PIYER MUDUMBUŊ NAŊ 3 - Bible en langue guiziga

Ngwasay ati ziley

¹ Kum ngwasay kwana, hinam hirnga a mbuŋ zil kumoy aya, da ko mizli mekelemey anta ngumam tiɓa ɓi ngi Buymisemuŋ ta tekeɗe kwana, ɓa a sa lumoko taŋ manja mingiɓi aseˀe, a tiɓaka Buymisemuŋ tisi gi gwat mezle ngi ngwas taŋhay na.

² Asi a sa puraka gwat ngi gi kum i mezle, i ngi ɗuva hirnga da Buymisemuŋ.

³ Anja ɗiya vu kumo, a gi i ɗiya vu ngi vra ta, kaɓa slupa hirnga, ci gwat ngi wuya ngi ɓiri tapasl tapaslay malla juwa zana ngi slimiɗey ta.

⁴ Amma anja ɗiya vu kumo, i ɗiya vu ngi huroˀo, ɗiya vu mahiryi ta wãˀ, misi ti lesl misetette, zuy zuy, i ɗiya vu mupuɗaw haɗa a mihiri ngi Buymisemuŋ.

⁵ Naŋ kine, ngwas misi zleˀehey mazluwunam ti Buymisemuŋ na, a njaham hiri le ar Buymisemuŋ ti hina hirnga a mbuŋ zil taŋhaya.

⁶ Kaɓa Sara micina mi da Abraham, a zilaŋ «buy ɗu.» Da ki ra gam gwat mezle, yo da kum anta pulaka ɓa zluwun a gukum ngaˀa neˀ ta na, naɓa ki tiram ziri naŋ mongosohoy le.

⁷ Kum ziley kwana, kanah ya, cifam ati ngwas kumoyo ti wulka kpak ngi vu taŋ hĩhĩy na, ɗuvaka taŋ hirnga, asi taŋ kwana, siifa ngi set, Buymisemuŋ masa vula na, sey a lumam jom ati kum aya. Gam kanah ɓa gwat matika diradibiɗ kum anta.

Si bonoy asi gi gwat mijeŋŋe

⁸ Mindir wurenna, sey ki ndiram ti wuluk misi purla, sam bonoy jom ati mizli mekelemeye. Wuɗam vu kaɓa sukumuŋhoy, puram ˀircece, hinam hirnga ar wala kumo.

⁹ Da mizli a gukum malambaˀ le na, anja ki maka taŋ di ti malambaˀ aya ta, malla da a zukum le na, anja ki maka taŋ di ti zi aya ta. Kum ɗuwulaka taŋ mi jaka, asi Buymisemuŋ muzulukum na vurˀe, a ɓi a sa gukum mezle.

¹⁰ Naŋ kine, a tohoko na: «Mbur muwuɗ zuma duniya le, yo muwuɗ le ɓa a mumul angi hin ngi siifa naŋ na, sey a pula ɓi ɓi malambaˀa, a pula ɓi ɓi ngi gi gilaw da mburo.

¹¹ Sey a mbiɗi duba avu gi gwat malambaˀa, ɓa a gi mezle. Sey a sipi gi gwat ngi vula zuy gǝr gǝr wãˀa.

¹² Asi Bumbulvuŋ, a ro hiri taˀ ar mizli mijeŋŋehey, a ro slimiɗ jakka ngi cine diradibiɗ taŋ, amma mizli magam gwat malambaˀhaya, ara cici kaŋ kaŋ, a ngum mbiɗi hiri ng'ar taŋ ta.»

¹³ Da ki roko hurdumom ngi gi gwat mezle na, masa gukum malambaˀa, i waka?

¹⁴ Wãˀ naŋ na, da ki ra sam bonoy asi kum magam gwat mijeŋŋe na, yawwa Kum ar wuya. Ki zluwunam ti mizli ko neˀ ta. Anja gwat a gukum ngaˀa ta.

¹⁵ Amma Kristu, Buy kumo, ɗuvakaŋ hirnga a mevel kumo. Wam vu ndrehhe ngi mbiɗa mingiɓi da mizli macufuɗukum ngi si na wuluk ngi njaha hiri kum na.

¹⁶ Amma mbiɗaka taŋ di ti mi teˀteˀ, ti ˀay mezle, ti wuluk ngir mevel mezle wãˀ, ko da mizli ara kupukum ɓi kwana, taŋ mapuraka gi gwat mezle asi kum mujom ati Kristu tuwa na, ɓa a sa pa taŋ mesem.

¹⁷ Da gwat Buymisemuŋ mawuɗo i nah na, zuwen kum masam bonoy asi kum magam gwat mezle vuna, a funa kum masam bonoy asi gi gwat malambaˀa le.

¹⁸ Asi mike na, Kristu ti haŋ naŋ, a muc is purla tewle vur mungra ngi mizli. Naŋ, mbur mijeŋŋe, a muc vur mizli migi gwat mijeŋ tahay, ɓa a sa bugukum da Buymisemuŋ. A kiɗaka le vagay ar dumvu naŋ, amma ˀUf Mipal, a mo di le ar siifa a muŋ.

¹⁹ Naŋ muru nga tila mi ko da musuɗukoy misi angi dangay na, ti ˀUf naŋ vuna.

²⁰ I musuɗuk ngi mizli misi zleˀehey, micinam mi da Buymisemuŋ ta, ti naŋ mukutuk hã Nowe miɗiya palalam, mizli dangafaɗ tewle milaham tir yam na.

²¹ Yam nah na, a bigi ci ar yam maluhukum wurenna na. I ci ar yam ngi buna dili ngi dumvu ta, amma ngi vula vu taˀ da Buymisemuŋ ti wuluk mezle ngir mevel. A luhukum tisi slikiɗ ngi Yesu Kristu ti wuzla mumucahay.

²² Yesu Kristu muru nga muŋ, naŋ mujoˀ tir vay hazum ngi Buymisemuŋ na, ara zum buy ar modrohoy, yo ar gwat madiɗahay waɗ ar gwat misi gidaŋ ngi muŋhoy gar.