngi ɓi mata, luvuŋ a sirta le sirit wãˀa.

²² A puraka vu taŋ ka misi sinmijileŋhey, dambalaka i gilaway.

²³ Anja ɓa a dilkam a mbuŋ Buymisemuŋ mamuc ta wãˀ na ma na, taŋ a dilkam jak na, a mbuŋ foto ngi mbur mamucu, ngi ɗiyuwoy ati ngi gwat misi ti sar mufaɗ mufaɗay, waɗ gwat maram ti kwacayay.

²⁴ Vurˀe, Buymisemuŋ a pula taŋ mbak, a gam gwat ngi mevel taŋ mahĩyãŋ, a hiryaka vu taŋ ti naŋ. Taŋ ti hirnga taŋ, a gam gwat ngi mesem mukuy ta wãˀ ar wala taŋ tehhe a muŋ.

²⁵ A mbiɗaka ɓi mikaslsla ngi Buymisemuŋ, a tiram di ɓi ngi slir. A dilkam a mbuŋ gwat Buymisemuŋ miga taŋ ti gi, a sipaka taŋ, mbak Buymisemuŋ miga gwatay vuna jaka. Anja wãˀ naŋ na, mizlir ngi hunum hã ngi set na, i naŋ Bumbulvuŋ vuna! Amin.

²⁶ Vurˀe, Buymisemuŋ a pula taŋ mbak, a gam gwat ngi mesem. Ngwas taŋhay a hinam ar wala taŋ tehhe a muŋ, mbak hin ngi zil ati ngwasa le, nah na i gwat mizlir ngi gi ta.

²⁷ Ziley kwana, kanah ya, a pulaka hin ti ngwasaya, may ngi hin ar wala taŋ tehhe a muŋ ara ja taŋ haɗa haɗa. Ziley a hinam ti ziley. Kay, a gam di i gwat ngi mesem mukuy ta wãˀ! Naŋ kine, a gaka taŋ kiita da taŋ vuna asi a zizam le.

²⁸ Yo taŋ mungumam si na Buymisemuŋ ta na, Buymisemuŋ a pula taŋ mbak angi lesl taŋ manja sli wala na vurˀe, a gam gwat mizlir ngi gi zleˀe ta.

²⁹ Hur kwacay taŋ ndus ndus ti sukwi ngi gi gwat mijeŋ tahay, kaɓa: gi malambaˀ, hiyĩ gwat, moˀore, gi suloŋ haɗi, kiɗa hirnga, tiri, wer ngi gi gilaw da mbur, may hirya mbur, hulo virzi,

³⁰ ɓi ɓi malambaˀ ar wala taŋ, gi mesene ti Buymisemuŋ, wuɗa mi, pura vu ka mbur madiɗa, huhumvu, puram jiviɗ ngi gi malambaˀ da mizli, cine mi ta da miyi taŋhay.

³¹ Tˀanta ti lesl ta, gwat taŋ miɓaka le ngi gi na, anta gaka ta, hirnga taŋ gidaŋ, anta puram ˀircece ta.

³² A sinaka kiita ngi Buymisemuŋ le ngbaŋ. A sinaka le, mizli magam gwat kahana na, a kiɗaka taŋ vagay vagay. Ko ti nah gar kwana, ara gaka nga mbuŋ nga mbuŋ na si. Yo ma na, a ngilam wuy ti mizli magaka vuna jak ma.